#الحب_والغفران
الفصل الخامس
ياعين لا تلتامي .. انا والياس من صغري رفيق احلامي
لو كان تذرفي .. انا عاذرك يا عين ياما ريتي
من يوم يومك عالاحزان خذيتي
وين مامشيت مسكرة قدامي
وحتى اللي دوم بوفاء غاليتي .. فارقك نسى صوبك وقال قسامي
ياعين ليش انلومك .. وانت خذيتي عالشقا من يومك
والياس بختك والبكا مقسومك
وفي الصوب ديمة منكسات اعلامي
وبالموح ديمة ماطرات غيومك
والفرح عمره ماسكن ف ايامي
.........................
وسام ............
انا.. رد عليا ماقبلونيش صح وجك هكي يقول
وسام بضحكة .. وهما يقدرو مايقبلوكش
انا .. خزيه عليك قلبي طاح بين كرعيا
وسام .. سلامة قلبك قبلوك يازهورة والايام الجاية حنجيبلك جدول محاضراتك
انا .. به بس امتى بنبدا
وسام .. الاسبوع الجاي لا اللي بعده
انا.. به الحمدلله نكون هضاك الوقت حولت جبس ايدي وتعدلت مشيتي
وعادل جابلي السيارة كيا سبكترا حلوة وطبعا نا نعرف نسوق لان عادل علمني السواقة وطلعلي حتى رخصة ورغم اني ماسقتش ونا معاه لكن كانت عقلية عادل ان الولية لازم تتعلم تسوق حتى لو ماعندهاش سيارة للضرورة وربي يبارك فيه اهو لقيتها ومشن الايام وحولت جبس ايدي وتميت الحمدلله بشرتي ردت صافية زي قبل وحولن اثار الضرب كلهن بسبب المرهم اللي جابه ليا وسام وزدت ارتبطت بامه وخواته وتنسيم تمت عقلي تهبل عليك بنوتة حانطة وبدت الجامعة وخشيت ليها وحسيت روحي زي الغريبة لاني حتى لما تزوجت ديمة محيطي محدد وكان بخوات عادل وامه وماعنديش اختلاط بباقي العيلة وحتى اصلا شنو نحكي معاهم مانعرفش
بنت .. انتي جديدة هنا
انا .. اه اول يوم
بنت .. هديل صالح
انا.. اهلين بيك زهرة عمران
هديل .. حتى نا اول يوم عندك صاحبات
انا.. لا ماعنديش لاني كبيرة في العمر راه
هديل .. كيف كبيرة شكلك مايعطيش كم عمرك
انا باحراج .. 24 سنة
هديل .. العمر كله مش كبيرة واجد
انا.. على القراية كبيرة
هديل .. تصل متاخرا خيرا من ان لاتصل
انا.. عندك حق
هديل .. حتى نا عمري 20 سنة
انا.. حتى انتي ظروف منعاتك
هديل بضحكة .. لا غير عاودت ثالثة ثانوي اكثر من مرة
انا .. معليش على كلمتي عاودتي ثالثة ثانوي اكثر من مرة كيف بتقدري الطب
هديل..ماهو انا عاودتها مش عشان غبية في القراية عاودتها عشان نجيب مجموع يخششني الطب
انا.. اه ان شاءالله ربي يوفقك
هديل .. تقبلي صحبتي
انا.. ليا الشرف
هديل .. شوي وحتجي صديقتي نسرين وجارتي في نفس الوقت حتعجبك حتى هي
انا.. عادي نتعرفو ولايهمك بما انها صاحبتك
هديل .. تمام
وجت نسرين وتعرفنا على بعض واول مرة نحس بشعور غريب شعور ان يكون عندك صاحبات كنت ايام المدرسة لما نشوف مجموعة بنات والله حتى بنتين يحكن مع بعض كنت نتمنى اني نكون زيهن لكن كان خوفي من خوتي يمنع فيا طبعا نسيت نقوللكم اني اليوم بنمشي لحوش عمتي عافية عشان بتجيب ماما خديجة عندها بيش نفهم منها صح الكلام اللي قاله صاحب بابا او لا لاني مشيت ليه انا ووسام واكد الكلام اللي قاله عطية ان بابا لما تزوج ماما كان عمري وقتها شهرين او اكثر وبابا عشان كان خايف عليها من هل راجلها الاول عدى للسجل المدني يعرف فيه واحد وبمعنى اصح زور شهادة ميلاد باسمه هو انه الاب طبعا هضا اللي قاله ليا عمي سليمان صاحب بابا عمران الله يرحمه وروحت من الجامعة على حوش عمتي عافية ولاقتني بالترحيب وفرحت ليا ان حالي كويس وكانت بين وقت ووقت ياتتصل بيا ياتجيني في حوشي
وخشيت للحوش القيت ماما خديجة تغمرتها وقعدت هي تبكي ونا نبكي ليا فوق الشهرين ماشفتهاش ولاكلمتها
