حُب في خط النّار

الحلقة الخامسة : الاقتراب من خط الخطر

حب في خط النار ❤🔥
كتابة : ⚘ندى أحمد ⚘

الحلقة [5]

قراءة ممتعة ❤

مصطفى : الأفضل ينتقلوا لحوش تاني ..
مجدي : لالا .. مستحيل صعب والعيلة منو بيها ..
مصطفى : دير اللي يريحك .. مش حنجبرك على شي انت ما تبيشي ..

**
عند دنيا
ناضت موخر ..
دنيا :اخ يا راسي شكلي رقدت هلبا .. (فتحت النقال) الساعة 2:00 م
شافت المكالمات (رنوش 3 مكالمات لم يرد عليها ) خيرها ؟ اكيد بتسأل علاش ماجيتش ..
واتصلت دنيا بصحبتها ..
رنيم : اهلا يا غزالة وينك ؟ معقووولة عيد ميلادي .. وما تجيش مفروض انتي اول وحدة يا دنو
دنيا : كان نحكيلك تو تعذريني ..
رنيم : شنو احكي ؟
دنيا : وانا جاية في الطريق بلا علم بوي وكله على خاطر ماتزعليش .. بعد ماكلمتك ضربت واحد بالسيارة
رنيم : حييييي شن صار ؟
دنيا : رفعته للمستشفى .. وجي بوي ما خلا ما قالي
رنيم : لا عاد ما حسبتش هكي ..الحمد لله على سلامتك .. كيفحاله الولد توا ؟
دنيا : باهي فاق في نفس الليلة  رفض يقعد تحت الملاحظة ..
رنيم : باهي ما كبرهالكمش ..
دنيا : لا لا مشت على خير ..
رنيم : به الحمد لله على سلامتك ..
دنيا : سلمك .. لكن تعرفي مانحكيلكش الموقف ماشية مادة وجهي بالروج والمكياج ..
رنيم : هههههه معليشي مش مكتوب تحضري ..
دنيا : لكن معليشي نقولك حاجة .. شن الطرف اللي خبطته بسيارتي .. يستاهل خبطة بمرسيدس الحق ههههه
رنيم : كيف شني؟ اعجاب من اول نظرة ؟
دنيا : طول الطريق واحني بنوصلوه وهو يشبح للمرايا الجنبية ويوزع في الابتسامات ..
رنيم : حتى انتي ما ناقصك شي كيف ما تعجبيشي ومايوزعش نظرات وابتسامات .. شي اكيد ..
دنيا : مع ان متعفلقة من بوي امس على دوة السفر لكن طول الليل وهو صورته في بالي ما تحولتش بكل ..
رنيم : شن وضعه تحسيه فلوس ولا عادي
دنيا : تعرفيني ما ندورش في الفلوس يا رنيم .. لكن واضح عليه انسان عادي لكن عنده شخصية حلوة وجاذبية غريبة ..
رنيم : مفيش كيف تتواصلي معاه ؟
دنيا : لالا .. لكن حقااا بوي حدي رقمه ..
رنيم : خلاص دونك ليه بري اتصلي بيه
دنيا : مستحييييييل نديرها .. خيرك هبلتي ؟ تبيني نطيح من قدر بوي .. صح فكرنا متفتح ونسافروا ونطلعوا عايشين حياتنا .. لكن الا المواضيع هاذي ..
رنيم: لالا تو بتقنعيني انك ما درتيش أصدقاء شباب برا
دنيا : والله لا عندي صديقات من الجزائر والمغرب وتونس .. لكن شباب لا مسكراته الباب هذا ..
رنيم : يا ستي امالا ربي يقويك .. وكان هالشبوب راجل ويستاهلك  نقولوا ان شاء الله ربي يقربه ليك ..
دنيا : ان شاء الله ..
نزلت دنيا لدور الأرضي ..
دنيا تنادي : عميييمة .. عميمة ..
نبيهة  فاتحة النقال : ها بنتي ..
دنيا : استاحشتك من امس ما ريتيكش ...
نبيهة : قصدك من نومتك المغرب ( وشبحت شبحة زعل مع ابتسامة )
دنيا جت جنب عمتها : ههههه والله كله من بوي ما خلانيش نطلع وعيد ميلاد رنيم ..
نبيهة : يا بنتي بوك خايف عليك .. الدنيا معش اطمن .. راهو هني مش زي برا
دنيا : لا يا عمتي حتى برا عندهم كل شي ..
نبيهة : مش زي هني .. والله البارح رعشت قعدت في دوامة .. اهي سوسن لين جابتلي ميا وسكر ..شغلتيني ..
دنيا : خلاص عميمة اسفة معش نزعلك ..
نبيهة : حتى بوك قوليهوله الكلام هذا ..
دنيا : به حاضر .. لكن بالله عليك اقنعيه .. معش عندي خلوق نقعد بروحي برا نبي نكمل قرايتي هني والله مرارتي فاضت ..
نبيهة : حاضر غير معش اديري حاجة من راسك تبي حاجة قالك لا تعاليلي انا .. عاد مش قلتي انتي امي وصندوق اسراري وما ندرق عليك شي .؟
دنيا : أي صح ..