#الحب_والغفران
الفصل الرابع عشر
خوك خوك لايمكن اتلاقي كيفه
هو فزعتك وقتا اتجيك القوم
ولا لك طمع في سيف خاطي سيفه
اتسله سوى ظالم سوى مظلوم
بلا خوك ماتاجد حياة شريفة
انقولك ولاتقدر اعناد خصوم
.........................
رائد بهدوء.. شنو اللي خلاك تصبري وتسكتي على هضا كله
انا بوجع .. قبل مانتزوج عادل كانت لي علاقة مع دكتور معاي في المصحة وهو كنت نشوف فيه كل شئ وعطاني اللي عمري ماحسيته ولا عرفته حتى من اللي كنت نساحبهم خوتي عطاني الحِن والاهتمام لكن سيبني بعد ماجرحني جرح كبير
زياد حاول يبان هادي .. بس عادي يعني مش انتي اول بنت ادير علاقة لكن شنو علاقتها بتحملك هضا كله
انا .. لان عارفة ان اي رابط بين شاب وبنت حرام طالما مافيش رابط شرعي لكن لاني كنت متعلقة بيه واجد نسيت ربي ونسيت ان علاقتنا حرام وقلت اكيد ربي يعاقب فيا بذنبي اللي درته لاني لو عصمت نفسي وحافظت على قلبي للي بنتزوجه راه ربي مارزقنيش بعادل
رائد.. لهدرجة تحسي في ذنبك كبير
انا.. اكيد لاني متأكدة ان الحب مش حرام لكن لما يكون بالحلال ربي يبارك فيه اكثر
وائل .. بس تحملتي واجد ومش عارفة كيف راجل يمد ايده على ولية قليلة حيلة
انا.. عادل مكانش سئ وبدلالة اللي داره معاي بعد ماعزقوني خوتي
زياد بعصبية .. معاش تقولي خوتي اي خوت اللي يعزقو اختهم عشان اطلقت ومعاها حتى بعد ماعرفو انها مش اختهم عزقوها لا رحمة ولاشفقة ولولا ربي طيحك في وسام وعادل انسان كويس ممكن راك ابصر في اي مصيبة كنتي
وليد.. نحن بس خوتك
رائد.. وهما احسابهم معاي
انا.. بالله عليك رائد ما ادير حاجة انا تحسبت فيهم ربي وربي ماينساش حد (يمهل ولايهمل)
رائد.. ونعم بالله
وليد.. بس اللي داروه فيك ماينسكتش عليه
انا.. ربي كبير وبعدين على خاطر ماما خديجة ماترضوش للمرا اللي حاولت تكون سندي قدامهم تتعب بسببنا
عفاف.. خلاص يا شباب ديرو زي ماقالت اختكم خلوها على ربي
وليد.. لكن عطية يبي قرصة وذن
وائل.. اشمعنى
وليد.. من فترة جاء لزهرة ويبي يتزوجها
زياد .. شنو
رائد بعصبية .. لا هضا ماينسكتش عليه
انا بهدوء.. غير اسمعوني بس عطية ماقالش هكي الا في حاجة خلوني نعرفها لو مهمة سامحوه ولو دوة زايدة انا انجيبه لكم وخوذو حقي
وائل بعدم اقتناع .. باهي اللي تبيه
انا.. وبالله عليكم عادل مايستاهلش تعاملوه معاملة مش كويسة ونا سامحته من قلبي
زياد .. كوني مطمنة زهورة عادل في الاخير طلع راجل وطالما طلعت عصبيته مرض نفسي ماعندنا مانديرو
وائل.. بس ليش مارجعتيش ليه لما تعالج
انا.. انا وعادل عندنا حاجة في جيناتنا ماتخليناش نحصلو عيال لكن لو كل واحد فينا تزوج واحد ثاني نضنو عادي هذا كان اهم سبب بعد اني قلت بيني وبين روحي معقولة ربي ماغفرليش ذنبي بعد ستة سنين من العذاب
رائد.. ربي قال ( والذين اذا فعلو فاحشة او ظلمو انفسهم ذكروا الله فاستغفرو لذنوبهم ومن يغفر الذنوب الا الله ولم يصرو على مافعلوا وهم يعلمون ) وقال تعالى ( ومن يعمل سوءا او يظلم نفسه ثم يستغفر الله يجد الله غفورا رحيما )
انا.. صدق الله العظيم والله لتو مازلت نستغفر وندعي لربي يسامحني
رائد.. قال تعالى (قال رب اني ظلمت نفسي فاغفر لي فغفر له انه هو الغفور الرحيم )
انا .. ونعم بالله
وائل.. من سماك زهرة
انا .. مش عارفة
عفاف .. باتك الله يرحمه
انا .. كيف
عفاف.. باتك كان ديمة متمني بنت تجيه وكان ديمة خاطره يسمي زهرة واكيد قال لامك على الاسم لانه ماكانش يعرف جنس البيبي خصوصا ان امك كانت في بداية حملها بيك ممكن اسبوعين بس
انا.. اه
رائد.. حلو اسم زهرة وانتي حلوة زي الزهرة
انا باحراج .. شكرا
