#للجميلات_حصراً

#للجميلات_حصراً ٣١

السلام عليكم
🌺🌺🌺🌺🌺🌺

#للجميلات_حصراً ٣١
#زينب_الموسوي

ندى

التفكير .. ان جهاد ممكن تكون عنده علاقه ثانيه
خلاني مثل المجنونه .. طلعت من الغرفه ..المنظفه موجوده ...
طلبت منها تبقى يم البنات مقابل زياده في الاجر
وافقت. .. اخذت مفتاح سيارتي
وركض على الشارع
اسوق ادور عليه بكل مكان .. رحت للمطعم سيارته مموجوده بمكانها ... اتصلت بيه
تاخر بالجواب .. فتح خط .. صحت بيه

: جهاد وين انت ؟

: بالجم ليش شبيج

ماصدگته .. لان جهاد ميروح جم.

: ها بالجم انطيني العنوان

ضحك عالي
: شبيج تخبلتي شتسوين بالعنوان شنو اجاى ابالج ... اشو من جهه متريديني ومانعه نفسج عني خمس اشهر ومتحمل لان مريضه .. وهسه جايه تحاسبين .. حاسبي نفسج
اول ..

انتبهت على نفسي .. تنفس بصعوبه .. ومع ذلك مصره اعرف

: جهاد اني مريضه وداسوق هسه گلي شلون متحمل خمس اشهر .. كم مكسيكيه عرفت
عليه

انتقل الغضب مني اله وهو يصيح بالسماعه

: ارجعي للبيت هسه واني جاي نتفاهم

سد التلفون ... مارجعت مو فقط الغيره تدفعني .. كرامتي مااقبل اصير مغفله والناس تتناقل قصص خياناته من ورايه
بحجة مرته مريضه
اخذت طريق يودي لجم قريب
وصلت شفت سيارته موجوده ... وهوه ديطلع
مامتاكده شافني او لا ... طلعت على السريع لبيتي ... وصلت رجعت السياره لمكانها.
نزعت الحجاب ودفعت للمنظفه فلوسها .. ودخلت لغرفتي
منتظره يجي ويعلگها على راسي ... والندم مااكلني ليش خليت نفسي بهذا الموقف .. وين قراري يطلع من حياتي

انتظرت يرجع .. وابالي يصيح ويغلط ويهين
سمعت باب البيت انفتح وانسد .. بهدوء
شعجب مارگعه ؟؟.... البنات بالصاله يلعبن صور وحروف

سمعته يسالهن ..

: وين ماما ؟؟

ردت هدى بالغرفه نايمه

گعد يمهن واخذ منى بحضنه ..

: وانتوا شدتسوون حلواتي

: نلعب بابا .. تعال العب ويانا

رفع اردانات تشيرته وگلهن

: العب ليش لا

اكو شي مو طبيعي بجهاد !!!
وسالفة الجم جديده ..

لعبوا لعبه صور .. وصوت التحدي بينه وبينه .. وعقله من عقلهن .. خلاهن يبجن .. وهو يصيح فزت اني فزت
جمع كل الصور واخذها .. ونور وهدى نصبن مناحه وهو يضحك
.. طلعت من الغرفه. انهي اللعب والبجي والضحك