عشق النسيان " الجزء الاول من سلسلة العشق"

البارت الثاني

فيلا
عشق النسيان
الحلقه الثانيه
&&&&&&
حاله هرج ومرج ف القصر واتعمل حظر ع اوضه الاميره والأطباء كل شويه واحد يطلع ويجي واحد تاني والكل قلقان عليها
نورسين بقلق وخوف : يارب .. اختي ياااارب
غاده مطمئنه : اهدي يا سمو الاميره أن شاء الله هتكون كويسه
نورسين بغضب : حصل ده إزاي يا غاده
غاده بخوف من نبره صوتها : انا كنت معاها وهي قالتلي اجيب الحرس وعقبال ما روحت ورجعت كانت بتنزف
غمضت عينها بالم وافتكرت لما سمعت صوت صراخ وزعيق نزلت تشوف ف اي لقت اختها ع اكتاف الجنود وشايلينها وغاده بتعيط وراها جريت عليها بدون وعي وهي بتحاول متعيطش وطلبت أطباء فورا ومن ساعتها وهي واقفه كده
هيام بغضب : ومين دول وعايزين اي
غاده: والله يا مولاتي معرفش .. تقريبا قطاع طرق معرفش
نورسين: اللي عمل كده هدفعه تمن عملته غالي قوي ومش هسبهم ف حالهم
طلع الطبيب من الجناح الخاص بعشق وهو ع وشه معالم الاسي
هيام بصوت حاد : الاميره عامله اي يا طبيب
الطبيب بحزن : احنا حاولنا كتير والباقي ع ربنا اصابت الاميره مكنتش سهله ومش بعيد يأثر ع المخ بدرجه كبيره
نورسين بغضب : اتصرف أعمل أي حاجه واللي انت عايزه هتاخده
الطبيب بحزن مضاعف : ربنا عالم احنا بنحب الاميره قد اي انا هحاول أعمل كل حاجه هقدر اعملها بس بعد ما تفوق عشان اقدر اعرف هتصرف إزاي بالظبط
وسابهم ومشي بعد امر الملكه ونورسين دخلت لاختها جوا وشهقت من منظر اختها اللي بقي لونها لون الليمون قعدت جنبها بحزن
نورسين : بقي كده يا عشق .. عايزه تعرفي غلاوتك عندي وبتختبريني .. يا ستي انا مش زعلانه منك وانتي عارفه اني بحب اتدلع عليكي .. قومي بقي يا عشق .. قومي يا سمو الاميره مينفعش رقدتك دي قومي
وعيطت جنبها وفضلت ماسكها ايدها لحد ما نامت جنبها اما برا ف دخلت الملكه الاوضه بغضب شديد بنتها بين الحياه والموت وهي مش عارفه مين السبب
أسماء بقلق : مولاتي اهدي
هيام بغضب : اهدي اهدي ازاي ؟؟ .. الاميره بين الحياه والموت وريثه العرش محدش عارف مصيرها اي ومنعرفش مين السبب وتقوليلي اهدي .. اطلعي برا .. براا
طلعت اسماء بتجري ع برا وطبعا الخبر انتشر ف المملكه بسرعه البرق وجزء بيدعي للاميره والجزء الثاني بيدعي عليها عشان يخلصوا منها ومن حكمها وانقلبت المملكه كلها يمكن اكتر من ساعه اختفاء الملك
&&&&&&&&&
انقضي اليوم بكل مافيه من الم ووجع ع المملكه وظهرت شمس جديده بتفاصيل جديده بالتحديد بقي ف جناح عشق بدأت تتألم ببطء وخفه صحيت ع اثره نورسين
نورسين بقلق : عشق
ولكن هي بتتألم وبس حتي معندهاش قدره تتكلم
نورسين بصوت عالي : يا غاااااده جيبي الطبيب فورا
قعدت جنبها وفضلت تمسح جبينها وتقرأ قرأن لحد ما فتحت عيونها ببطء
نورسين بفرح : عشق .. عشق إنتي كويسه
بصتلها باتسغراب قبل ما تسأل : إنتي مين؟؟؟
ضحكت : ياااه يا عشق لسه زعلانه مني وبتعامليني بالطريقه دي خلاص بقي يا سمو الاميره انا أسفه
عشق باستغراب مضاعف ؛ سمو الاميره .. انتي بتتكلمي عن مين وانتي مين .. وانا مين
بصتلها بصدمه شديدة كادت تفقدها الوعي لحد ما دخل الطبيب
نورسين بصوت بيخرج بالعافيه : يا طبيب .. دي مش فاكرني ولا عارفه نفسها
الطبيب : طب ينفع يا سمو الاميره اقعد مع الاميره شويه
اخدت غاده نورسين وهي مصدومه بردو وشافوا هيام واقفه قلقانه
هيام : الاميره اخبارها اي
غاده : الاميره مش فاكره شئ
بصت ليها بصدمه وبصت لنورسين اللي دموعها بتهدد للنزول بس هي لا هي الملكه ولازم تحافظ ع شكلها
طلع الطبيب من جوا وعلامات الحزن ظاهره : الاميره فقدت الذاكره
شهقه قويه صدرت من الموجودين
نورسين بثقل : يعني اي
الطبيب : يعني كل حاجه اختفت ذكرياتها كل شيء اختفي
هيام بثبات مصطنع : طب وده نعمل اي يا طبيب
الطبيب : محتاجه رعايه وحد يفضل جنبها يعني تروح مثلا اماكن كانت بتحب تروحها مواقف بتحبها المهم الرعاية والراحة
هيام : ماشي أسماء وصلي الطبيب
فضلوا واقفين ونورسين دخلت جوا لقت عشق باصه ف سقف الاوضه بشرود
نورسين بصوت حزين : عشق
عشق بهدوء : يعني انا المفروض إسمي عشق وانا اميره زي ما الطبيب ده قال مش كده
هزت راسها بمعني ايوه
عشق : بس انا مش مقتنعه + اطلعي برا
نورسين بصدمه : عشق
عشق بصرامه وحده لم تفقدها : برا
طلعت نورسين برا ورجعت عشق رأسها ع السرير وشردت ف حالها يعني المفروض زي ماهو قال انها اميره وملكه مستقبلية وليها اخت وام واب بس هي مشفتش حد من الناس دي او ممكن تكون البنت دي هي اختها اه مهي بتقولها عشق ولو هي خدامه مش هتقدر تقول للاميره زي ما بيقولوا لبعضهم باسمها بس فين ابوها أو امها زي ما قال ممكن ميعرفوش ازاي وع حسب كلامه انا بنت ملك يعني اكيد عارفين حست بوجع كبير ف دماغها ..
صرخت بالم حد يدخل بس لقت ايد بتتمد ليها ببرشام ومايه شربت ورجعت الكوبايه ولقت واقف قصدها الملكه وعلي وشها بسمه حانيه
عشق : الملكه صح
هيام بابتسامة : لسه زي ما إنتي بذكاء يا عشق
عشق بسخرية : لا هو انا كنت زكيه؟؟
هيام: طبعا إنتي إللي ماسكه المملكه عشان غياب الملك ومفيش حاجه بتحصل متكونيش عارفها
عشق : مممم بس أنا مش مصدقه كل الكلام ده
هيام : كنت واثقه انك هتقولي كده.
راحت سندتها وسط استغراب عشق ووقفت واخدتها لبلكونه ووقفت وبعدها رجعت جابت قوس وسهم
هيام : انتي دائما بتحبي ترمي الاسهم شايفه المكان ده
شاورت ع مكان بعيد مليان بالاسهم وسط دهشه عشق
عشق : جلالتك عايزه تقولي أن انا إللي اصبت كل دول
هيام : بالظبط وأنتي دلوقتي إللي هتجيبي ده كمان
عشق بسخريه : مع اسفي لحضرتك بس شكلك ان إنتي إللي فقدتي ذاكرتك مش انا .. أنا واحده فاقده الذاكره يعني حتي لو إللي بتقوليه ده صح مش هقدر لاني دلوقتي عامله زي الطفل اللي لسه مولود
هيام : دايما كنتي بتقولي لو نسيتي حاجه استرخي وغمضي عيونك وهتفتكري وممكن تعمليها ع احسن حال .. فعشان كده نفذي إنتي بقي
وطلعت برا تتابعها وسط جمود عشق وهي بتبص ع الاسهم وتبص ع القوس إللي ف ايدها ومسكت السهم وركزت اوي ع الهدف وغمضت عينها
عشق ف نفسها : لو أنا اميره زي ما بتقول ولو أنا فعلا بحب البتاع ده يبقى أكيد هعرف .. اهدي يا عشق .. اهدي
وفجأة فتحت عينها وصوبت السهم وجيه فعلا ف الهدف وسمعت صوت تصفيق من برا بصت لقت الملكه
هيام : برافو .. اتاكدتي دلوقتي
بصتلها جامد وبعدين اتكلمت ببرود : ممكن حظ مش اكتر
هيام ف نفسها : نفس برودك يا عشق حتي وأنتي فاقده الذاكره مش اي حاجه بتقنعك
بصت ف عيونها أوي وحاجات كتير جت ف دماغها خناق زعيق غضب بس ف ثانيه ده كله اختفي وقدرت بسهولة تداري الوجع وبصت مكان الملكه إللي اختفت ضحكت بسخرية
عشق : معتقدش اني بنتها .. دي حتي ماطمنتش عليا حاسه باي .. غريبه يعني هي كانت كده بردو قبل ما افقد الذاكره طب علاقتي بيها كانت إزاي
رجعت مكانها تاني وغمضت عيونها عشان تنام بس معرفتش قامت وقفت بس حصل صداع جامد ف دماغها قعدت تاني وهي ايدها ع دماغها بس وقفت تاني وطلعت لقت مجموعة من الحرس كتير ع اوضتها
احد الحرس : خير سموك ف حاجه؟
عشق : مفيش بس عايزه اطلع
الحارس : اسف سموك بي جلاله الملكه قالت ممنوع خروجك
فكرت عشق انها تستغل منصبها زي ما بيقولوا ليها يبقي طبيعي كلمتها مسموعه
عشق بحده وقسوه : انت اتجننت .. مش معني اني اتكلمت عادي يبقي خلاص اوعي من وشي والا صدقني هتبقي برا القصر ده
بعد بسرعه عن الباب وهي رفعت راسها بشموخ وهي جسمها مكان ضربه السيف كل حاجه وجعها متعرفش هي بتكابر علي ايه بس طلعت وفضلت تمشي لحد وصلت لجنينه القصر قعدت ع الارض لقت إثنين شايلين كرسي وجايين ناحيتها
رفعت احد حاجبيها باستغراب : اي ده
الخادم بحزن وقلق : الكرسي بتاعك سموك اسف اننا اتاخرنا ارجوكي سامحينا
بصتله جامد معقول هي تطرد حد عشان مجرد كرسي !!
عشق بهدوء : مفيش مشاكل انا مرتاحه كده ومتخفش مش هتمشوا
الخادم ٢ بفرحه : شكرا سموك شكرا جدا
ومشيوا وهما شايلين الكرسي تاني وهي فضلت تفكر اهي اول نقطه سودا ف حياتها ظهرت فضلت قاعده لحد ما سمعت : مولاتي .. اي اللي مقعدك هنا .. حضرتك كده هتتعبي
بصت ليها شافت غاده واقفه قصادها وهي ع وشها ملامح القلق
عشق : معلش إنتي مين
غاده : انا غاده يا مولاتي .. دراع حضرتك اليمين
بصتلها بشك بس حاسه براحه ناحيتها هزت راسها وشاورت لها تقعد جنبها
عشق : ينفع تحكيلي عني لاني مش عارفه اي حاجه
غاده : بس حضرتك ممكن تطلعي علي جناحك لان الجرح كده ممكن يتفتح ويتلوث واحنا مش عايزين كده سموك
عشق باستغراب : جرح اي
غاده باسي : ف ضهرك سموك
لمست ع ضهرها لقت شاش محطوط كده عرفت سبب الوجع ده
عشق بسخرية : لا متقلقيش .. هو اي إللي حصل عشان يحصلي كده
كانت لسه هتتكلم بس صوت غاضب خلها قامت بسرعه
نورسين بغضب : غاده سمو الاميره بتعمل اي هنا .. وأنتي قاعده جنبها لي
غاده بارتباك: حاولت سموك اطلعها بس هي اعترضت
نورسين : روحي انتي .. مولاتي ارجوكي قومي معايا
عشق ببرود : والله انا مسؤله عن تصرفاتي
نورسين بنبره رجاء : عشق ارجوكي .. اسمعي كلامي
متعرفش هي لي زعلت من نبرتها دي فقامت معاها بهدوء وهي سانده عليها لحد ما وصلت الجناح
نورسين : مرتاحه
عشق : ايوه شكرا يا
نورسين بحزن : نورسين .. اختك يا عشق
عشق بدون وعي : ماشي يا نور
ابتسمت بسعاده : طيب هسيبك ترتاحي
عشق : استني .. ف حاجه عايزه افهمها
نورسين : خير يا عشق
عشق : علاقتي بجلاله الملكه عامله ازاي .. اقصد يعني قبل الحادثه وكده
نورسين بحزن : مكنتش كويسه يا عشق
عشق باهتمام : ليه
نورسين : معرفش محدش يعرف حتي جلاله الملك .. إنتي دايما كان ليكي اسرارك وليكي قوقعه خاصه بيكي مينفعش حد يعديها حتي لو كان مين
عشق : حتي إنتي
نورسين : حتي انا
عشق : طيب شكرا يا نور.
طلعت نور وسابت عشق ف أفكارها كل مره بيظهر حاجه جديده من شخصيتها بس لي علاقتها بالملكه كده واضح فعلا زي ما قالت هي مش والدتها
&&&&&&
مرت الايام وحاله المملكه بتدهور محدش عارف ياخد مكان عشق حتي الملكه لحد ما طفح الكيل وراحت ع جناح عشق إللي بتحاول جاهده تفتكر ولو جزء بسيط من حياتها
هيام للخدم : اطلعوا برا
الكل قام بسرعه وعشق قاعده مكانها بتبصلها بصمت
هيام لعشق : اعتقد انك اخدتي فتره راحه بم فيه الكفايه يا سمو الاميره .. لازم ترجعي لمكانك من تاني .. المملكه بتدهور
عشق : اعتقد جلالتك حاكمه المملكه وانتي المفروض اللي تحكميها كمان مش انا .. يعني إزاي تدهور
هيام : إنتي كان ليكي طريقتك ف كل حاجه وع علم بكل شئ عكسي انا
عشق : انتي بتتكلمي عن واحده مش موجوده اللي قدامك دي واحده ذاكرتها رايحه يعني حاجه جديده ومفيش معلومات صفر
هيام بحده وامر : اسمعي يا عشق انتي هتطلعي تطمني الشعب عليكي وترجعي تمسكي المملكه بإرادتك غصب عنك هتعملي كده مش هقبل المملكه تقع عشانك
عشق ببرود خلقت به : ولو منفذتش كلامك
هيام بخبث : اختك نور هتختفي وابقي دوري عليها
عشق : نور إللي المفروض بنتك صح
هيام  : إنتي عارفه أن المصلحه فوق كل شيء ومصلحه المملكه مهمه
عشق بغضب : انتي ازاي كده .. انتي معندكيش حاجه اسمها مشاعر
هيام : المشاعر والمصلحه لا يجتمعوا يا سمو الاميره .. عايزه قرارك
عشق بغيظ وغضب مختفي: ماشي يا جلاله الملكه ماشي
طلعت معاها برا ولقت الكل واقف تحت بصتلهم بابتسامة وطمنتهم عليها ورجعت جوا وراحت ع القاعه الملكيه لقت الوزراء كلهم موجودين وبعض من عامه الشعب دخلت جوا بثقه وكبرياء والكل وقف ليها دخلت وقعدت ع كرسي الملك
بصت لقت خمسه من الرجال دخلوا القاعه وهي بتبصلهم بجمود وقررت دلوقتي انها ف الوقت ده الحاكم وبس  دخلوا ووقفوا قصادها
احد الوزراء : دول تجار ف الأسواق متقدم فيهم اكتر من شكوي لأنهم بيضحكوا ع الناس ف الوزن والثمن
عشق : ولما هو اكتر من بلاغ انتوا كنتوا فين
الوزير بقلق: مولاتي البلاغات كتير واحنا مكنش فاضيين
عشق بهدوء مرعب : عيد إللي أنت قولته ده تاني
الوزير وجسمه كله مرتعش : مكناش فاضيين سموك .. بسبب سوء الأوضاع إللي كانت ف المملكه
عشق بحده : طبعا هتفضي ازاي وأنت نايم على ريش نعام والناس يموتوا صح
الوزير : العفو مولاتي بس
عشق : اشرحلي وصدقني لو كلامك معجبنيش عقابك هيكون كويس بالمره
سكت وبص ف الارض وعشق بصتله لحد ما زهقت
عشق: انت معزول من منصبك .. وكل امتيازاتك هتتشال .. كل املاكك مسحوبة منك .. سجن لمده ٣ شهور .. وتمشي من المملكه كلها
الوزير بصدمه : لا مولاتي ارجوكي سماح .. أنا عندي ولاد
عشق بغضب : والناس دي معندهاش ولاد .. معندهمش اكتر من طفل عايز اكل وشرب وهدوم هيوفر كل ده إزاي كويس اوي اني عاقبتك كده بس .. يا حرس خدوه ع السجن
بصت للتجار إللي اترعبوا اذا كان عامله الوزير كده آمال هما اي
عشق : عندكم تفسير للسرقه دي ولا لا .. والاجابه بسرعه لان صبري بيخلص
بس فضلوا ساكتين
عشق : انتوا محكوم عليكم بسنتين سجن ده بس لحد ما يعود الملك والعقاب هيتضاعف ف المملكه هنا مينفعش اي تسبب وم هقبل لناس زيكم أنهم يسببوا ف ضعف ثقه الشعب فينا ويظهروا ثورات لاني قبلها هكون قاضيه عليكم
وقامت من مكانها بعد ما خلت الكل زي الصنم حتي بعد الحادثه إللي حصلتلها لسه بقوتها وشخصيتها إللي عارفينها وعارفين أن كل قرار قالته هي عارفه بتقوله إزاي وانها صح!
طلعت من القاعه بضيق إزاي قادرين يعيشوا بالطريقه دي الضمير انعدم للدرجه دي!! بس لا هي مش ممكن تسكت ع كده
&&&&&
ف اوضه نورسين دخلت عشق ملقتش حد عرفت أن لسه محدش طلع من القاعه قعدت مستنياها لحد ما دخلت عليها
نورسين بفرحه : لسه زي ماانتي يا عشق .. علي طول عادله متغيرتيش .. وهما فعلا كانوا يستحقوا اكتر من كده
عشق بابتسامة : اتعملي بقي يا نور عشان لما تمسكي مكاني
نورسين : لا انا مليش دعوه البركه فيكي يا سمو الاميره
عشق : افتكري ان انا كنت مت ف الحادثه دي كنتي طبيعي هتتولي العرش
نورسين : بعد الشر عليكي يا عشق صدقيني انتي الوحيده ملكيش منافس ف كده إللي تصلح للعرش
عشق بجديه : مفيش أخبار عن الملك
نورسين : لا محدش عارف ممكن يكون مات يا عشق؟؟
عشق : معتقدش .. كده مفيش غير حل واحد بس

نورسين : ايه هو ؟؟
عشق بغموض : هتعرفي بعدين
نورسين بضيق : فعلا لسه زي ماانتي يا عشق
عشق بابتسامة : بصي يا نور انا مش فاكره انا كنت اي قبل إللي حصل بس إللي انا عشته ف الايام دي يخليني اقتنع بطريقتي دي ف صالح الكل
نورسين : ماشي يا عشق
قطع كلامهم خبط ع الباب ودخلت غاده
غاده : سمو الاميره ف شخص تحت عايز حضرتك
نورسين : ازاي ده يخش القصر خليه يمشي من هنا
عشق : لا خليه يتسني انا جايه
غاده : امرك
نورسين باستغراب : إنتي إللي بتتكلمي كده .. ده إنتي بنفسك كنتي بتمنعي مقابله اي حد
عشق : قولتلك انا معرفش انا كنت اي قبل كده
وقامت من مكانها ومشيت وسط دهشه نورسين ووصلت ع مكان الاستقبال لقت شخص غريب كل شي فيه غريب لبسه يشبه لبس الملوك مش لبس واحد من عامه الشعب عيونه تشبه عيون الصقر
عشق : نعم .. انت مين
بصلها جامد وجري عليها وحضنها وسط صدمتها وغضبها الشديد ضربته جامد لدرجه انه اتراجع لورا
عشق بغضب شديد : اي إللي انت عملته ده انت مجنون
جيه ع صوتها الملكه هيام إللي عرفت ان في غريب ف القصر واستغربت أن عشق قبلت تقابله نزلت وكانت وراها نورسين إللي فضولها خدها تعرف فيه اي بس اتصدموا من غضب عشق
الشخص بحنيه : وحشتيني يا عشق
عشق بحده : اسمي الاميره عشق يا حيوان
الشخص بخبث : في حد بردو يقول لجوزه بحيوان يا سمو الاميره ..
★★★★★★
.. يتبع
#Nemo