ماكان في مسجد قريب من البيت عشان كدة ما مشينا الصلاة الرجال بس مشو لمن جو ضبحو وعملوا الفطور وفطرنا والضهر طلعنا مع البنات مشينا بيت كدة قعدو يعملو شعرهم شيء مشاط وشي صبغة والمهم رجعنا قريب المغرب . تاني يوم طلهنا مع البنات نهوم لبست اسكيرتي تلات اربع وتي شرت نص كم كوبي وطرحة كوبية وكارينا بيضاء رجعنا البيت العشاء وتالت يوم في العيد مشينا الجبل جنبو ترعة المغرب رجعنا واليوم الرابع سافرنا مدني و قضينا فيها يوم كامل هوامة بس ومن مدني رجعنا الخرطوم وأخيراً
نزلنا المدرسة وفي يوم جا ود عمي قال عايز أختي تماضر قررو يوم الجمعة على طول العقد يوم الجمعة تعبنا شديد والحمد لله عد على خير وبكدة فكرت خلاص الحمد لله خلصت من أختي وتاني مافي مشاكل
بعد مرت تلاتة شهور في يوم بالضهر بعد ما جيت من المدرسة رقدت نمتا صحيت لقيت أختي تماضر قاهدة جنبي سلمت عليها وافتكرت جاتنا زيارة وراجعة واكتشفت انو جات تقعد معانا للأبد وبعد فترة من جيتها ولدت ( طبعاً هي من اتزوجت ليها يداب 3 شهور تولد كيفن وعرفت خلاص سبب طلاقها من ود عمي يعني معقولة أنا راجل اتزوجت بعد فترة اكتشف مرتي حامل في الشهر السادس )
إمتحنت تامن ونجحت جبت 255 مع انو النسبة ما عاجبني لكن نعمل شنو لازم نتقبل الواقع يوم النتائج بيتنا دة ملان ضيوف ديل يدخلو وديل يطلعو متذكرة جونا عيال عمي قعدنا مع بعض نقول أشعار بالذات شعر كدة مميز متذكراهو للآن ( الجامعة متين أنا أصلا )
ودخلت الثانوي وكانت المفاجأة وأول خذلان وصدمة بالجد كان واقع صعب اتخذلت في صحباتي اكتشفت إنهم كانوا صحابات مصالح ما كلهم أنا كنت مصاحبة كل الفصل طبعاً اتلاقيت مع صحبتي من الروضة اتلمينا تاني من جديد كنت كارهة اليوم دة لكن بعد لقيتها يومي بقى حلو قضينا اليوم كلو مع بعض لحدي نهاية اليوم ورجعنا سوا بين بيتنا وبيتهم زلط وكم شارع وبقينا ما بنفترق نهائي عدت سنة أولى بخير وفي الإجازة في يوم أنا وأمي وأختي الكبيرة قاعدين برانا في البيت أنا كنت جوة وهم برة فجأة سمعتهم بتشاكلو (اتخيلوا معي بت بتتشاكل مع امها بتنهرها يعني في الوقت داك كان نفسي امشي اضربها لكن تبقى مجرد أمنية خلونا نكمل )وقت الضهر أنا وأخوي الصغير قاعدين نحضر تلفزيون وأمي وأبوي برة سمعنا زول دق الباب أبوي مشى فتح وجو داخلين شرطيين قعدوا برة مع أبوي ( أختي مشت اشتكت ماما وبابا قدمت شكوى ضدهم في المحكمة إنهم مضايقينها في البيت لمن طردوها قمة الوقاحة ) العصر ناس أمي مشو المحكمة وتاني يوم برضو مشو مع حبوبتي أم أمي والقاضي عاين للقضية لقاها عبرة عن قضية عقوق والدين ما أكتر قفل القضية وقال ليهم هي الخسرانة ( طبعاً أنا كرهتها شديد في اللحظة ديك ومحيتها من سجل عيلتي )
بعد فترة جدي خال أمي رجع أختي تماضر البيت مع انو أبوي ما راضي لكن سكت رجعت وهي للمرة التالتة حامل ولد منو الله أعلم عدت الأيام ونزلنا تانية وجا عيد الفطر وأول يوم أختي ولدت مسخت لينا العيد زاتو أمي وأختي نهائي ما طلعو من البيت أما أنا قويت نفسي مشيت صليت صلاة العيد وعيدت للجيران زي كل عيد
أنت تقرأ
لماذا أنا .. قيد الكتابة
General Fictionهو قدر كلو مقدر ومكتوب وكلو لي خير القدر هو ليس عائق بل هو نصيبنا من هذه الحياة هو قصتنا في هذه الحياة هو حكم الله في خلقه وفي مشيئته ، القدر ليس عائق بل هو قدرة الله في كونه... الحمدلله حتى يبلغ الحمد منتهاه ..
