#متاهات_القدر

اول

#متاهات_القدر
بقلمي : فردوس عبد اللطيف
الاول : القصة حقيقية
بسم الله الرحمن الرحيم

مسحات الحزن العميقة التي يرسمها القدر على بعض الوجوه قد تزيدها بهاء لا أنكساراً.
السنه /١٩٩٦
انعام : وينك فيصل الحكني يمكن راح اجيب يبووووي وجع بظهري اخ يمه الحكني فيصل دا اموت
فيصل : اصبري خلي البس هدومي اروح اشوفلج تكسي صارلج تسع اشهر صابره عالخمس دقايق
انعام : ماتشوف بطني شكبرهه توم ولد وكحين تعبوني
اخخخخخخ يمه لحكيني حقك انت ماتحس بالالم
فيصل : رايح على ابو ماجد بلكي يوصلنا للمشفى
الحكني ابو ماجد ام عباس عدهه طلوك وهسه ماحصل تكسي بلكي توصلنا لمستشفى العلويه
ابو ماجد : صار خوي بس اطلع السياره من الكراج انت روح جيبها
انعام : وينك وين رحت اخ يمه لحكيني يبووووووي راح اجيب ولكم راح اموت
فيصل : امشي نروح ابو ماجد ينتظرنا بالباب جبتي ملابس الاطفال ؟
انعام : اي جبتهم وانت جبت فلوس ؟
فيصل : منين اجيب هو انت مخليه عندي فلس اشو مكشولتني وجاي تشوفين ظروفنا كوه عايشين
انعام : افتهمت بس تشكي بوجهي روح بالكنتور اوورف يمه
كعدت عالقنفه وتصرخ من الوجع
اكو علبه بيها خمسين دينار ظامتهن للولاده بسرعه لا تتاخر
فيصل :
اني فيصل موظف بسيط اعيش مع زوجتي انعام وابني عباس وحاليا زوجتي عدهه ولاده شفنا هم بالسونار توم ولد ظروفي الماديه صعبه جدا وزوجتي يوميه تحبل وعندي ايجار ومصرف البيت
منين اجيبلهم الراتب ميكفي وهي ماتفكر
بس تريد تمشي الي براسها ابني عباس
من اجه للدنيا عنده حاله نفسيه ياذي الاطفال من يطلع يلعب بالشارع ومرات يجي على بطن امه يضربها يكولها اطلع النونو مرات يبقى هادئ ومرات يتصرف تصرفات تحرجنا مع الجوارين والاقارب
بس نكول الحمد لله والشكر بلكي ذولي التوم يطلعون صاحين وما يتعبونا
وصلنا للمستشفى
اصبري ام عباس ترى هرجتي الدنيا بصياحج والله خجلتيني
دخلوها صاله الولاده وبقيت انتظر بره ميدخلون الزلم اتصلت باهلي وجتي اختي
وسيله : ها خوي بشر اشلونها انعام
فيصل : بصاله الولاده ميخلوني ادخل روحي شوفي الله يخليج
عادل : ها خوي محتاج شي ؟
فيصل : شكرا عدولي ربي لا يحرمني منكم انتو الخير والبركه
اخوي عادل ضابط بالجيش كان يحب بنت جيرانه لكن اهلها رفضوا يزوجوها بحجه محجوزه لابن عمها
وحبيبته وره ماتزوجت توفت بالولاده
وراها رفض يتزوج اي بنت يكول ماتحلى بعيني امراة بعدها حبيبتي تحت التراب واني اتزوج واتمتع بالدنيا
وسيله : مبرووووك خويه جابت توم ولد يخبلون ربي يحفظهم الك ويجعلهم من الذريه الصالحه
فيصل : اشكرج اختي
عادل : مبروك فيصل ربي يحفظهم تفضل
فيصل : شنو هاي فلوس ؟
عادل : اعرف بيك ماعندك لا تكابر اخذهن واسكت
فيصل : دمعت عيونه اشكرك خويه
عادل : ربي يحفظهم الك شراح تسميهم ؟
فيصل : كرار وعلي
عادل : عاشت الاسامي
وسيله : خويه مرتك ودوهه للردهه
فيصل : دنك باس راسها ... الحمد لله ع سلامتج ام عباس
انعام : الله يسلمك
فيصل : اشو صوتج راح هههه هرجتي المستشفى خبصتيهم
انعام : انت عاد ماعندك غير تحجي علي وتقلد
عادل : وسيله ابقي يم ام عباس واني وفيصل رايحين للبيت
انعام : دير بالك على عباس هسه مخبل جيرانه واكيد يدور علينا ويبجي
فيصل : رايح
********
اليوم الثاني
فيصل : تعال عباس شوف اخوتك بوسهم شوف شكد حلوين
عباس : اريد اشيله بابا
فيصل : لا بابا بعده صغير
انعام : هذا شحايسوي بينا بالبيت اكيد راح يغافلني ويروح ياذيهم تعبني بدينيتي عبوسي
فيصل : شنسوي قابل نذبه بالشارع ابنا وغصبا علينا نتحمله
وسيله : الدكتوره كتبتلج خروج كومي خلي الم اغراضج
عادل : خوش حتى اوصلكم بالسياره
***********
انعام : رجعنا للبيت والاقارب تجي تتباركلنا وكلمن يجي يسأل نفس السوآل
اشلون راح تدبرون عيشتكم ويه هالطفلين
فيصل موظف وراتبه ميكفي العيشه والايجار واحنا ويه ثلاث اطفال شلون راح تدبر ما اعرف
فيصل : اني طالع
انعام : وين ؟
فيصل : مو تعرفين من ارجع من الدوام اتغدى وانام وراها اطلع للكهوه ساعه انفه عن نفسي البيت يخنكني
انعام : واني شنو هنا الخدامه الاليه ذولي التوم تعبوني واحد هم بس يبجي الثاني يكمل واني باقيه الليل كوله سهرانه وياهم
وانت نايم بحجه الدوام
فيصل : انتي شترديني اكابلج واكعد اسوي مميات واغسل حضاين ؟ اني علي مسؤليات اكبر من هالحجي
شتردين كولي ؟
انعام : انت اناني شوفلك شغله العصر متت من غسل الحضاين هسه لو عدنا فلوس تشتريلي حفاظات مو كاعده اغسل بيهن من الصبح لليل وانوب توم مو طفل واحد
اايدي راحت من غسل الحضاين كوله علمود توفر كم فلس
الباب تك تك تك
فيصل : منو ؟
عادل : اني عادل اشبيكم صوتكم واصل لراس الشارع
انعام : تعال خويه عادل شوف اخوك لا راتبه يكفي والعيشه صعبه والجهال يردون حفاظات وحليب ومجاي الحك وعباس يرادله علاجات وادويه وواحد يركض وراه ماخذ كل وكتي تعبت ومرتي فوك هذا كوله مدوختني بلسانها
عادل : تعال فيصل عندي حجايه وياك
خويه ام عباس سوينا جاي الله يحفظج
فيصل : خير خويه شصاير
عادل هاي اشبيك وجهك اصفر ماكو شي
بس عندي اقتراح فكر بي واذا وافقت راح يساعدكم ويمكن يحل مشاكلكم ويخففها
فيصل : الله وايدك لكيتلي شغل ؟
عادل : شغليش وهو انت تعبان بالدوام
خويه شوفني اني وحيد لا تزوجت ولا راح اتزوج وبيت ابوي البنات قايمين بواجبي وواجب الوالد ومع هذا حياتنا ملل وفراغ
انطيني واحد من ولدك التوأم اربي ونتسلى وياه يونسنا بالبيت
وانتو هم تخف مشاكلكم ومصاريفكم
فيصل : دمعت عيونه
اشلون خويه انطيك ظناي ترى الضنى غالي اشلون اتخلى عنه
عادل : الي يسمعك يكول راح اودي لغير محافظه اشو بيتنا فرعين عنكم يمته ماتريد تشوفه اجيبه يمك
بعدين انعام اعصابها تعبانه والضغط عليها هواي مبين من كلامها وجهه اصفر حتى نوم مجاي تنام
فيصل : منو يكول تقبل تنطي ظناها
عادل : انت اسألهه وفكرو بالموضوع واني حاضر اتكفله من كل الجوانب وراح يتدلل دلال عدنا والبنات مايقصرن
فيصل : ياخويه كلبي نغزني على وليداتي
بس كلامك معقول هو راح يتربي بيت جده بيت ابوي الي اني تربيت بي يعني مو عند غربى
قابل وبن حايروح ؟
اي صح كلامك مو بعيد
انعام : تفضل خويه الشاي
اشبيك فيصل اشو تحجي لوحدك شكو شصاير ؟ احجي وكعت كلبي
عادل : اترخص وانت فيصل انتظر جوابك
مع السلامه
انعام : شكلك اخوك احجي وكعت كلبي
فيصل : عيونه مغوركه
عادل يكول انطوني واحد من التوأم اربي وادلله واخفف عليكم المصرف وووووو
اكولج هو احنا جاي نرفس النعمه من نشكي لو شنو ذولي رزق رب العالمين انطانياهم واحنا بس نشكي ترى حرام
انعام : يمه وليداتي (حضنتهم )
اشلون اتخلى عن ابني
تالي من يكبر مراح يكول عفتيني لبيت جدي وبقيتي اخويه
فيصل : هسه صارو عزاز لعد سكتي لا تشكين حمدي ربج واشكري
انعام : بقيت الليل كوله افكر مانمت اباوع على ولدي واكول لا ما اتخلى عنهم ذولي ظناي قطعه مني
فيصل : هاي بعدج مانايمه ؟ نامي نامي ومراح ننطي ولا واحد
*********
بعد مرور اسبوع
انعام بالحمام تسبح
واحد من التوأم يبجي
عباس : ها جوعان حبيبي هسه اجيبلك اكل اروح للمطبخ اجيبلك تمن لو تريد خبزه كول حبيبي
طلعت انعام من الحمام وتشوفه لازم الملعقه ويوكله تمن وبيده فخذ دجاج
انعام : يبوووووي ولك شتسوي ولك تريد تموته ؟
عباس : جاي اوكله جوعان يبجي خطيه
انعام : ولك اني خطيه ولك وخر ضربته
رجع ضربها وكع الماعون بالارض وكسره
وراح للهول كسر النفاظات
وانعام تصرخ وتركض وراه تريد تضربه
فيصل : شكو شصاير صوتج واصل لراس الشارع
انعام : لو تدري شصار
وكعت انعام تخربطت
فيصل : ياربي شسوي
الوووو عادل الحكني جيب وسيله وزهراء مرتي تخربطت والجهال منكدر نعوفهم وحدهم
وسيله : ها اشبيها انعام
فيصل : خلي ناخذهه للمشفى ونعرف
*******
وسيله : ابو عباس مرتك حامل كتبولهه علاج عدهه فقر دم
فيصل : يبوي هم حامل مو كتلهه اخذي احتياطات
عادل : هذا رزق ربك لا تفكر هيج
*******
فيصل : رجعنا للبيت وانعام تبجي
انعام : شراح اسوي فيصل اذبه للطفل لو حرام ؟
فيصل : الحل الوحيد تنطين واحد من التوأم لعادل شويه نخفف الضغط عليج
انعام : شتسوي سوي اريد انام تعبانه خلي وسيله تبات يمنه اليوم

اليوم الثاني
وسيله : يبوي الله يساعدج انعام ماخلوني انام الليل كوله يبجون انوب انطي لواحد مميه وارجع انطي مره ثانيه عبالي اخوه
تالي الثاني يصرخ ومن انطيته المميه لكيته ميت جوع سوده علي عرفت مامنطيته وذاك الثاني يرضع شويه ويعوفها شبعان الحلو
شكلهم متشابه فدوه لكلبهم
انعام : شفتي شكد جاي اتعب بتربيتهم
واخوج ميقدر هالشي
وسيله : هو انت تعبانه وياهم ليش ما اخذتي احتياطات ليش حبلتي ؟ما فكرتي الاطفال مسؤليه
انعام : مو دا ارضع عبالي ما احبل واكلتها
بس عباس يرادله واحد يركض وراه
اكولك فيصل خابر عادل خلي يجي ياخذ واحد من الولد اني تعبت بعد مابي حيل
ولو يريدهم اثنينهم هم خلي ياخذهم
فيصل : راح اخابره مو بعدين تبجين وتاكلين راسي ترى الموضوع مو لعب اذا ياخذه بعد يصير ابنهم
انعام : خلي يجي ويختار ياهو منهم يريد
*******
عادل : ها خوي قررتوا تنطوني واحد من الولد
فيصل : اي خوي انعام حامل وتعبانه ويه عباس مجاي تلحك
عادل : خلي يمنا بالبيت وعود من يكبر وظروفكم تستعدل نرجعه الكم وين رايح لبيت جده
فيصل : ما اوصيك خويه عادل
عادل : هذا من اليوم ابني اني حرمت نفسي من الزواج وفاءا لحبيبتي وربي عوضني بواحد من ولدك
فيصل : اختارلك واحد منهم
عادل : هذا ابو عيون الحلوه شوفه اشلون يباوعلي
فيصل : هما اثنينهم عيونهم سود وحلوه بس واحد وجهه طولاني والثاني وجهه اقل خلي ابوسه واودي لامه كاعده بغرفتها تبجي خلي تودعه
انعام : ها فيصل اختار كرار ؟
انطينيا خلي ابوسه واشمه يمه غصبا علي لو بايدي ما اعوفك
شمته وبوسته وتخلت عنه
اخذه فيصل هم شمه وباسه وانطاه لوسيله
عادل : خلي نروح
فيصل : ها خويه كاعدين .. عيونه مدمعه
خويه هاي مميته وهذه ملابسه وسيله ما اوصيج
عادل : ابنك بعيوني راح ادلله دلال
********
عادل : وصلنا للبيت
فرحان طاير من الفرح بهالمخلوق اللطيف فدوه لكلبه يدخل بالكلب طفل برئ ميعرف يميز الوجوه
وسيله : لا عادل اكيد يميز اني قريت يكولون الطفل يشتم ريحه امه ويعرفها فدوه لكلبه ينحب
عادل : اليوم اني ابقى يمه خلي ينام بغرفتي
وسيله : اخاف تاخذك النومه ويكعد يبجي
عادل : انت تعبانه ومبين عليج النعاس الليله اني اسهرله
ابو عادل : حبيبي كرار هاي بعده بالكماط وانتو تعلقتوا بي
لعد لو تشوفون ضحكته ومن يحجي لو من يحبي
الطفل بالبيت نعمه من رب العالمين
ام عادل : يمه وسيله اول شي بدلي حفاظته وغسليله وروحي ارتاحي وخلي يمي
عادل : يمه اني الليله لازم خفاره عليه عوفوني
راح اروح اجيبله حفاظات وحليب عوفي حفاظات القماش كلهن ذبيهن هذني يمرضون من اليوم اني مسؤل عليه
******
هكذا هو القدر ياخذنا الى المجهول تابعو ني وخلي نشوف الطفل البرئ كرار وين تاخذه الدنيا
راح يعيش سعيد ومدلل ام ماذا ؟
انتظروني في البارت القادم
******بقلمي فردوس عبد اللطيف ******