يوميـات سومـا المسمومه❤

خرافات زمان 4

💖
🌸خرافتنا الليله🌸

💖جرد_الحاج_عمر💖 ..

الحاج عمر  الله يرحمه ويغفرله كان يعيش في إحدى القرى  قبل خمسين عام .. كان بداية حياته بناي يخلط في الطين بالمية والتبن ويبني بيه في الحياش .. لين ماشاء الله ولا صطا  بني يبني في الحياش بالطين وخبير بتستيف البلك والتلييس وكل اهل القري يعرفوه .
هذيكة السنين كانت الحالة بالهون  وكانوا الناس يفرحو  بالعزايم .. الحال حال فقر ويفرحو لما واحد منّهم يزيد عليه عويل ولا يدير عرس ويجوه الناس يهنو ويجيبوله هدية ولا يرمو عليه فلوس  ولا حد جاه ضيف من خارج القرية ودارله عزومة وعزم رجالة القرية .. ومولاة الحوش  تبعث ضوقة للجيران للنساوين والصغويرة اللي قاعدين في الحوش يشمو في التطييب ويمصو في ريقهم يستنو .

وكان زمان من عادات اهل القرى  ان الشيابين المعزومين لازم يلبسو جرود في العزومة حتى لو كان قديم .. نوع من الوجاهة والوقار وعاده استمرو عليها الناس وما في حد غيرها ..

وفي يوم جي للحاج علي ضيف  من قرية بعيدة  .. وذبحله الحاج ماكتب الله وعزم كل شيابين القرية كلهم بعد صلاة  العِشاء  ..
صلّوا الشيابين وتجمّعوا قدام باب الجامع باش يمشوا مع بعض للعزومة.. الحاج عمر قلهم استنوني بنمشي نلبس جردي ونجيكم ..
مشي للحوش ولبسه  وقعد يدور بيه هني وهني  في الدار على ضي الفنار ويسأل في الحاجة ها شن رأيك ياحاجة تبرة .. باهي ولا بالهون ..  ؟ قالتله الحاجة تبرة  وهي تقلب في شواربها : ياودي بالهون
حاشيته منسلة وفيه من لوطة شرك  .. كانت حالته بالهون وجرده قدم من ايام عرسه دخل بيه علي الحاجة تبرة جديد وفي كل مناسبة وهو لابسه لين باد..
قلها الحاج عمر ...الله غالب شن بندير ماعنديش غيره الدنيا ليل ومااظني حد بيفرزه شيابين وعيونهم بالهون واهو العيد قريب بندبر كيف بنشري جرد جديد وخلاص.. امالة سلامتك توة تو الشيابين ينشغلو عليا عطلت..
الحاج عمر من خدمته ماشاء الله يحصل في فلوس باهي لكن االي جاي ماشي عنده طزينة ولاد وبنات افام مفتوحة ماسدهم شيء سلامتهم

لبس جرده وعنقر طاقيته وتسقد  للجامع. ..اوّل ماوصل  .. تلقّاه صاحبه الحاج مبروك  وقاله كيف ماشي بنستعجلك عطلت ياحاج عمر وقت بيفوتنا العشي .. مشو وكانت الدنيا ظلام واول ماوصلو للجامع لقو الشيابين يستنو وبان عليهم الضي والحاج مبروك بان عليه جرد الحاج عمر مسلل وبايد .. قاله شني هذا ياحاج عمر شني هالجرد اللي لابسه بايد راك لبست غيره ...رد عليه وقاله ماعندي غيره من ايام عرسي واني نلبس فيه باد قداش ليه..
قاله لا ياحاج هذا يحشم ماتمشيش فيه وقلتلي امالة علاش سمانا صحاب ..تو في الطريق بنمرو من قدام حوشي تو نعطيك جرد من جرودي اللطف الناس لبعضها..
قاله الحاج عمر ياودي حتى هذا يمشي الدنيا ظلام والناس ماشية بتهدرز وتسهر وتاكل ومنو توة فاضي بيشوف لجردي..
قاله الحاج مبروك اني حلفت وهو قاعد قاعد البسه الليلة ولما نروحو اعطيهولي.. قاله الحاج عمر باهي مادامك حلفت تو مانبيش نحنتك..