حُب في خط النّار

الحلقة الاولى : اخبار صادمة

( #حب_في_خط_النار ❤🔥)

كتابة : ⚘ندى أحمد ⚘

بدون مقدمات ، اتمنى للجميع قراءة ممتعة ❤ وان شاء الله  تعجبكم

الحلقة [1]

في هاذيكا الليلة كان مجدي يلعب في الكورة هو  والولاد

صاحبه محمد مقعمز شد النقال واشر لمجدي : مجدي ! نقالك !
مجدي اشرله بايده (فوته) ومزال خاطره في اللعب !
مجدي : شوط شوط يا احمد !
كمل شوط المبارة وربح مجدي 2 شي

*مشي ساخن من الجري وقعمز جنب محمد !
وخدي شيشة الميا قعدت يشرب !
محمد : يا راجل أمك من امبكري تتصل !
*خدي مجدي النقال وقعد بشوف في المكالمات ويشرب في المية وداهش !
24 مكالمة ! بين ( أم مجدي ، خوه الصغير)

*اتصل مجدي بأمه وردت عليه ودوشة جنبها !
مجدي : ايوة ياام ! شن الدوشة هاذي
ام مجدي "وردة" صوتها يرعش وتبكي : مجدي وليدي ، وينك ؟نتصل بيك ماتردش عليا ،
مجدي منفعل : كنت نلعب ! خيرك تبكي يام شن فيه!
وردة : عمك قتلوه ، مصباح مات يا مجدي ..
*مجدي فشل وانصدم : كيف ؟؟ من قتله ، وانتم وين !
امي : في الحوش حني ،

لوح شيشة الميا ومشي يجري !

محمد استغرب فيه : خيرك مجدي شن صاير ؟ (ولحقه)
طول الطريق يجري ووصل فم الحوش !
لقاها زحمة !
خش لجنان ،عمته وحناه وامه مقعمزات على الدروج ويتباكوا !
مجدي مصدوم و الدمعة قعدت محبوسة : خيره عمي ياام ، خيره شن صارله !!؟
جي يجري وتغمر امه بقوة !
مجدي :من اللي قتله يام ،
وردة : مش عارفة يا وليدي لقوه في السيارة مضروب !

انصدم مجدي بموتة عمه مقتول ، كلهم يعرفوه على حاله وماعنده عداوة مع حد

تاني يوم كانت الجنازة مع الظهريات
ومجدي واقف في الصف مع عمامه والناس تسلم !
وسرحان في عالم تاني ،
مجدي : ( اللي رباني مشي
عمي مات مقتول ! ) قاعدة مش خاشة راسه الفكرة !
الدنيا والناس كلها مستغربة ، راجل ماشي على حاله !
لا مشاكل ولا شي راجل يخدم على حاله و حده للحوش ومن الحوش للمحل  !

(تعريف بالشخصيات)
مجدي شاب في بداية العشرين يقرا اقتصاد !
عنده اخ اصغر منه بعشرة سنوات واسمه ايمن !
توفى بوهم (بلقاسم) وفاة طبيعية !
وتزوج عمه مصباح مرت خوه الارملة (وردة) خوفا على الولاد الزوز يتشردوا ، حنناه  ام بوه اسمها (خديجة ) وعمته (نجمة) وولد نجمة  اسمه (رامي) ومزال فيه شخصيات تانية لكن نتعرفوا عليهم في وقتهم

مجدي بعد وفاة عمه لا عاد يلعب في كورة ولا يتلاقى بأصحاب والشرطة قاعدة ادور في قاتل مصباح ومافيش دليل !

توفى مصباح وخلالهم محل صغير مواد منزلية كان  يخدم فيه هو و (رامي ) ولد اخته (نجمة) اما توا بعد وفاة مصباح
قعد يخدم مجدي يوم بيوم هو و رامي