#للجميلات_حصراً

#للجميلات_حصراً. ١٧

#السلام عليكم مره ثانيه

#للجميلات_حصراً١٧
#زينب_الموسوي

هذا البارت يخص ندى واختصار لحياتها في الغربه
🌹🌹🌹🌹🌹🌹🌹🌹🌹🌹🌹🌹🌹

ليلة عرسي  ... انتهت بشرخ روحي .. وتقطيع  اوصال حبي
وصباحية عرسي .. وعيت على الالام  مطبوعه  بجسمي ..
مااگدر اتحرك ..واشعة  الشمس اتمنى تختفي  .. مااريدها تشرق
وتكشف الجروح
فتحت عيوني  وتمنيت شوفة امي ... وارتمي بحضنها  وابجي
واگلها يمه(  ندمانه  )
اتصورتها  تحاجيني وسمعت صوتها  تگلي (تحملي اصبري )
وجملتها الگالتها اليه ( غربوهن وجربوهن ) 
كأنها  انذرتي  بالقادم ...
وهمست  بالرد عليها
: حاضر  يمه  راح اتحمل واصبر

سحبت نفسي من  الفراش .. اخذت  ثيابي  .. والمراهم  ودخلت للحمام  ...
منعت  الدموع .. وأجلت التفكير
ومع كل لچمه ... واه
ارد  عليها ( هذا  الزواج وانتي بغربه  مالج غير  رب العالمين ورجلج )
طلعت من الحمام لابسه فستان
محجبات ... ابيض  وستره صيفيه قصيره  مورده ابيض واحمر  .. خليت مساحيق تخفي العنف واثاره ..
وسويت مخلمه  وجاي
وگعد من الريحه ..
تحاشيت النظر   اله خوف ...ورغبه في السلام بيني وبينه ..وخجل منه

كل مينهض من الفراش.. گلبي يدگ اسرع  ... وادعي ويه نفسي
يعتذر عن الصار  .. يطيب خاطري المكسور ..... سمعته يكول اخ  كل ميتحرك
وبتفكيري  ( اذا  هالگد تعبان ومريض من وين اجتي القوه البارحه )  ابعدت الافكار من راسي .. تركته فارغ   .. التفكير مرات يذبح ويقسى علينا ...
اقترب بخطوات  وصار قريب مني .. تجاوزني  اخذ  ملابسه ودخل للحمام ... اطلقت  انفاسي  ... المحبوسه
انتظرته يطلع  وناكل سووا ..
يمكن صباحيتنا   تبقى ذكرى حلوه بينا ...
طلع وگعد يمي .. صبيت الجاي
نهض للثلاجه  ورجع بيده حليب
اكلنا سكته  اثنينا وعيوني متقابل عيونه ...
لحد خلص اكل ... حجى
: عاشت  ايدج
رديت وعيني للطاوله  والملم المواعين
: تسلم
وبعد هالكلمه فتح وبال  الويل عليه
: رفعي عينج  وباوعيني زين
رفعتهم  لمحته ونزلتهم وحاصرتني الدموع
: باوعيني بلا بجي  ...
دتشوفيني  هذا جهاد هسه ...جهاد الوسيم  الضابط مات بمياه الخليج .. وجهاد الگدامج  مريض. متعب .. مرفوض من العالم كله ... شريك بالسكن  مالگيت شخص يقبل يسكن ويايه   لان مشوه .. وظيفه مالگيت الا بمعمل  اجره ضئيل
قدمت على مطعم دلفري اعتذر
خايف افزع الزبائن .. دراسه  مادرست لان  راح اسمع تعليقات ومااسكت ...
هذا اني ندى  .. تريدني لو لا
مناقص  زوجه رافضتني

شعرت بمعاناته ..، ورغم روحي بعدها  معلگه بجهاد الوسيم
جاوبته

: اكيد  رايدتك  .. وان شاء الله تتعالج
بلا مااكمل ضرب الطاوله
: وحتى لو مااتعالج  اسمعيني زين .. اني مفارغ لدلالج  وبنص الليل ادگ على الناس ابواب لحكولي مرتي تخربطت  واگعد ابرر شصار  وليش
: جهاد  اني فعلا متألمه ولحد الان   وانت  ابد منطيتني  مجال