حب في خط النار ❤🔥
كتابة ⚘ ندى أحمد ⚘
الحلقة [7]
قراءة ممتعة ❤
خشت دنيا لدارها واتكت ،
سرحت سرحت تخمم !
دنيا : انا خيرني 24 ساعة في داري !
خلي نطلع لجنان برا نتمشى !
وطلعت دنيا تتمشى في الجنان ،
دنيا : *(خلي نتصل برنيم )
وقامت النقال تتصل بيها !
رنيم :صباح الخير شن مفقعة بكري اليووم ؟
دنيا : اي اهو نتمشى في الجنان خلي الواحد يشم هواء نظيف ، اسمعي
رنيم : نعم ،
دنيا : تعالي توا نهدرزوا حاسة روحي متضايقة ،
رنيم : توا ! صعب امي طالعة وبنرتب حوسة الصبح ،
دنيا حست باليأس : امممممم باهي ! على راحتك غزالة ،
رنيم : والله مايهون عليا نلقاك متضايقة ومانكونش بحداك ، اهو نكمل توا بسرعة ونلبس ونجيك ! قبل مفكرة بنشطب الحوش ، عادي حتى العشية وخلاص !
دنيا : اسمعي نقولك حاجة استني ما تجيش نشوف بوي ، مرات نجيك نهدرزوا ونعاونك شن قلتي ؟
رنيم : باهي تمام هي شوفيه وقوليلي !
مشت دنيا لمكتب بوها طقت على الباب ،
: (طقطق بابا .. )
مجدي : كح كح (يسمع فيها انه هو هني بش ما تنحرجش )
دنيا فتحت الباب وخشت
مجدي مواطي عيونه وايديه الزوز شابكهم في بعض
دنيا : بابا نطلب منك طلب ؟
العمدة : شني بنتي ؟
دنيا : حاسة روحي متضايقة نبي نمشي لرنيم صحبتي ! عييت بروحي في الحوش ..
سكت العمدة : اممم ، باهي تمام ، لكن تستني السواق طالع مشوار ! ، ولا نقولك !! (وتلفت لمجدي ) شني ؟ توصلها ؟
مجدي : تمام مافيش مشكلة ،
دنيا تشبح لبوها ولمجدي ، : به تمام امالا نمشي نوتي روحي !
خشت دنيا لدارها لبست بلوزة فضفاضة وسروال وشدت شعرها فوق !
وشوي حاجات خفيفة ملامحها ،
دنيا :*(خلي نتصل برنيم نقوللها)
رنيم ردت : ايوه احبيبة ،
دنيا : انا جاياتك توا ،
وطلعت دنيا لصالة شافت من الروشن لقت مجدي في الجنان مسند على باب السيارة بظهره وايديه في بعض ،
نزلت دنيا
نبيهة مقعمزة تتفرج على التلفزيون : طالعة دنو ؟
دنيا : اي عميمة بنهدرز على رنيم ،
نبيهة : به غيري جوك وفرهدي خيرلك من النكد ،
طلعت دنيا ونزلت من الدرجات ،
ومجدي عيونه فيها وهو واقف جنب السيارة !
فتحلها الباب الخلفي : تفضلي !
دنيا ابتسمت : شكرا !(وركبت)
صكر مجدي الباب وركب !
انفتح باب السحاب وطلعوا !
**عند نبيهة كانت تشبح من الروشن وهي مش مطمنة
ركبت لمكتب خوها وفتحت الباب : اعمودة !
العمدة: نعم ،
نبيهة : طول امنت فيه ؟
العمدة وهو يشوف في الاوراق : من هو ؟
نبيهة : الشاب الجديد ! كيف تخليه يوصل البنت !؟
العمدة : مايقدر يدير شي وراقه وجوازه عندي ، وواضح عليه ولد كويس يا نبيهة انا نظرة نظرة ره
نبيهة : والله ان شاء الله ، انا مزال ماهدرزتش معاه ، تو نزيد نعرفه كويس !
**
عند مجدي ودنيا في السيارة
مجدي يكحل من المرايا الامامية في دنيا !
دنيا شبحت للمرايا ولقت نظراته الله الله ، ولا يبي يحولهم السيك مجدي !
دنيا : شن مداير ؟ شن وضع الشغل شني ساهل !
مجدي : اهو قاعدين كيف قلنا بسم الله ، (وفي نفسه يحكي : زعما تعرف بشغل بوها ؟ لالا ما نضنش ، هو حتى ليا انا ما اعترفش بشغله التاني في التجارة ، لكن شن يحسابه بيوفته عليا)
طبعا العمدة جاب مجدي يخدم عنده ، لكن ما قالاش على الخدمة السرية قاعد ، لين يدرسه مليح ، ومجدي طبعا فاهم كل شي ،
أنت تقرأ
حُب في خط النّار
حركة (أكشن)ما مصير الانتقام الذي بداخلك عندما يكون عشقك لإبنة قاتل أبيك ؟؟ 💔 احداث القصة جدآ مشوقة باللهجة الليبية من تأليفي ، 🌷" ندى أحمد" 🌷
