يوميـات سومـا المسمومه❤

خرافات زمان 5

يمسيكم بالهني والخير ياعويلة ربي ينجيكم ويسلمكم ويصب الخير عليكم وماشاء الله عليكم 😘

#خرافتنا_اليوم_علي_السلفات

شوق ماقالوا عليهم سلفة سلوفة كلبة حلوفة حاشاكم
قالوا السلفة للسلفة زي النار في الحلفة
قالوا ماهم الا هم السلفة اما الحمي ماشية ومنتلفة
وقالوا مركب الضراير سارت ومركب السلفات حارت

المهم ياسدي بن سيد تعالوا نشوفوا عبد الله  وعلي خوت اتبيتوا في نفس الليلة ومن ليلة العرس وهم يطلعوا في الفوارق السبعة لا هذه احلى لاهذيك اطول هذه اسمح هذيك اسمن ..........الخ
مافيش من يقول ربي يهني سعيد بسعيدة تلقي غير من يقول خرب علي سعيد لين يطلق سعيدة الله يبعدهم ويفكنا سوهم
ويزرعوها في العيلة
وفي سلفات نفسهم هم من قبل يقدحوا علي بعض لبين القوا من يداعيهم

المهم هذا المرض انتقل لمرت عبد الله ومرت علي ياناري عليها راقده ريح الشيباني بس يميللها وجاي معاها لانها صاحبة حق المشكلة انه الشيباني بروحه ماعنداش حق في شي ولا يقدر يدير شي

والعزوز وبناتها السلام سلامهم والكلام كلامهم ومرت علي جاية عليها الساليطه  وجاية من يالا العين العوره
ومرت عبد الله اللي ديره معليشي واللي اديره سلامتها جابت وحطت وهي تلقاها قامت طواسي الشاهي حطتهم علي الرخامة وجت قعمزت يتكلموا بيها شهر هذاك الشي الكبير
ومرت علي يا لوكان اذوب الشحم علي ظوافرها ما قايل بيها واحد زي الزميطة نهار العيد
المهم بري يا ايام تعالي يا ايام مرت علي حملت وعمّر عليها ربي وحصلت اعويل ومرت عبد الله ماسخرلها ربي الحال العزوز توحوح عليها كيف ياكبادي قريب اشروهولها من السوق وزيدك يازايد العزوز لما كانوا الزوز فاضيات تقول الكنة اللي بتعطل بالصغار حوش بوها يراجي فيها شن الفايدة منها يعلفوا فيها زي الزايلة
وربي احميدي مرت علي شد معاها الحظ ودوبولها ملحتها وشوق مادارولها والشابة علي فم ساكت الشيباني يقول للعزوز حرام عليك اللي اديري فيه في المراة خفي عليها ياعزوز تقوله انت مكانك المربوعة هذه دوة نساوين شن دخلك بيها وبعدين انا شن درتلها

وهذيك مرت عبد الله تتقل مع بعضها البعض وكان تزمط ريقها تموت من السم اللي فيها

وفات الوقت ومرت علي ولت في عيلة ينقزوا بحداها خمسة ومرت عبد الله حتى عويل لا مكاتيب من ربي

ناضت مرت عبد الله قالت للعزوز قوليلها تعطيني واحد ومشوا قالولها هاتيه الولد اللي جبتيه الاخير اعطيه لسلفتك اهو انتي عندك قسمك وهي مااعطهاش ربي طبعا مرت علي ماارضتش تعطي كبدها وقعدت ايام وليالي وهي تبكي من يفرط في ضناه وبره ايام تعالى ايام طبعا ماخدوشي منها الولد وقفلها الشيباني قاللها بالدين واليمين ماهي صايرة واسكتلك هلبة
لكن مرت عبد الله مابردتش وقاعدة تقدح وبرا ايام تعالى ايام وجي عرس في العيلة ومشوا صدارات الزوز زمان كانوا لازم يصدروا والصدرة ليها شنة ورنة وتلت ارباعها ذهب طبعا الشيطان عبى راس مرت عبد الله وقاللها قولي انه مرت علي خنبت فردة اسواري وهي الفردة بايعتها شهدت عليها الناس في هذاك العرس والشابة قعدت تبكي وكلهم حايرين كيف بتخنبه وكيف صار قالت لهم معاش القيته وانا سواري ونعرفه هو اللي في ايدها يهديك في طولك في عرضك قالت شي ليا
وهي فاتت عليها حاجة انه السورات مختلفات تحسابهم لما جابوا الكساوي جابوهم زي بعض النقشة تختلف وين قارنوها بالفردة متعها قالت لهم ملحوم مغيرتله هي النقشة الفوقية ملحومة فيه قالولها استهدي بالله طبعا راجلها اوقف معاها والعيلة كلها وقفت علي رجل وحدة وطايحة المزال بيطلقوها المشكلة ظلم وطلعوها خنابة وجابوا بوها قالوله ياحاج هكي فيه وهكي فيه قاللهم طلعوهالي وهذا جردي وانا بوها  لكن ماتطلعش بنتي من بينكم خانبة غدوة تجيبوا السوارات وتنادوا علي خمسة من الناس منكم يمشي معاي لسوق الذهب وخلي يشوف النقشات واللي ملحوم واللي مخنوب ويطلع حق ربي

ماهو الراجل عارف بنته مااديرهاش مربيهم علي العين المليانة وموكلهم الحلال صغاره مايخيبو حلال ثامرة وعامرة ضنوته

والصبح اصبح وربي افتح وصلوا الضحى وتلاقوا وسوق الذهب افتح ومشي عمك الراجل وخمسة من الناس لسوق الذهب وداروا علي السوق كله بهادوكم السورات وطلعوا مش ملحومات وطلعت النقشة صح وفيه واحد في سوق الذهب ولد سوق وطلع لهم حتى النقشة هذه امتى خدموها وقال لهم راه فردة السوار الثاني عندي وتلاتة مرات نبيع فيها وتوليلي لكن من مولاته مانعرفشهاش وتبعوا القصة وطلعت ام مرت عبد الله هي اللي بايعاته في السوق ومرت علي طلعت بريئة و روحت مرت عبد الله وطلقوها ماهي خلاص معاش عندهم كيف بيدافعو عليها شهدت عليها العيلة كلها كذابة طيابة العيش الني قتلها السم وخرب عليها الحسد هي وامها
وعاشت مرت علي في عز ودلال خادمتها نيتها والظلم حار ويولي علي الظالم

وهذه خرافتنا الليلة ان شاء الله عحبتكم

اسفه عالتاخير 💔