#الحب_والغفران
الفصل الثاني
كل يوم نفس الحلم
كل يوم نفس الشخص نفس الظلم
كل يوم نكتب لين جف القلم
كل يوم في اشعاري انزيد زيادة
كل يوم نعلم شي مالي علم
كيف من رمى رميه وخاب ازناده
كل يوم مانرقد شديد الالم
كيف من انضرب جوى ف جوفة افاده
كل يوم في حربي بعيد السلم
وهو المنتصر نلقاه كيف العادة
كل يوم يا هاجرني
كل يوم تخطر عماتك تقهرني
كل يوم نطلب يا الله انصرني
بالصبر نسيني كحيل اهماد
هلي على غر جفا ونحرني
علطين بله مكر فيا زاده
كل يوم هو هو
كل يوم مايرحم ايزيد بقوة
كل يوم يصفالي عذابي جوا
ابها ينسجم تمت احدود مراد
كل يوم نفس الكاس
كل يوم نفس الداء والدواء والضمادة
........................
انا.. قالي وشنو فيها كان زوجوك فقلت ليه وانت واللي صار بينا رد عليا قالي متخيلة اني بنتزوجك بعد اللي صار بينا تبقي تحلمي كانت صدمة لي وزاد صدمني لما قلت ليه اللي صار بينا عارفه انه صار معاك انت بس وانك كنت تعلم فيا عشان في الزواج ماتزعلش مني تغير وجه لوجه اول مرة نشوفه تخيل شنو رد عليا
وسام بحزن عليا .. شنو
انا .. قالي باستهزاء عادي اعتبريهن دروس مجانية لزوجك بدل ماياخذك ابيض قلت ليه حرام عليك قالي لا مش حرام عليا ماناخذش وحدة سلمت روحها ليا وعادي تسلم روحها لغيري ومن قال اصلا اللي اديري فيه ما اديريش فيه حتى تو مع غيري صدمني كلامه وكيف شكك فيا هكي وهو عارف اني كنت جاهلة في كل شئ يخص المشاعر بين الراجل والولية وهو اللي علمهن ليا بالحرف
وسام .. عليك حقارة وشنو رديتي عليه
انا بدموع حسرة .. تحسبت ربي فيه وقلت ليه لولاك انت عمري مادرت هكي حبيتك بصدق ومابحتت ولا رفعت عيني في شاب غيرك لكن تعرف الحق مش عليك الحق على البريئة الساذجة الحمارة (حشاكم ) اللي ماتعرف في الدنيا شئ وسلمت ليك حياتها تشكلها زي ماتبي لكن ماتنساش (داين تدان ) وبعدها ممكن باسبوع او اثنين انخطبت لعادل والدكتور سيب المصحة وسمعت انه خطب وجيت انت للمصحة وتعرفت عليك
وسام .. ونا نقول ليش كنتي جافة معاي وماتعطي فيا ريق بكل في البداية
انا.. لاني سكرت خلاص وقلت معاش نكون الساذجة اللي ينضحك عليها اكثر من مرة والدكتور تجنبته نهائي وهو اصلا عدى من المصحة قبل ماتجي انت بحاجة بسيطة وزاد قهرني ووجعني حتى هو لما خطب وعلمتها من ممرضة معانا لكن وقتها تعرفت عليك انت و كنت حنون معاي وحسيت في فرق بين الحِن الصافي والحِن بتاعه هو وبعدها تزوجت ودسيت سري جوا قلبي
وسام .. نقولك حاجة زهرة
انا.. شنو
وسام بتأكيد .. مازلتي تحبيه
انابتوتر .. شنو
وسام .. مش منتبهة على روحك تحكي بوجع حتى سنين زواجك مانسنهنش لك
شكلهن لان لو كرهتيه كنتي نسيتي وحتى وانت تحكي في وجع لكن فيه حب واضح
انا.. مش عارفة ممكن الحِن والاهتمام اللي شفتهن معاه في بداية حياتي ماشفتهنش مع واحد اخر حتى مع عادل لاني مانقدرش نقول عليه انه كان زيه او حتى ربعه رغم ان عادل حنون حتى هو
وسام .. بس ماقلتيش لي سبب الكسور
انا .. جاياتك في الدوة
نعرفكم بيا قبل
انا زهرة عمران عمري 24 سنة كنت متزوجة من ستة سنوات وزي ماشفتو اطلقت وتو نحكيلكم ليش اطلقت عندي ثلاثة خوت عزيز الكبير متزوج وماعنداش عيال وبعده عثمان خاطب وبعده عطية وانا اختهم من بابا وبعد ماتما عمري سنة توفت ماما بسبب سرطان الثدي وجابني لماما خديجة وقبلت بيا بس خوتي عمرهم ماقبلو بيا وماشافوش فيا غير وحدة بتقاسمهم في الورث وحَنت عليا ماما خديجة لكن كانت قليلة حيلة قدام خوتي وبابا توفى ونا عمري خمس سنوات بيش نقعد بالمزبوط تحت رحمة اللي كنت نسحابهم خوتي بطلوني بعد ماخذيت الشهادة الاعدادية رغم تفوقي وقريت معهد تمريض وحصلت شغلة في مصحة وتعيين في مستشفى وكنت نصرف من راتب المصحة وراتب المستشفى نخلي فيه حتى لما تزوجت راجلي كانت ماديته مرتاحة هذا ليش خوتي شافو فيه عريس ممتاز شكلي عادي طولي عادي عيوني بنية لاهن كبار ولاهن صغار ورموشي كثيفات ووجهي دبدوب وحتى يضعف جسمي وجهي مايضعفش معاه وجسمي كان متناسق مافيا شئ يميزني الا شعري الاسود الناعم والطويل بكل لنهاية رجليا وبياضة جسمي وصفاها تقول حليب ونقرة زين واضحة وطبعي هادية وفضولية واجد للتعلم اي حاجة ولما نحب نحب بقلب مهما دار فيا الشخص
