كبرياء العشق " الجزء الثاني من سلسلة العشق "

البارت الثالث

نوفيلا
كبرياء العشق
الحلقه الثالثه
&&&&&&&
تم الترتيب لتجهيزات الفرح باسرع ما يمكن وسط فرحه وسعاده من الكل لجواز الاميره نورسين بس عشق مش موافقه ع الجوازه ديه حاسه بشيء غريب بس ما دام اختها موافقه يبقي خلاص مش مهم هي شعورها ايه المهم سعاده اختها .
بالنسبه للاميره نورسين فكانت ف حاله من التشتت مش عارفه هي مبسوطه ولا زعلانه طب هي كده صح ؟؟ مش عارفه شعورها ايه نفسها ترسي ع بر !
الامير عمر ف هو بقي الشخصية الغريبه ف الموضوع مره تشوفه فرحان مره مش طايق حد مره بيضحك وبيهزر ومره قفل محدش عارف له طبيعه المفروض هو إللي طلب ايدها يبقي سعيد بس محدش فاهم حاجه
تم عقد القران وسط فرحه من المملكتين وكل واحد بيبارك للثاني بس إللي اتعقد قرانهم مش باين عليهم اي ملامح قربت منهم عشق بهدوء وابتسامه رسمتها باحترافيه
عشق : مبروك يا طفلتي وحضنتها ونورسين حضنتها جامد وكانت قربت تعيط وهي ف حضنها بس سكتت عشان متقلقش اختها بعدت عنها وبصتلها بابتسامة سعيده
نورسين : الله يبارك فيكي يا امي
هيام بعيون دامعه : مبروك يا نورسين .. مبروك يا حبيبتي
نورسين : الله يبارك فيكي جلالتك
وعد : مبرووووووووووك
نورسين بسعاده : عقبالك يا اميره
وعد : مبروك يا عريس
عمر بسخريه : لسه فاكره
وعد : نورسين الصراحه واخده الجو
غيث : الصراحه ايوه .. مبروك يا سمو الامير
عمر بابتسامة : الله يبارك فيك يا جلاله الملك
عشق بهمس موصلش غير لعمر : لو فكرت مجرد تفكير انك تزعلها صدقني هتندم يا عمر .. نورسين بنتي مش اختي ومش هسمح لاي حد يكسرها او يزعلها حتي لو مين
بصلها جامد وهو مستغرب علاقتهم ببعض إزاي علاقتهم بالقوه ديه ميعرفش ان ف علاقات مهما حصل بترجع اقوي من الاول ومش لازم اخوه بتبقي أصحاب فهيحصل ايه لو كانوا من دم واحد
عمر : متقلقيش عليها
عشق : مش هتقدر تمنعني أني مقلقش لان تصرفاتك كلها مقلقه
غيث : عشق خلاص .. سبيهم عشان يمشوا
نورسين : جلاله الملك فين
هيام : ف امور كتير ف المملكه معرفش يحضر
ابتسمت بسخريه عشق كان عندها حق لم كانت واخده جنب من الكل
مشيوا مع بعض لمملكه النصر مع اهل نورسين الجداد وعشق بتابعهم بصمت وجواها خوف مبهم مش عارفه سببه
غيث : يالا يا عشق
عشق بعمليه : جلاله الملكه مينفعش تمشي ف الوقت ده .. تقدري تستني للصبح وبعدين تمشي
هيام : ماشي يا عشق
عشق : الاميره عشق جلالتك .. الاميره عشق
وسابتها ومشيت وغيث بص لهيام باسف ومشي وراها وهي شالت ابتسمتها وحل مكانها حزن من تصرفات بنتها الغريبة بس طلعت ع جناحها بهدوء
دخل غيث ورا عشق بضيق
غيث : ينفع الطريقة اللي اتكلمتي بيها ديه يا عشق
عشق : غيث الله يخليك سبني ف حالي
غيث : من امتي بتتكلمي كده يا عشق
عشق : غيث لو سمحت
غيث : لا يا عشق مش كل مره الطريقة اللي اتكلمتي فيها مع الملكه ديه غلط إنتي مش كده
عشق بنفاذ صبر وهي عايزه تنهي الكلام : وانت تعرف عني ايه .. ما كل اللي كان ف حياتي كذبه ف كذبه حتي جوزنا اتبني ع كذبه انت متعرفش حاجه عن حياتي
غيث : انتي صح يا سمو الاميره صح
وسابها ومشي وهو مخنوق منها ومن كلامها عشق زي ما هي مش هتتغير ام عشق ف قعدت ع السرير بتعب وحطت ايدها ع راسها بتعب بقالها مده كبيرة حاسه بدوخه وحاجات غريبه بتيجي ف دماغها مش عارفه هي ايه بتيجي وتختفي الصداع زاد جامد
عشق بصراخ : غيييييث
سمع صوتها وجري عليها بخوف لقها قاعده وماسكه راسها جامد وبتتألم قرب منها وحضنها وهو بيحاول يهديها
غيث : مالك يا عشق
عشق بوجع : راسي يا غيث .. ااااه
عيطت من الوجع وهو مش عارف يعمل ايه
غيث ؛ هندهلك الطبيب
عشق بضعف : لا خليك معايا ارجوك
غيث : طب اهدي أسف .. اسف يا حبيبتي اني عصبتك كده
وفضل جنبها وهي بتتالم من الوجع
&&&&&&&&&&&
وصلوا القصر وعملوا المراسم وسط فرحه المملكه دخل كل واحد لاوضته ودخلوا اوضتهم
عمر بابتسامة خبيثه : مبروك يا نوري
نورسين: بلاش الابتسامه ديه
عمر : لانها بتسحرك صح
نورسين : نعم لا لام مفيش حاجه من اللي ف دماغك هتحصل
عمر بمكر : وانتي عارفه بقي اي إللي ف دماغي
نورسين بارتباك : انت قليل الأدب
عمر : انا بردو .. ده انتي إللي طلعتي مش سهله يا سمو الاميره .. شكلي كده اتخدعت فيكي
نورسين بغضب : نعم لا ع فكره انا محترمه جدا
عمر وهو بيقرب منها : طب ما تثبتيلي
طلعت خنجرها من تحت الفستان وهو اتصدم وبصلها : ايه ده
نورسين : لو قربت مني هموتك .. وابقي الاميره إللي موتت جوزها يوم الفرح
عمر : حرام عليكي ده أنا لسه صغير
نورسين : ابعد عني يا عمر احسنلك
قرب منها بردو وهي بترجع لورا وماسكه السكينه بتوتر وهو بخفه لقتها منها وقرب منها اكتر ولسه هيبوسها لقي دموعها نزلت
عمر بصدمه : نورسين إنتي بتعيطي
نورسين : ارجوك ابعد عني
عمر : حاضر حاضر بس اهدي انا طالع حالا
طلع برا وهي مسحت دموعها وابتسمت جامد
نورسين بابتسامه سعيده : دموع الست هي الحل .. مش تقوليلي خنجر يا عشق كنت عارفه انه مش هيبعد غير كده وبس الله عليكي يا سمو الاميره
وافتكرت وهي بتقول لعشق انها خايفه وعشق بتديها الخنجر وقالت لها خوفيه بيه وهو هيبعد وغيرت هدومهع بصعوبه ونامت بعمق اما بالنسبه لعمر فهو حس ان كرامته كراجل اتهانت و أنها مش عايزه انه يقرب منها لدرجه دموعها يبقي هي مش عايزاه طب وافقت عليه ليه ؟؟ سؤال فضل كتير دماغ عمؤ مش لاقي له اجابه بس اللي هو عرفه انه مستحيل يقرب منها تاني غير لو هي طلبت كده !
&&&&&&&&&&&
تاني يوم الصبح جت وعد وخبطت ع الباب بهدوء وعمر قام من نومه أو نقوله انه منمش اصلا غير هدومه بسرعه وفتح الباب ورسم ع وشه دور النوم بيراعه
وعد بمشاكسه : صباح الخير يا عريس
عمر : ايه اللي جابك دلوقتي يا بارده
وعد : بصبح ع العريس
عمر : سيبي العريس ف حاله
وعد بقلق : مالك يا عمر انت كويس
عمر : ايوه حد يبقي عريس وميبقاش كويس
صحيت نورسين وطلعت لقت وعد وعمر راحت عليها بابتسامة وحضنتها
وعد : مبروك يا نور
نورسين : الله يبارك فيكي يا حبيبتي
وعد : كل ده نوم
قرب من نورسين وحضنها من كتفها وهي اتجمدت مكانها لحظات : يا بنتي احنا عرسان لنا تكبري هفهمك
وعد بغضب مصطنع : تقصد تقول اني غبيه يا سمو الامير
نورسين وهي بتبعد عنه وبتقرب من وعد : لا طبعا إنتي ذكيه جدا
عمر : هحاسبك ع الكذب ده بينا يا نوري
وغمزلها وهي اتكسفت ووعد ضحكت
وعد : احم لا أنا أمشي لان وجودي غلط دلوقتي
عمر : كويس انك بتفهمي يلا امشي بقي
وعد : تعرف يا عمر قبل ما امشي هقولك حاجه ف قلبي .. انت متاكد انك امير بطريقتك ديه
جري وراها وهي جريت منه ونورسين بتضحك عليهم وافتكرت عشق واشتاقت ليها جدا رجع عمر وبص لنورسين باستغراب
عمر : انتي كويسه
نورسين : ايوه انا تمام
عمر : بقولك ايه ف حاجه كده مش عارف رايك هيبقي فيها ايه
نورسين بقلق : خير
عمر : ما تيجي ناخد فتره نتعرف ع بعض .. يعني انا وانتي اتجوزنا بسرعه منكرش انه كان بارادتي بس بردو متعرفناش ع بعض بالطريقة المناسبة
نورسين بابتسامة : يعني مش هتغصب عليا ف حاجه
عمر : لا مش هقرب منك غير لما تكوني عايزه القرب ده .. كويس كده
نورسين : بشكرك يا سمو الامير
عمر: لا من اولها كده بلاش سمو الامير دي .. اسمي عمر
نورسين : ممم قمر
عمر بابتسامة جذابه : انتي بتعترفي من اولها اني قمر اهو
نورسين بسرعه : لا لا ده أنا بهزر والله
عمر بحزن مصطنع : يعني انا مش قمر
نورسين بمشاكسه : مين الكداب إللي ضحك عليك امال لو مكنش عندك مرايه كنت هتعمل ايه
عمر بضيق : أمشي يا بت من هنا .. انا غلطان
ضحكت بصوتها كله وهوبصلها بتوهان وهو اخدت بالها وخدودها اتلونت بحمرت الخجل ومشيت من قدامه ع اوضتها تاني وهي ايدها ع قلبها
نورسين : مالك فيك ايه هتفضحنا .. اهدي بقي
ام عمر ضحك لما مشيت وبعدين سكت فجاه واتحولت ملامحه للغموض الغريب وساب الجناح وطلع برا
&&&&&&&&&&&
صحي من نومه بكسل وبص ع اللي نايمه جنبه لقاها صاحيه وبتبص قدامها بشرود وبس
غيث : مالك يا عشق حاسه بحاجه
متكلمتش بس قربت منه ورمت نفسها ف حضنه وهو خوفه زاد
غيث : عشق اتكلمي سكوتك ده بيجنني
عشق بصوت خافت يكاد ميتسمعش' مش عايزه حاجه غيرك يا غيث .. أنت الحاجه الحقيقيه ف حياتي
غيث بعدم فهم : أنا مش فاهم حاجه ف اي يا عشق طب ف حاجه حصلتلك امبارح
عشق : أنت ممكن تسبني يا غيث لاي سبب
غيث : عشق في ايه ارجوكي
غمضت عينها وحضنته اقوي من الاول ونامت وهو قلقان من كلامها مش فاهم حاجه
&&&&&&&&&&&
مر شهر ع الأوضاع ديه عشق بقت غريبه مع الكل حتي غيث ومحدش عارف مالها ونورسين بدأت شرارات الحب تنبض جواها ناحيه عمر وعمر لسه غريب ف تصرفاته محدش عارف يفسر حاجه بينهم
دخل عليها الاوضه : نورسين البسي ملابس عاديه وتعالي معايا
نورسين : لي هنروح فين وانت لابس كده ليه
عمر : هننزل ف المملكه بين الشعب
نورسين بفرحه : بجد
عمر : ايوه بجد .. اجهزي بقي
نورسين : ثواني وهلبس
طلع برا وهي قامت تلبس بسرعه وهي فرحانه انها هتطلع من القصر شويه لبست بسرعه وطلعت برا
نورسين : انا جهزت
بصلها جامد وابتسم ومد ايده
عمر : يلا
بصت مكان ايده جامد وحطت ايدها ف ايده ومشيوا مع بعض ونزلوا الاسواق ونورسين شافت عقد عجبها اوي
نورسين : احم احم
عمر باستغراب : ف ايه
نورسين بخجل : بص كده
بص مكان ما شاورت ولقي العقد وفهم تقصد ايه ابتسم بحنيه ومسك ايدها وقرب من التاجر واشتري العقد وهي كانت مبسوطه جدا
عمر : نمشي بقي
نورسين : هات العقد
عمر : متخافيش مش هاكله
نورسين : لا مش قصدي بس
عمر : يلا يا نورسين ربنا يهديكي
ومشيوا مع بعض ويقفوا ياكلوا ايس كريم ويكملوا مشي وهما بيبصوا ع احوال المملكه
عمر بمرح : اصبري كده بقي
وسابها وجري ناحيه راجل عجوز وحضنه وهي اندهشت من تصرفه
عمر بابتسامة سعيده : وحشتني يا راجل يا طيب
العجوز بوجه بشوش : عمر صح
عمر : ايوه يا طيب
العجوز : كل ده غياب يا عمر
عمر باعتذار : سامحني يا جدي والله كنت مشغول
العجوز بابتسامة : عرفت انك اتجوزت
عمر : اه وهي معايا. وشاور لنورسين وهي مستغربه طريقه تعامله مع العجوز ده
نورسين بابتسامة : السلام عليكم
العجوز : وعليكم السلام انتي الاميره بقي
بصت لعمر وهو هو راسه : ايوه انا
العجوز : ما شاء الله يا عمر زي القمر
عمر: ده بقي تقدري تعتبريه ابويا الثاني. كنت متصاب ف الصحرا وهو فضل جنبي لحد ما بقيت باحسن حال ومن ساعتها وانا معتبره ابويا
العجوز ببسمه بشوشه : انت انسان جميل يا عمر معندكش الانانيه ولا التكبر إللي بيبقي ف الأمراء دول .. امشي بقي عشان محدش يشك بس متنسانيش
عمر : متقلقش هجيلك قريب اوعدك
العجوز : سلام يا سمو الاميره
اكتفت بالابتسامه ومشيت هي وعمر ورجعوا ع القصر
عمر : اتمني تكوني استمتعتي ف الرحله ديه
نورسين : جدا انت مش متخيل بقالي مده مخرجتش
عمر : عدي الجمايل بقي
نورسين : بس انت بتتعامل مع الراجل ده كده ازاي .. يعني انت امير وهو من عامه الشعب ازاي بتعامله كده
عمر : مش كل حاجه بالمظاهر والمناصب يا سمو الاميره .. انا لو اقدر الغي حياتي كامير هلغيها واعيش انسان عادي
وسابها ومشي وهي واقفه تفكر في كلامه كل حاجه بيعملها وعملها مش وحشه جميله جدا .. انسان مبيفكرش ف الفروقات السطحية .. هي كده اتاكدت هي عايزه ايه .. هي عايزاه معاها هي عايزه تفضل بقيت عمرها معاه .. معاه هو وبس.
&&&&&&&&&&&
مشيت بهدوء وفجاه حست بدوار جامد ووقعت ع الارض والخدم اتلموا عليها وبلغوا غيث اللي جري بسرعه وشالها وطلب الطبيب فورا وهو بيحاول يوفقها وصل الطبيب وكشف عليها وسط قلقه الشديد وابتدت تفوق
غيث بقلق : خير يا طبيب
الطبيب بفرحه عارمه : جلاله الملكه حامل .. مبروك يا جلاله الملك
وقف مكانه بصدمه وهو بيستوعب كلامه وبعدين ابتسم ببلاهاه
غيث بفرحه : انت بتتكلم بجد
الطبيب : ايوه يا جلاله الملك .. مبرووك
غيث : شكرا ليك مصرفلك مكافأة ع الخبر ده
مشي الطبيب بعد ما شكر الملك وغيث بص لعشق إللي ساكته تماما ومفيش ع وشها اي ملامح
غيث بسعاده : مبروك يا عشق .. هيجلنا ولي العهد قريب
عشق ببرود مش مراعيه لمشاعر غيث إللي بالفعل حطمتها بالجمله دي : الطفل ده مش هيكمل .. الطفل ده لازم ينزل
&&&&&&&&&&&
قربت من الاوضه بسعاده قررت أنها تعيش معاه حياه طبيعيه هو ميستحقش منها المعامله دي ولو حصل اي هي مراته وهو بيحبها وهي مش هتنكر المشاعر إللي بدأت تتولد جواها لسه هتدخل جوا بس وقفت مكانها وهي سامعه صوت ملك مملكه النصر عالي وواضح
الملك بغضب : هتفضل كده لحد امتي .. مش عارفه تتخلص منها مش كفايه انها مش هتتولي العرش
عمر بحنق : بقولك ايه انا عملت إللي انت قولت عليه واتجوزتها تطلع ملكه تطلع بطيخ ميهمنيش
الملك بغضب اكبر : انت اتجننت بتعلي صوتك .. انا مضربتكش ع ايدك وقولتلك اتجوزها انت إللي متخلف واتجوزتها ع طول وادي الحكم هيفضل تحت ايد اختها يعني ملهاش لازمه
عمر : جلالتك عايز ايه وشوف اني بتكلم بهدوء
الملك : تطلقها وف الف اميره غيرها
عمر بضيق : خلاص طلقها انت
وسابه ومشي وهي حست استخبت بسرعه بعيد عن الاوضه ودموعها متجمدة ف عينها كل ده كان كدب كل إللي عمله معاها ده كان كذب كله كذب كذب اتجوزها عشان المملكه وبس هو ده همه الوحيد بس العرش !
★★★★★★★★
..يتبع
#Nemo