حضرنا المحاضرة وفي النهاية قسمنا لي خمسة قروبات كل قروب فيهو 8 أشخاص علي أساس نقدم سمنار حظنا السمح وقعوا معانا ولدين( أصلن الدفعة فيها 3 أولاد بس)جيهونا جيهة زابطة خلاص طلعوا السمنار براهم وجابوا لينا مصور جاهز والحمد لله انجزنا فيهو ونحنا تقريباً أفضل مجموعة قدمت ومن الوقت داك اتكونت صداقة بيناتنا
صديقتي المقربة الملكة بالإضافة لي زملائنا محمد ومحمد وعروة أغلب الأحيان برجع البيت مع محمد وعروة لأني ما بحب التأخير خاصة البنات عندهم طقوس غريبة بعملوها لو راجعين البيت شيء بدرة و شيء روج والزمن بتأخر فعشان كدة بطلع براي لو لقيت محمد وعروة بتونس معاهم لحدي ما أصل المحطة
مر السمستر الأول على خير والتاني برضو ومع جرة آخر قلم شهد على مرور سنة في الجامعة خلال السنة انضميت لأحلى شلة مي مدينة أسماء تيسير بتول ياخ ديل أحلى حاجة حصلت في حياتي (ربنا يديمهم لي)
السنة التانية الحمد لله بقيت سنير وما اتبرلمتا وخلال السنة حصلت حاجات كتيرة حلوة صداقتنا القوية مع برالمتنا وسنايرنا وشهرتنا الطالت كل أجزاء الكلية والاسبوع العلمي الثقافة بي نكهة تانية غير عن السنة المضت وبي ختام الأسبوع العلمي الثقافي ربحنا كأس خاص من نوع آخر كأس الشجاعة و شهادات تقديرية موقع من العميد شخصياً لكن في السنة افترقت عن صديقي العزيز محمد يداب حسيت بي مكانتو عندي (ربنا يسهل طريقو وين ما كان) وانتهت السنة التانية مخلفة الكتير من الذكريات
السنة التالتة هدوء نسبي كان في البداية ومع وصول المها (بت عمي) وعمتي بدت الإثارة ورسم مخطط للتسلية أول مكان مشينا الساحة الخضراء اتفقنا مع كل أقاربنا يوم الجمعة
"خلينا نقيف شوية نحكي أحداث اليوم دة بالتفصيل الممل"
من الصباح لمن قمنا نضفنا البيت و رتبناهو و غسلنا ملابسنا أنا والمها وبعد الفطور عملت خلطة للوش وختيتها في وشي جات تقوى برضو ختت في وشها والمها كمان بعد صلينا الضهر دخلنا الغرفة نزلنا الدولاب كلو في السرير وبقينا ننسق في الملابس لحدي ما الكل اقتنع بي لبسو بعد العصر الكل اتجهزوا وطلعنا
المها لبست اسكيرت فاري مشكل وقميص كحلي وطرحة لحمية وشبط كبدي وشنطة كبدية
تقوى لبست قميص بدلة لونو رمادي خفيف وهاف جكت لونو رمادي تقيل واسكيرت أسود وطرحة مشكلة رمادي بي أسود وجزمة وشنطة سودة
أنا لبست اسكيرت أسود فنايلي وقميص أبيض و جكت قط طويل لونو كحلي وطرحة وشنطة كبدية وشبط أسود
ركبنا البص المأجرينو (حبينا نكون كلنا مع بعض) اتحركنا قريب للمغرب وصلنا آذان المغرب كل الناس اتوجهت تصلي وبعدها اجتمعنا في دايرتين واحدة للشباب والتانية للبنات والمتزوجات الفي تلاتينات والعشرينات قعدنا نتونس و نتغدا (الغريبة الناس مع التجهيزات نست الغداء) بعد ما أكلنا صلينا العشاء وبدينا نلعب مع الشباب بعد ما اتلمينا نحنا البنات مع الشباب في دايرة تالتة (ما كل الشباب بحبو اللعب جزء منهم فضلوا يقعدوا يشربو الجبنة ويتونسو)
أنت تقرأ
لماذا أنا .. قيد الكتابة
General Fictionهو قدر كلو مقدر ومكتوب وكلو لي خير القدر هو ليس عائق بل هو نصيبنا من هذه الحياة هو قصتنا في هذه الحياة هو حكم الله في خلقه وفي مشيئته ، القدر ليس عائق بل هو قدرة الله في كونه... الحمدلله حتى يبلغ الحمد منتهاه ..
