#للجميلات_حصراً

#للجميلات_حصراً ٣٨

السلام عليكم
♥️♥️♥️♥️♥️♥️♥️

تغييرت .. والحزن هو هو
وجود الكهرباء من عدمه صار عقاب تستخدمه القوات الامريكيه ضد الشعب
الازدحامات وازمة البانزين .. لعنه وحطت علينا ..
واهم انجاز حققته امريكا بالعراق .. هو ضهور المولدات الي تستخدمها بقية شعوب العالم  في رحلاتها بالبر .. اما في العراق فاصبحت حتى المستشفيات متستغني عنها

مرت ٦اشهر على السقوط .. مدارس غير منتظمه .. اكثر الدوائر  مسدوده .. الجيش انحل ..
وخلال هالفتره  محمد صحته تحسنت وماادخل عيادة دكتور او مستشفى ... وصار يلعب اثقال بالبيت ..
ويحرس مع الشباب بالمنطقه
لحماية الاهالي ..
نجيب بعد السقوط بشهر .. حولي ١٠ اوراق .. واتصل بيه وصاني
( اريدج تصرفين ولاتبخلين على نفسج ولا على ابنج )
: ماتقصر  ياخويه لو تدري شگد جنت بحاجة الفلوس

ضحك بصوت متقطع بالگحه
وجاوبني ( اصيرلج فلوس تتدللين )
ونفس الطلب كل مره يطلبه
( زوري واندعيلي )
وعلى وصيته  طلعت من الصبح واتعنيت   للامام الكاظم .. ولزمته  شباكه .. وبجيت  بحرگه وصحت
(يارب تشافيه )  وبعد الصلاه والدعاء .. طلعت  اني محمد نتغدى  لفات .. واشوف محمد يحوم .. كل دقيقه  مغير مكانه
اتصورت  عاجبه يشتري حاجه وخجلان مني
: ها محمد ماما تريد تشتري شي 
ركد بمكانه گبالي
: لا مااريد اشتري .. اريد ارقام بابا اتصل بيه
: وليش تتصل بيه  شعندك وياه  الحرب خلصت والناس رجعت .. وينه كلام ابوك وعده

: اي غير اتصل اشوفه ليش ميتصل يجوز مريض

كلامه نبهني لسبب مكنت مفكره بيه ..
يجوز صدوك مريض ومارجع .. او يجوز امه ماتت  لان قبل الحرب كانت مريضه .. لازم اعرف اخباره ...
انطيت الارقام لمحمد يتصل من مكتب عدهم موبايل الثريا ...

وظليت اني باب المكتب ..
اتصل باول رقم  .. مجاوب ..
الرقم الثاني رن مجاوب
كرر المحاوله مره ثانيه .. بلا فائده ..
اتگأب  والحزن بين عليه ..
وعن نفسي لمت نفسي لان انطيت مجال لمازن  يعبث باحلام طفولته البريئه ..،
رجعت وياه نتمشى مسافه للگراج  .. واختاريت  مشينا يكون النهايه لعقد الرجاء على مازن
: محمد ماما  صح مازن ابوك
ومن حقك تكن اله مشاعر .. لكن مو معناها نوقف عمرنا عليه
افرح بعمرك .. وابني مستقبلك
واحلم باجر .. ورفع راسك بين الناس بتكوينك مو بابوك وافلوسه  والبلد العايش بيه ..

مارد عليه
:صح كلامي لو لا
هز راسه ( اي )
: اذا اي اضحك واطرد الهم

ابتسملي واخذ الاكياس من ايدي شالهم
وزدت في كلامي جرعة الامل

: كلها ايام ويرجعوني للوظيفه
معلمه ويحسبون الفصل السياسي .. ونعمر البيت ونرجع ناثثه .. واشتريلك سياره
وداعتك ياحمودي الا اخليك
دكتور
نظرني  بطرف عينه افتهمت النظره
: ها نسيت ماتحب الاطباء والمستشفى 
فكرت وياه بوظيفه ثانيه
: شنو رائيك مهندس 
جاوبني  ( ولا مهندس  )
خطر على عبالي وظيفه تقهر مازن  ونطيت بالكلمه