Tajuk Ensera : Antu Buyu Ba Rumah Panjai
Pemuka Jaku:
Meri basa terima kasih nuju semoa bala ti rindu ke ensera iban.. Ba ditu endur aku mantaika seribu ensera kitai Iban kelia menya.
Nyadi ensera tu dikarang aku iya nya Antu Buyu Ba Rumah Panjai ba taun 2019 tu.
Selamat Lemai Pemacha,
Saritu aku deka ngerintai jalai ensera betajuk Antu Buyu Ba Rumah Panjai. Ensera tu nadai sangkut paut enggau nama-nama antara urang ti agi idup tauka urang ti udah parai lebih-lebih agi. Ensera tu semina dikarang olih aku nitihka pengelandik buah runding diri empu.
Tusun 1:
Bepun ba maya taun 1720 kelia menya, siti rumah panjai enggau ukir burong Tajai diberi nama Rumah Panjai Bajing ba menoa Nanga Gaat , Kapit, Sarawak.
Bisi dua iku anembiak laki bujang diri menyadik ti diberi nama Saging Anak Bilung enggau Naning Anak Ensurai sereta siku anembiak indu dara diberi nama Kirai Anak Bugang.
Nyadi sida tiga tu tadi ari mit begulai nyentukka udah besai panjai enggau serambau magang baru aja manggai umor 18 taun sereta enda kala belaya enggau pangan diri.
Lemai Ari Ba Pendai Mua Rumah Panjai,
"Naninnnnnnnng!" "Oooooo Naninnng!" Ko Saging rerauh ngagauka Naning enggau pansut urat batang rekung ari ruai bilik sida iya laban Naning sigi bendar gali tudah dalam bilik tinduk diri empu.
"Iya lapa nuan tu bendar amat rerauh lemai ari tu? Bangka udu mih nuan tu Saging. Aku tu apin bedau bengar agi lubang pending aku tu. Sema jaku bunyi burung bubut agi mih ulih didinga aku." Ko Naning enggau mua reredu ringat tudah.
"Raya mih pemula nuan madik-madik! Burong bubut ulih dinga nuan pia? Hahahaha!" Ko Saging enggau lelekik ketawa lelakah.
Naning pan lalu enda kibuhka menyadik iya Saging ti udu ngemelika iya tiap ari nadai ngetu. Dia mih Apai Saging iya nya Apai iru Naning bendar gegilik pala enggau mua tuchum tudah meda dua iku betundi enggau pangan diri.
Kasih Naning tudah laban nadai apai enggau indai agi laban apai enggau indai iya lama udah lesi maya begigaka lauk sereta ditabanka arus sungai nyentukka nadai pulai agi. Maya nya Naning baru manggai umor 3 taun apai enggau indai iya udah ninggalka iya. Semadi udah besai baru nemu diri anak iru tudah.
"Umbas nuan merening bala burong nyin! Nama nuan ka terebai baka sida iya pia? Gamal baka gerama ti ngirit sepit! Hahahaha! Uji ambi kain mandi nuan kin aram tua nurun meresi diri ba sungai din lalu nejunka diri ari pun kayu." Ko Saging ngemai Naning mandi sereta.
Nyau mih Naning namaka diri lalu ngambi kain mandi enggau perengka kena mandi baka batu perungsut dikena seduai menyadik iya mandi ba sungai nya.
Enda lama udah nya, Kirai pan lalu tepedaka Saging enggau Naning ti benung nuron mandi ke sungai semak mua rumah panjai sida iya nya.
Kirai pan lalu ngambi perengka iya dikena iya nuron mandi sereta enggau Saging sereta Naning enggau mua gaga ati tudah.
"Eh Kirai!" Ko Naning enggau mua malu ngagauka Kirai ti benung gegadai-gadai niti batu enda jauh ari pendai nya laban batu selepak nya endang sigi mudah ngasuh empeliuk ngapa.
"Naninnng....." Pia ko Kirai nyaut enggau munyi sada nyawa ayu lundai ti ngasuh Naning tekait bendar ati iya.
Dia mih mua Naning baka malu-malu tekuyung pengudah Kirai nyaut utai ko iya.
"Arrrrhggghhh!" Ko Saging ngerauh baka mua serati ti pansut dilah udah lesi.
Pengudah Saging temepak labuh ari pun kayu buah sibau, iya lalu berumban nyemeraika diri empu ngagai tebing lalu berumban ngagai endur madang manok sabung seduai iya apai iya laban ka meri mandi tudah.
Kebendar Saging ngelarika diri laban ngelalaika mua malu tudah meda diri empu temepak labuh baka buah temedak bai lelanyah niki pun kayu enggau mua lelesay ngemelika Naning laban Naning malu-malu tekuyung maya meda mua Kirai.
Naning enggau Kirai pan lalu bendar lelekik ketawa tudah meda ulah Saging ti temepak labuh ke sungai tadi laban dikumbai seduai iya enda entu landik niki pun kayu buah sibau.
Udah Saging meri semoa bala manok sabung iya mandi, iya lalu mandi baru enggau meresi diri empu enggau beresi lalu mulaika diri ngagai rumah panjai sereta ninggalka Naning enggau Kirai kediri ba pendai sungai nya.
Saging lalu enda kibuhka Naning enggau Kirai labuh muka singkang pejalai kaki iya nuju bilik enggau pantun muji diri empu munyi bakatu maya bala burong semalau ba atas pun kayu meratika iya lebuh iya pulai,
Aihhhhhh...........
Uji anang chapuh ragak kita banyak ke duduk atas pun kayu mayuh betugung lalu dingaka pantun aku,
Enti kita deka ningaka aku nusi ensera mua malu tekuyung, uji kita meratika Naning enggau Kirai ti benung labuh pengerindu sereta ati bebungai baka daun sabung.
Enti sema jaku pantun aku tu bisi ngemediska kita bala burong, tuboh ruri aku nusun jari dua bebandung." Ko leka pantun Saging ti landik bepantun ba lemai ari enggau mua tuchum enggau jejingka pejalai bai pedis tulang belakang labuh temepak. Ipak Saging ngemelika Naning ngujungka diri empu bulih penulah.
***Betampung***
***Sambung Tusun 2***
#ArtisPenulisEnseraIban
