يوميـات سومـا المسمومه❤

خرآفآت زمـآن 2

اليوم خرافتنا ان شاء الله غير تعجبكم ومانبي غير دعمكم بالرحمة الولدين..والخرافة علي العبارة الي اتقول نشرب من كاسي وانموت مع ناسي....كان ياما كان في قديم الزمان كان فيه سلطان وماسلطان غير الله والي عليه ذنوب ايقول استغفر الله...
كان هذاك السلطان حاكم ع البلاد كلها وشاد زمام الاموروفيها وكان عنده ولدين وبنت وعايش متبحبح ومتريس الراي رايه والشيرة شيرته....وكانت بلاده تنعم بالخيرات والرقي والتجارة....
كبرو اولاد السلطان وبنته وكان فرحان بيهم...وايدلل فيهم وهما عايشين عيشة سلاطين...
وكان السلطان مايل اكثر شي للبنية ايحبها وايشاركها في اموره وامور الحكم..حيث كانت هي صاحبة فطنة وذكاء وتفهم في اموروالدولة والحكم.....
المهم عام وراء عام...لين جاهم هالعام....
حل القحط والفقر والجفاف بهذيك البلاد وبدت امور الدولة في الانحطاط...بدت الناس حايرة كيف لتعيش وكيف تاكل وتشرب واتعيش....
تسرب الخبر للسلطان وعلم شن حل بشعبه وبلاده....
بدا حاير وايفكر كيف ينقذ الناس...ومايبيش يخسر شعبه وحكمه...حيث بدو اكثرالناس اتهاجر وتبعد عن هذيك البلاد
جاء ياحنة نادي علي بنته وقاللها بالشي الي صاير وقلها ترا دبري عليا شن اندير.....هي بدت ياحنة اتغمم واتفكر وتدرس ف الموضوع...لين توصلت لفكرة.....
نادت علي بوها السلطان وقالتله شن رايك نعطو للناس من المونة الي امخزنيننها في المخازن والمغازات...وكانت فعلا عندهم القمح والشعير والمونة بكثرة ومقابل اخذ المونة يعطونا الذهب وبعد تستقر البلاد نشرو مونة اخري بالذهب...وهكي انكونو انقذنا الناس من الجوع والشر وحافظنا علي عرش السلطان من الانهيار.....
فكر فكر السلطان ف كلام بنته ووافق علي فكرتها....
اعلن السلطان للناس انه من يبي المونة من قمح وشعير وغيرها من الحبوب يشريها مقابل دفع قطع من الذهب....فرحو الناس بالفكرة الي تنقذهم من الجوع...وبدو يشرو فالاكل مقابل دفع الذهب...واستمروا علي هالحال قريب العام ونص...هي قولو حاجة وراها الايد تنقص ما اتزيد
بدا الاكل والمونة تنقص واتقل من مخازن السلطان...ورجعت الناس للقحط والجوع من جديد وزاد الحال سوء اكثر من قبل......
بدت الناس ترحل واتهاجر وفيه الي مات من شدة الجوع...بدا السلطان حاير..وزاد حيرة لما علم ان الجوع والجدب وصل حتي في القصر امتعه....
معادش عرف شن ايدير وتقطعت جميع السبل بيه وبي عائلته...جاء لبنته وكدس قدامها هذاك الذهب الي خذاه من الناس وصب غظبه ولوهم علي بنته باعتبارها هي صاحبة الفكرة...وقاللها هي توا عيشينا وشبعينا بالذهب...مش كانها نعمة خير من الذهب...قتلهوفعلا ياريتها نعمة ومش ذهب واعترفت بفشل خطتها...المهم قرر السلطان انه ايموت هو واولاده وبنته مع بعض خير ما يقتلهم الشر والجوع....جاب ماء وحط فيه السم حاشاكم وصب لكل اولاده كاس وقللهم اشربو شربو هما وبوهم وامهم طاحو ماتو بحدا بعض الا البنت ما بتش تشرب وقعدت حية.....
دارت دارتوفي هذاك القصر الخالي جالي....وما فيه كائن حي الاهي..وطلعت تجري تجري وخشت للغابة وتاهت فيها...ماعاد عرفت وين اتقبل....لين يوم من الايام طاحت في قطيع من الغزلان...استانست بيهم وقعدت بحداهم لما يجرو تجري حتي هي ولما يركح تركح حتي هي وتاكل ما ياكو وتشرب ما يشربو...ومن كثرماقعدة من غير كلام تبكشت وماعاد تعرف تتكلم....واستمرت عالهاحال.سنوات...
في يوم من الايام كان فيه شاب صياد يطلع للصيد في الغابة كان طالع يصطاد وهو ماشي شاف قطيع الغزلان بدا.ايطارد فيه ويجري وراه لعل يصطاد منهم لين ركز ولاحظ انه معاهم بنت وهي طبعا ماسموها سلطانة الا فعلا كانت جميلة وعاطيها ربي الزين والدلال.......المهم استغرب  الشاب فيما شاف...وقعد حاير فيها وفي خاطره ايقول زعمة انس ولا جان...وايفكر كيف يكشف امرها وخطرت في باله فكرة مشي حط من الماكلة والزاد امتعه  حاشاكم بتهرب....طبعا هي لما شافت الاكل قربت وكلت كلت لين شبعت وشربت وهنا طلع هذاك الشاب وقرب منها وعطاها الامان انه ما يضرها ولا ايمسها بسوء.....استانستله وعلقد ما كلم فيها وسأل ما قدرت اتجاوبه......وعرف انها صماء لا تتكلم قاللها. اتروحي معايا لبلادي فرحت وهزت براسها انها موافقة روح بيها وحطها عند قريبته وقاللها اهتمي بيها...عطتها اللبس والاكل واهتمت بيها وبعد ايام جاها وعرض عليها الزواج وافقت وتزوجها وعاشت معاه متهنية ومرتاحة علي رقة حاله وفقره لكنها حست بالامان وكانت هادية ومطيعة وحملت وربي رزقهم بزوز اولاد توامة.....
فرحولهم الناس هلبة وبدو ايجوها النسون ايباركولها وايحطولها ف نحيلتها ذهب.......بعد اسبوع لمدت هذاك الذهب وبدت اتقول ياريته نعمة ومش ذهب...علي خشت راجلها سمعها تتكلم قرب منها وفرح وقاللها الحمدلله اهو بديتي تتكلمي لكن علاش اتقولي ياريته نعمة ومش ذهب....قالتله ارفعني لاهلي وتوا تعرف...قاللها هوانتي عندك اهل وتعرفي مكانهم قالتله ايه عندي ونعرفهم.......ناض حط هذوك التويمة عند قريبته وامنها عليهم...وشد الرحال وركب هو وياها وسافرو...هي تمشي وهو ايتبع...للين وصلو لبلاد خالية جالية مافيها كان الرشاد ......قالتله هاااااذي بلادي ومشت مشت لين وصلت هذاك القصر مهجور خالي جالي مافيه والي.......خشت وقربت هي وياه لين وصلت بحدا جثث بوها وخوتها وهذاك الذهب امكدس اكداس بحداهم غرفت عبتله منه شكاير وقالتله هذا حلال عليك خوذه وعيش بيه اولادي وانا بنشرب من كاسي وانموت مع ناسي وخذت هذاك الكاس المسموم صبت فيه الماء شرباته وطاحت ماتت بحدا ناسها.....مشيت وخليتهم وبعيوني ماريتهم

#تفآعلووو،❤