Maia bini ngandung Iban kelia bepenti. Bini enggau laki maioh utai enda tau kerja mali anak menawa. Reti nya anak timpang pendiau baka chachat, buta enggau isu. Pengawa ke enda tau amat dikerja orang ke empu bini ngandung iyanya munuh jelu. Munuh orang tau ngayuka anak tau serang. Nya kebuah ba ensera Iban betara sida ke benama Keling ngayau maia bini iya Kumang ribat. Mechah ka telu enda tau maia bini ribat laban nya ngayuka anak tau buta. Megai utai timpang ngayu ka anak chachat. Enda tau malu pala, netak dilah jelu, laban mali anak isu. Enti enda ulih di kelaung ngereja pengawa, orang bukai asuh dulu udah nya baru tau ditangkan orang ke ngibun bini ribat. Bisi sekeda mantangka paku ba pintu awak ka anak lekat enda mati lulus. Tang maia beranak paku nya mesti dibuka takutka anak lekat enggai pansut, ngenusah iya ke beranak.
Maia bini ribat Iban selalu belelang nunda pengawa Keling. Sida ngiga utai ke dketengukka bini. Laban bini ribat selalu nyera. Sida maioh utai diketenggu deka dipakai. Bisi sekeda deka makai jelu jangkat, bisi deka makai asam, bisi deka makai batu lemak. Tetengguk ka jelu jangkit nya ngayuka anak lelaki. Tetenggukka asam ngayuka anak indu. Bini ribat tetengguk ka utai nyelai ari orang bukai baka batu lemak nya ngayuka anak deka idup nyelai lebih ari orang ba pengidup. Ngayuka anak deka pintar ngidupka diri.
Orang ribat selalu betangas, steam bath ba jako kemaiaritu sampai maia sida udah letu tubuh ambih pantang udah beranak. Sida milih daun mambung, daun lia enggau tepus. Sida beunsut enggau lia awakka angat tubuh. Sida mega sedia ngaga pedilang ba bilik endor bini bekindu. Unggun ditugungka maioh dulu sebedau bini beranak kena bekindu. Bisi sekeda malu tekalong dulu nyendiaka bedong indu ke baru udah beranak. Keba jako Iban, nyindir laki ke enda nemu sedia ngaduka semoa pengawa. Bini beranak baru malu bedong. Dekat nak kahwin baru besunat, ko Melayu.
Lebuh indu beranak sida nuntungka tawak ngasuh bala bidan sida serumah datai nekan orang ke beranak lalu bepadah ngagai sida ke benung dalam babas tauka umai. Nya dikumbai betekan. Udah anak ada tawak dituntung baru ngayuka anak udah ada serta ngangauka betara. Anak laki selalu disambut enggau piring tujuh. Sida ke laki enda diasuh meda orang betekan semadi iya nyadi manang tauka beliau muchau ngasuh orang ke beranak nya muntang agi beranak enda pedis. Ditu meh sida ke bisi ubat mudah beranak beunsutka ubat mudah beranak, meri ubat benta awakka indu ke beranak enda jukat.
Kayu idup dipelintang ba jalai pendai enggau kaki tangga madahka rumah agi bepenti ka orang baru udah beranak enda tau ditiki temuai. Laban temuai ari rumah bukai deka ditunggu enti niki rumah. Tunggu nitihka adat rumah siti siti. Tang manuk, besi, pingai sesingkap enggau beras basah mesti bisi. Nya kena bebiau, mudas menoa, ngampun ngagai antu. Bedong dibelit ngelinggi punggung orang ke baru udah beranak awakka enda labuh serangan anak. Iya mega asuh ngirup ai lia awakka anggat tubuh enda benta. Lauk orang ke baru udah beranak deka dipilih, laban sida enda tau makai jukut enggau pansuh. Keba sebedau bini beranak sida ke laki begiga dulu, nyalai ikan, nyalai babi, nyalai jelu babas serta nupi manuk. Sida mega ngaga gelukos. Maioh sida besaup ngereja pengawa nulung bilik orang ke deka beranak. Sida beberika manuk, salai, unggun enggau utai bukai.
Kira seminggu udah nya, udah tampuk pusat gerai serta anembiak mit ke baru adanya tau menchelak, orang kelia ngaga keduran baru ngayuka iya udah tau nengkila, meda ngelala dunya. Laban sebedaunya anembiak mit nya agi bedau enchelak agi idup baka dalam ruh. Tampuk pusat enggau temuni orang ke beranak dianjung ke babas ditumbak enggaika dikachau utai. Penti rumah enda tau ditiki temuai pan dibuai. Maia tu mega sida ngaga ka anembiaknya nama. Sida ngiga manang berua nentuka nama. Nama dipilih ari nama aki-ini, purih-pantih sida empu. Maia berua nya manang megai manuk lalu manuk nya asuh mantuk beras ke udah dipelian ka iya madahka nama ke deka digaga. Enti manuk nya deka mantuk beras nya reti nya nama nya tau dikena betara ngasuh. Enti manuk nya enggai mantuk beras ke dipelian, reti nya nama nya enda tau diberi ngagai anembiaknya, antu manang nya enda ngasuh. Sida ngiga nama baru lalu dipelian ka baru sampai manuk deka mantuk umpan ke dipelianka. Kadang-kadang enti anembiak nya selalu nadai pengerai, sida ngiga manang baru berua tauka belian nukar nama anembiak ke selalu enda pengerai. Tubuh tasal enggai mansang, alah ayu kenu. Retinya semangat anembiak nya bisi utai ngachau.
Beberapa bulan udahnya, maia indu ke beranak udah regas serta gerai lalu anembiak nya baru tau singgit iya dianjung orang mandi. Tu pengawa ke besai laban kaban belayan kuli kili dikanggauka magang. Sida ngaga piring tujuh. Munuh manuk kena bebiau lalu munuh babi ba ai kena nyelapat anembiak nya mandi betemu enggau bunsu gendali. Ditu sida ngunsutka pengaruh rajut ngagai anembiak ke baru adai awakka berani bulih utai. Orang ke nganjung anembiak mandi deka dipilih, ngiga orang ke berita benama awakka iya tau berita benama baka orang ke nganjung iya mandi. Keba anembiak udah besai deka nanya apai indai iya, sapa orang ke nganjung iya mandi maia agi mit kelia. Enti anembiak nya bulih utai baka iya ke meri iya mandi, iya deka dikelalau jako orang. “Nya meri sano nya berita bulih utai, aki sano meri iya mandi, berita benama baka aki sano.” Nya jako.
