#الحب_والغفران
الفصل الثاني عشر
قوليلهم ياشمس وين اتباتي
مايقلقو بالك العام ايواتي
قوليلهم يستنو
بالك بعد طول الرجاء انتهنو
ويبرم فلكهن كيف مانتمنو
وساعة الفرج من بعد عسرة تاتي
.............................
عطية.. نبيك
انا .. شنو
عطية .. نبيك يا زهرة بما انك مش اختي ليا الحق فيك
انا بضحكة وجع.. انت سامع روحك شنو تقول
عطية .. اه ويعلم ربي قديش دورت عليك
انا .. بعد شنو بعد ماعزقتوني في الشارع بدون لاشفقة ولا رحمة لو كنت قطوسة كنتو حنيتو عليها وماشفعتش السنين اللي عشتهن بينكم تي نا لما جابني باتي عمران كان عمري سنتين وطلعت منكم عمري طمنطاش معقولة سطاش سنة ماحركوش فيكم شئ لارحمة ولاشفقة وتو جاي تقولي نبيك اكيد انت مش بعقلك تو
عطية .. ممكن وقتها كنت مش بعقلي وماشي على هوا خوتي لكن تو لا انا بكامل قواي العقلية واذكرت كيف كنتي تحني عليا وكيف كنتي تقسمي في راتبك معاي لما مصروفي مايسدنيش
انا.. وكيف كنت قاسي معاي صح عمرك ماضربتني لكن عمرك ماحزيت عليا انا كنت حنونة عليكم كلكم اللي يمرض منكم نسهر عليه الليل كله نين يصح واللي جعان يلقى وكاله واتي وحاجاتكم كلها نظيفة ودبشكم محدد ونظيف ومعاها شنو حصلت منكم ضرب مهانة وذل خليتوني ضعيفة قليلة حيلة خليتوني تحملت اللي مستحيل اتحمله بنت في عمري 16 سنة لما عزقتوني في الدنيا نعافر فيها بروحي وانتم نسيتو اني مانعرف شئ فيها ماسئلتوش وما اهتميتوش المهم اني بروحي وماعنديش صاحبات كأن الصاحبات هنا اللي بيضرني وتو جاي تقولي تبيني
عطية .. بدل ما قاعدة عند الاغراب
انا.. ماهو حتى انتم اغراب عليا على الاقل الاغراب اللي مايعرفونيش الا من ثمانية شهور حضنوني واهتمو بيا وبراحتي وعمرهم ماغلطو فيا ولا اتهموني بشئ مش دايرته ولا يدورو في اي سبلة بيش يضربوني عليها (وانا نرعش مع بعضي نحس في روحي ببنهار ) تي حتى الراجل اللي طلقني طلع فيه رحمة اكثر منكم ( وبعيطة وبصوت عالي ) حرام عليكم شنو درت ليكم حرام عليكم
خش وسام وعميمة حواء يجارو وجت عميمة ضمتني ونا نبكي ونرعش مع بعضي
وسام .. كنها شنو درت ليها
عطية .. مادرت ليها شئ والله
وسام .. به معليش ممكن تطلع وتعال مرة اخرى لان زي ماتشوف حالها صعب انها تكمل اي كلام
عطية بقلة حيلة .. به
وطلع عطية ووسام طلع جاب ليا ابرة مهدئة عطاها ليا وارتحت عليها ومانندريش على روحي الا مع الفجر لقيت روحي في دار البنات وحذاي ايناس وعميمة حواء راقدة على سرير اريج
ايناس بحب.. كيف حالك زهورة تو
انا..بخير الحمدلله
ايناس .. الحمدلله يارب خليني نكلم وسام
انا.. خليه راقد حرام تنوضيه
ايناس.. وسام ماغفاش حتى دقيقة
انا .. به بالله نوضي عميمة عارفاتها ماترتاحش الا في دارها
ايناس .. اصلا نا بنوضها للفجر مرة وحدة
انا.. حتى نا نتوضئ للفجر وتو نطلع لوسام
ايناس.. ارتاحي اكيد تاعبة
انا .. لا حالي كويس صدقيني
ايناس .. به براحتك
ونوضت ايناس عميمة وبعد ما اطمنت عليا خشت دارها ونا توضيت وصليت وايناس صلت ورقدت لانها كانت نايضة بسببي وقعدت في الصالة نستنى في وسام يروح من الجامع
وسام .. السلام عليكم
انا.. وعليكم السلام
وسام .. كيف حالك تو زهورة
انا.. الحمدلله بخير الحمدلله
وسام .. كنك يا زهرة شنو صارلك
انا .. حاسة اني تايهة حاسة بوجع في روحي
وسام.. قال تعالى ( لاتقنطو من رحمة الله)
انا.. حاسة ان المشاكل معاش تبي تكمل من عندي وكأني خزان للهم
وسام .. قال تعالى ( من يتق الله يجعل له مخرجا )
انا .. ونعم بالله
وسام .. شنو يبي منك عطية واذا بيضايقك الموضوع فوتيه
انا بتنهيدة .. يبيني
وسام بصدمة .. شنو
انا.. يبي يتزوجني
وسام بعصبية .. اكيد هضا مش طبيعي
انا.. حتى نا قلت هكي
وسام .. كيف من باب كنتي اخته وتو يبيك زوجة
انا.. ماتركزش عليه اكيد في حاجة جادة غير توتري ماخلانيش نعرف شنو اللي صاير
وسام .. قصدك بتشوفيه ثاني
انا .. وسام عارفة انك خايف عليا زي ايناس واريج لكن عطية عمره مايخوف انا متاكدة لانه عمره ماضرني صدقني
وسام بتنهيدة .. حنثق في رايك يا زهورة
انا .. وسام
وسام .. نعم
انا.. ليش ماسئلتنيش على حسام
وسام .. نبي نسمع مبرر وكلام حسام قبل بيش نقدر نفتح الموضوع معاك نبي نعرف ليش دار فيك هكي لان حسام عمره ما كان واطي عمره ماكان خداع عمره ماكان هكي حسام قدوة للشباب العيلة كلها مازلت مش مصدق
انا.. ماتظلماش يا وسام حسام مظلوم حتى هو
وسام برفعة حاجب .. كيف
انا.. مانقدرش نقول شئ لكن اليوم عرفت حسام ليش دار فيا هكي فاصبر نين تسمعه قبل
وسام .. سامحتيه
انا .. مش عارفة ...( بنغير الموضوع ) اه خطرها
وسام .. شنو
انا.. اتصلت بيا عمتي عفاف يوم لمة اريج وماحصلتش فرصة نقولك
وسام .. خير ان شاءالله
انا.. قالت ان ماما خديجة كلمتها وقالت ليها ان خوها بعد بكرة مروح
وسام بفرحة .. الحمدلله ماطولش اكثر من هكي
انا.. بس خايفة
وسام .. عمرك ماتخافي ونا وضنا عمي معاك وحتى حسام مستحيل يرضى تصيرلك حاجة بس خايفة من شنو
انا.. خايفة انهم مايقبلونيش
وسام .. ماتغير شئ نضيفوك على اسم باتي وانتهى الموضوع وتبقى منا رسمي
انا.. بارك الله فيك
وسام .. وهضا مش كلامي نا بس حتى عمتك حواء وحسام قبل مايعرف من انتي
انا.. يعني شنو تغير بعد ماعرفني نا من
وسام بضحكة .. ماتغير شئ غير بتكوني بنت عمه بس
انا .. ربي يسهل .. هي تصبح على خير الحمدلله ان اليوم جمعة
وسام .. فعلا هيا تصبحي على خير يادوب نرقد بيش نوض للجمعة
