To Begin Again (It Girls Series #1)

Chapter 9

Chapter 9

The Art Of Getting What I Want

"Sandali! Ako na..." Pigil ko kay Colton nang akmang babayaran na niya ang ensaymada at iced coffee ko. Hindi niya ako pinansin at ibinigay niya lang kay ate yung pera niya.

"Hindi mo yata kasama 'yung girlfriend mo ngayon?" Tanong noong nagtitinda kay Colton na mukhang nasa mga nasa 40's na. Parang parating bumili dito si Colton base sa pagkakakilala no'ng babae sa kanya.

"May klase pa siya, ate..." Sagot ni Colton. Balita ko kay Trix, Architecture daw ang kinuhang course nung girlfriend ngayon ni Colton. Four months na nga daw sila. Well, that's new. Looks like Colton wants to take it to the next level.

Mukhang naisipan na niyang magseryoso ngayon. Two months na kasi ang pinaka matagal kapag nagkakaroon ng girlfriend si Colton.

I've seen the girl once, maganda siya (Parati namang maganda ang mga nagiging girlfriend ni Colton) maputi at mahaba ang kanyang buhok, madalas kong makita noon ang mukha niya sa mga tarpulin na naka display sa may boulevard... Parati siyang nakikisali sa mga pageants nitong university.

"Siya nga pala si, Jess... Best friend nung kapatid ko." Pakilala niya sa akin.

Tiningnan niya ako bago niya ibinigay ang sukli kay Colton. I heard Colton muttered at thanks.

"Junior? Hindi ba't may klase sila ngayon?"

I just smiled awkwardly. Bakit naman kasi ipinakilala pa 'ko. Baka isipin ni ate pala cutting ako.

Tumango si Colton. "Opo, isinama ko na lang sa'kin kaysa saan-saan magpunta..." Aniya at mabilis akong sinulyapan.

"Gano'n ba? Mabuti na lang wala yung girlfriend mo. Alam mo naman selosa 'yon..."

Napanganga ako at nagtatanong na tiningnan si ate. Ano ang ibig niyang sabihin?

"Huh?"

Nginitian niya ako. "Ang ibig kong sabihin ay baka kasi pagselosan ka nung girlfriend niya." Paliwanag niya sa'kin.

Natawa ako. "Wala naman siyang dahilan para magselos, ate. Grade 10 pa lang ako, oh para na 'kong nakababatang kapatid ni Colton. At saka ang pangit-pangit ko para pagselosan niya!" Natatawa kong sabi.

"Lahat pinagseselosan no'n..." Sagot ni Colton.

Natawa iyong si ate. "Oo, may makatapat lang si Colton na babae sa tuwing bumibili sila dito ay naiinis na."

"Nakakairita na nga minsan..."

Pero bakit 'di mo magawang iwan? Kasi mahal mo na?

Maging ako ay nagulat sa aking sariling naisip. Kahit kailan hindi ko pa naimagine na si Colton ay magmamahal. Parang ginawa nga lang niyang libangan ang page-girlfriend.

"Hayaan mo na. Ibig sabihin no'n ay mahal ka niya talaga. At saka ang ganda ng girlfriend mo, ah. H'wag mo na pakawalan..."

Hindi sinagot ni Colton ang sinabi no'ng babae. "Sige na, ate. Balik na kami sa table namin." Paalam niya at tumango naman ito. Nginitian ko siya bago kami tuluyang naglakad ni Colton sa table namin katapat ang isang centralized aircon.

"O, nasaan yung sa'kin?" Kunot noong tanong ni Ciel nang umupo kami sa harapan niya.

"Anong sa'yo?"

"Yung iced coffee ko pati 'yung ensaymada!"

"May binigay kang pera?" Sarcastic na tanong ni Colton dito.

Ngumuso siya. "Bakit si New Girl nilibre mo pero ako hindi?"

"Anong New Girl?"

"'Di mo alam 'yon? Series 'yon! 'Yung Hey girl what ya doin'? Hey girl where ya goin'? who's that girl? Who's that girl? It's Jess!" Kanta niya at hindi ko napigilan ang sarili ko na mapangisi. Ang cute naman nitong si Ciel, nakakatuwa kasama.