#الحب_والغفران
الفصل الثامن عشر
من قالك يغفل عليك البال
من قالك مانك عليا غالي
من قالك يزهى بلاك الحال
من قالك طيفك بنومي زال
من قالك نقدر بلاك انجالي
من قالك عمري بلاك اينال
من قالك مانك عزيز وغالي
...............
انا بصدمة .. انت
حسام .. صباح الخير يا نصي
انا
الله قديش ليا ماسمعتها منه قاعدة نفس المفعول ونفس التأثير على قلبي وقاعدة بنفس النبرة ونفس الحب
حسام .. كيف مافيش صباح النور
انا.. صباح النور ... انت بايت هنا
حسام .. اه ...زهرة
انا.. نعم ... انديرلك كابتشينو معاي
حسام .. ياريت
جبد حسام كرسي وقمعز عليه وهو يستنى فيا ونا قلبي يدق ولولا ضجيج بخار الماكينة في الكباية كنهدا سمع صوت دق قلبي الواضح والعالي مديتله الكباية وجبدت كرسي مقابله وقمعزت عليه ونا نسيت اني جعانة لكن هو صبى فتح الثلاجة وطلعلي طرف شوكلا ومده ليا
حسام .. ماكليتي شئ من غذاء امس
انا.. شكرا
حسام ..زهرة انا الفترة اللي فاتت ماحبيتش نحكي معاك علشان امتحاناتك لكن تو كملتي وان شاءالله موفقة
انا.. ان شاءالله
حسام .. زهرة نا مازلت نحبك او بالاصح عمره حبك ما نقص من قلبي نحبك يا زهرتي لا انا نعشقك وكنتي ولازلتي نصي
انا.. بس انت جرحتني جرح كبير
حسام بندم .. والله عارف ومتنمي تعطيني الفرصة مش عشان تسامحيني لا عشان نبيلك قديش نادم وقديش نبي نعوضك علي شفتيه بسببي بس فرصة
انا .....................
حسام .. نصي حبيبتي ماتسكتيش هكي ردي عليا قوليلي انك بتعطيني الفرصة هذي
انا.. خايفة خايفة نعطيك فرصة وتخذلني
حسام ..عمري عمري مانخذلك انا كنت ضحية حب قديم وغدر صديق ورفيق عمر والله ماكنت درت اللي درته معاك ولا حتى خذلتك انا كنت نعد في الايام والشهور بيش توصلي لسن القانوني للزواج
انا.. نشرب وناكل في الشوكلا وساكتة ونفكر في كلامه
حسام .. زهرة انتي بنت عمي وحتى لو ماكنتيش بنت عمي قاعد زي مانا تي انا كنت كل جية لليبيا اندور عليك في المستشفيات والمصحات ماخليتش مكان حتى فاتح جديد الا ونا نسئل عليك
تعرفي مرة وليد قالي حكى معاك وعرفتي الدكتورة غنى وقتها سعادتي كبيرة قلت اكيد لما نقولك اسمها تو تعرفيها خصوصا ان اسمك مانعرفاش وقتها لانهم كلهم يحكو معاي مسمينك ضيفتهم وحتى لما سمعت اسمك قلت اكيد في زهرة واجد مش معقول مافيش زهرة الا انتي وماخطرش عليا بكل نسئل على اسم باتك
انا.. اصلا وليد هو اللي حكالي قصة سراج
حسام .. عارف وهو مايعرفش انه خدمني بدون مايندري رغم ان وليد مش بالساهل يطلع سري لكن شكل سرك باتع عليه
انا.. شفت يا حسام كيف ربي عوضني بخوت بدل خوتي الاولين
حسام .. الحمدلله ومابعدتيش على عيلتنا
انا.. الحمدلله اني طلعت من عيلتكم
حسام .. شنو يا زهرة بتعطيني الفرصة
انا.. نعــ
عفاف.. صباح الخير
انا وحسام .. صباح النور
عفاف.. نايضين بدري شكلكم
انا بضحكة وصبيت نبوس في راسها .. اكيد بعد النوم اللي رقدته امس اكيد بنوض بدري
عفاف بحب .. نوم العوافي يا قلبي حتى انتي ماكنتيش ترقدي واجد بسبب امتحاناتك
حسام .. نغار ياعفو راه الحب هضا كله لزهرة بس
عفاف وحضنت راس حسام لانه مقمعز .. انت عارف غلاوتك ماينافسك فيها واحد من عيالي انت كبيرنا وولد كبيرنا الله يرحمه
حسام .. ربي يحفظك يا غالية
انا باستفهام .. ليش انت ووسام تنادو فيها عفو مش عمتي مثلا
حسام .. لان عفو عمرها صغير مش كبير لدرجة انقوللها عمتي راه لما جابت زياد كان عمرها 18 سنة بس
انا باستفهام .. صح ماما عفاف عمرها صغير
حسام .. الفرق اللي بيني وبينها 12 سنة بس فعفو حلو عليها عشان لو قلنا عمتي حنظلموها
