مسيكم بالخير والهناء وكيف حالكم اليوم..خرافتنا اليوم فيها حكم وديمة الحكمة راهي باهية بالذات من الناس الي اكبر منك...لانهم ادري منك واكثر منك خبرة...
اتقول خرافتنا كان فيه شاب ايتيم وكان فقير وماعنده حاجة وكان كل مايمشي ايدور علي عمل ايدور ايدور وايروح.....
في يوم من الايام طلع ماشي مهموم مقهور ماعارف وين ايقبل..وكان في جيبه من غير سته قروش...ايام كان القرش ليه شنة ورنة..ويقضي وايجيب الحاجة....
المهم وهو ماشي قابله دكيكين مفتوح قال ف خاطره خلي انخشله انكسر فيه هالستة قروش خير ماقعدات يتشرينو في جيبي.....خش لقي شويباني امقعمز وهذاك الدكان فاضي ينفخ فيه الريح...طلق عليه السلام وقاله نبي نشري خيره دكانك فاضي مافيه شي...قاله الشويباني اني انبيع في الكلام بالفلوس...مش بضاعة..استغرب هذاك الشاب من كلام الشيباني وجاء بيطلع..بعدين رجع وقاللها باهي نبي نشري منك حتي كلام..قاله انبيع في الحكمة بقرشين طلع الشاب قرشين من جيبه وقاله هاك عطيني حكمة قاله(الامااااانة من امنك علي شي لاتخونه وان كنت خائن)
زاد طلع قرشين وقالله زيد بيعلي حكمة اخري قالله(من يتقي الله يجعل له من كل ضيق مخرجا)
زاد طلع اخر قرشين وقالله هي اقطع رقبتهم بحكمة اخري قالله(اذا اتتك فرصة لاتضيعها)
طلع هذاك الشاب من الدكان وهو ماشي في الطريق لقي اعلان من احدي الشركات للباشا فلان ابن فلان تبي عمال ومن يبي يخدم ايقدم طلب.....
مشي هذاك الشاب وقابل المسؤلين وحولوه علي صاحب المصنع وتعرف عليه وقبله في المصنع وبدا يخدم وهو كان نويشط ويفهم في كل شي وارتاحله وكل يوم ايزيد يتعلق بيه اكثر وبحكم ان الباشا كان ماعنداش اولاد بدا ايعامل فيه زي ولده..وامنه علي مصنعه وسلمله مفاتيح المصنع ويشتغل ويخدم ومقيم في هذاك المصنع....
في يوم من الايام قدم الباشا للحج وجاء موعد السفر ودع هذاك الشاب الباشا بعد ما وصاه وامنه علي زوجته وعلي حوشه وعلي مصنعه........
في يوم من الايام بعثت زوجة الباشا طلب للشاب تبيه ضروري سيب كل ما في ايديه ومشالها يحسابها مستحقة في شي او ناقصها شي للحوش ....
خش وطلق عليها السلام..وقاللها خيرك استدعيتيني بدت تتبرد عليه واتراود فيه علي نفسها وتبي منه شي لايرضاه ربي ولا العبد.....
انصدم هذاك الشاب من الموقف الي هو فيه وتفكر اول حكمة شراها من هذاك الشيباني اذا امنك احد علي شي لا تخونه وان كنت خائن.....
قاللها باهي لوسمحتي نبي الحمام شوية ونرجع قاللته باهي مش خش للحمام وقعد حاير كيف يخلص منها كيف ايدير كيف يهرب لين قابله الشباك مفتوح وكان بلا حماية .....وهناء خطر في باله الحكمة التانية الي شراها من الشيباني من يتقي الله يجعل له من كل ضيق مخرجا.....واشعبط لهذاك الشباك وهرب منه...ونجاء بجلده....
روح الباشا من الحج وجاته كل الناس اتهني واتبارك وتحمد في السلامة...الا هذاك الش ماجاهش ولا قرب من حوش الباش من هذيك الليلة........استغرب الباشا وسأل زوجته قاللها زعمة فلان خيره كانه مش مريض.....
وعاد هي من كثر مانقمت عليه بدت تاخد واتألف في الكذب عليه واتهماته وقاللته في غيابك راهو دار ودار وخنب وفسد وفي الاخير جاء ايراود فيا علي نفسي وانا صديته ولزيته وماخلت الي ما قالاته عليه....ان كيدهن لعظيم........صدق الباشا كلام زوجته عطي امر للعمال في المصنع اخر واحد ايخش للمصنع يرموه في الفرن امتع المصنع...لانه متأكد انه اخر واحد بخش هو الشاب لانه مقيم فيه...............
المهم الشاب امروح من الجيهة الي يخدم فيها وماشي للجهة المقيم فيها...لقي عرس وفرقة مالوف ايزفو في عريس عجباته هذيك الاغاني الابتهالات وتفكر اخر حكمة شراها من الشيباني كان وتاتك فرصة لاتضيعها وهذيك الفرقة مستمرة للفجر..قعد معاهم ومتمتع بيهم.........وماروحش للمصنع..
في هذيك الاثناء طلعت زوجة الباشا ومشت للمصنع وبتتاكد من موت هذاك الشاب وتشفي غليلها منه لان الباشا قاللها هويني عطيتهم امر باش يقتلوه..........وكانت هي اخر وحدة خشت للمصنع والحراس عاد بيطبقو امر الباشا زي ما قاللهم اخر واحد ايخش ارموه في الفرن.........رموها في الفرن وكلتها النار.....
الصبح سأل الباشا علي زوجته وين قالوله هي كانت اخر من خش للمصنع ورميناها في الفرن.........
ناض نادي علي الشاب وسلم عليه وقالله احكيلي علي كل شي صار في غيابي..حكاله الشاب علي كل شي......
صدقه وضمه لصدره وشكره هلبة وقالله ربي نقذك لانك انسان صادق ونزيه وامين من اليوم انتي ولدي وانا بوك وكل ما املك كتبته باسمك..وزوجه وعاش هو وياه في رخد ونعيم...
وهاذي قصتنا وان شاء الله عجبتكم وخذيتو من الحكم عبرة
هي سلامتكم وليلتكم سعيدة❤❤❤
أنت تقرأ
يوميـات سومـا المسمومه❤
Научная фантастикаضحك ونكت واشعار وحكم وقصائد ومنوعات ليبيه ومرات نكتبلكم مواقف وطبعا اسئله وصوره .....خرافات زمان
