#الحب_والغفران
الفصل الرابع
مهما كان ومهما عليا يكثرن الاحزان
وحتى بعد مني خذوا المرجان
سيور نلقى فالحياة ياقوت
بروحي بروحي
انداوي زماني وعلتي وجروحي
وسيور ننسى وناس كانوا روحي
ونبني انعمر من جديد بيوت
عين وطارت
كان المحبة انتهت وانهارت
سيور ننسى كم ظليمة صارت
وادير عيني من جديد بخوت
مصير الماضي نحكي عليه انكان وقتي فاضي
واللي ارضيها الله بيها راضي
والقسم قسمي كان لي منحوت
فترة زعل وتفوت
..................
انا.. بندور على اهلي اكيد عندي اهل
عادل.. ونا معاك بس كيف بتبدي
انا.. نمشي لماما خديجة نسئلها بالك بابا مخلي اي ورقة ادل على هوية اهلي لو طلع الكلام اللي قاله عطية صح
عادل .. به انتي عارفة منو صاحب باتك
انا.. بابا الله يرحمه ماعنداش اصحاب الا واحد بس عمي سليمان
عادل .. تمام صحي وبعدين انديرو كل شئ
انا.. ربي يحفظك يارب ماخيبت ظني فيك
ومشى اسبوع وعادل مهتم بيا ووسام يتصل يطمن عليا طول الوقت واليوم جاي بيفكلي الغرز وقال ان عنده موضوع مهم بيحكيه ليا وعادل كل يوم يطلع يدور في حوش كويس للايجار بنفس سعر اللي ماجرين بيه الناس عشان هذي استطاعتهم واليوم مطلعش لانه عارف ان وسام بيجي وجاء وسام وبعد مافكلي الغرز
وسام .. بنقوللكم مازالتو ادورو في سكن
عادل .. لقيت لزهرة ومناسب ليها لكن ساكنين فيه ناس وقاعد ندور للناس في حوش بسعر اللي مأجرين بيه
وسام .. به واللي يريحكم من الوجيج هضا كله
عادل وانا.. ياريت
انا.. عادل ليه اسبوع وهو يدور
وسام .. نحن حوشنا كبير وماحد يقطع عليا كلامي (لانه فطن بيا بنحكي ) نكمل قبل نحن حوشنا كبير وفيه في السور حوش صغير كان لخوي الكبير متزوج فيه وتفارق هو ومرته وسافر ومايجيش الا بعد وين ووين وحتى لما يجي يقعد معاي في دارنا اللي كانت ليه قبل مايتزوج رغم انه عنده شقة في الدور الثالث ليه المهم فتحت فيه باب خارجي بيش تخشي وتطلعي براحتك مع الباب الداخلي عشان امي ادير بالها منك وانت اديري بالك منها وتونسن بعض بما ان خواتي الاثنين متزوجات ومافيش حد الا نا بس والحوش صغير وآمان ليك بالذات من لسانات الناس ونحن لما يسئلونا الجيران نقولو قريبتنا عشان ماتاخذهاش الالسن
انا وعادل .. بس بشرط
وسام بضحكة .. واحد واحد السيدات اولا
انا.. بس بندفع ايجار
وسام .. وانت يا عادل
عادل بضحكة .. نفس اللي قالته زهرة
وسام .. تمام بكل واصلا انا ماعنديش مانع انها تدفع ايجار
انا.. تمام متفقين معناها ممكن عادل يمشي يشوف الحوش
وسام .. اكيد وشنو المانع
عادل .. خلاص اذا ماعندك شئ نطلع معاك تو
وسام .. هي خصوصا ان زهرة لازم ترتاح بعد فك الغرزات
وطلع عادل ووسام وقديش فرحني اقتراح وسام حسيته حلي جميع المشاكل وهذا السكن وارتحت منه ومازال اثبات هويتي وبعدها كل شئ ساهل
وبعد وقت جاء عادل وحسيته فرحان
