اشعار

(ام شامه )

ادري الخلفج مافكر بحالي

مرء وكل الصفات البج تحلالي

بنيه وبيها ضل راس الابو مرفوع

من اشوفج من بعيد عكال حسبالي

طويلة ونازكة وجنج شطب ريحان

من تحجين احس خرخشة بدلالي

من الله الذهب يرهم على الترفات

هوة الغالي دوم يرافك الغالي

بكل ضهرية واني ابابكم موجود

اكول حارة وشيجيبج ابالي

ابكامل عقلي قانع بالذنب وياج

ومااعتب على الشيطان يقرالي

ماشفتة ودريت بساقج ابيض طوخ

لان من ورة التنورة ويلالي

اذا صرتي الي مااريدج اتعبين

انتي ارتاحي اجيبن خدم لاطفالي

اني عكس الزلم ما احب اهذر هواي

اسكت بالحجي وتسولف افعالي

مثل ضبة سعف واشتعل بيها النار

هيج اني احترك لو صرت مو مالي

عفتج بالشجر مجبور ما احويج

الترف مثلج اخاف تفززة سلالي

وجهج صافي جنة مراية العرسان

اعدل روحي لما توكف كبالي

وجهج ماادري شنو احتار بي يا لون

كمر لابس حجاب انتي تراوالي

يكرهوج ويقلدون المشي التمشي

الناصي امنيتة يعلة ويكره العالي

ماالوحج رغم يمي وادية طوال

يمشي بصفي بس ما ينكض خيالي

اليشوفج ينسة احلامة

التضحكيلة يحس الخير كدامة

شنو تشربينة ينشاف وتعرفة الناس

العندج ركبة لو جامة

لو بس اني سهلة العرب كلها تكول

اروحن فدوة لام شامة

♡♡♡♡♡♡♡♡