#متاهات_القدر

ثاني

#متاهات_القدر
بقلمي : فردوس عبد اللطيف
ثاني
ياولدي قد صعب عليّ الفراق ,, وملئ القلب لك اشتياق
والحزن قد لف من حولي رداءه ,, والدمع كالنهر شلال ورقراق
فيصل : اشبيج انعام ليش تبجين ؟ مو اني كلبي انفطر
انعام : اشلون ما ابجي هذا ابني قطعه مني غير الضروف جبرتنا نتخلى عنه راتبك ميكفي وحصار وكولشي غالي
عيشة الفكر ماتراد
فيصل : كلما اباوع لعلاوي اتذكر كرار وكلما يبجي اكول هسه هم يبجي خاف جوعان خاف ينسون ينطو ماي
انعام : الله يصبرنا على فراكه غصبا علينا
واكيد اهلك مراح يقصرون وياه
فيصل : ادري اهلي مراح يقصرون بس كلبي كلب والد ابني جان ليليه نايم يمنا بالغرفه والليله اول ليله كرار بعيد عنا
انعام : شلون راح اكدر انام وابني مو بحضني همزين علي معوضني وعباس مامقصر
فيصل : نامي نامي باجر تصبحين على شغل البيت وهوسه عبوسي تنسين كرار
انعام : اخاف من يكبر يلومني عفته بطفولته وتخليت عنه ؟
فيصل : معوده لو ما اعرف اخوي عادل حنين وكلبه طيب مجان انطيته الولد بس اخوي واعرفه
********
عادل : وسيله هذه حفاظات ومميات جديده وحليب وباجر اريدج ترحين للسوك تشتريله ملابس جديده وهاي الخلاكين مال انعام ذبيهن بالزباله راح اخليلج فلوس اريدج تشتريله كولشي يحتاجه ماريد ينقصة شي
وسيله : هاي هوايه خويه
عادل : ميخالف اريده يتدلل وراح اشتريله سرير صغير واخلي ينام عندي بغرفتي اني اسهر عليه بالليل
زهراء : وسيله هذا مسويها تعالي شطفي
وسيله جايه جايه من تتزوجين جهالج منو يشطفهم تالي بايديج الاثنين وانت الممنونه
عادل : ولج هذا كروري تستنكفين منه
ام عادل : اكولكم انعام اشلون قبلت تنطيكم الولد غير كلب عليها نسوان اخر زمن
وسيله : يمه ماتلحك عبيس مخبلهه والحمل ساطرهه وحتى اكلهم مو صحي عدهه فقر دم ودوخه
ام عادل : يمه هالحصار موت العالم حتى اكو جهال جاي يجون مشوهين بسبب قله الغذاء
وسيله : يمه شفت وحده فقيره جايبه ابنها للمستشفى شكله مثل ذولي اهل المجاعه دكول ماعدهه حليب بصدرهه وماعدهم يشتروله حليب معيشته عالماي والشربت والطفل منظره يبجي ودكول منين نجيب وعندي كوم لحم
ام عادل : مدري شوكت يشيلون هالحصار ماتت العالم بحظهم وبختهم
عادل : جيبي يمي بغرفتي وحضريلي المميات وخلي الماي بالترمز واني اكعد انطي المميه
وسيله : خوي عندك دوام باجر اخاف تتاذى من تسهر
عادل : اني عسكري متعلم عالسهر ومتعود على كعدة الصبح
وسيله : اذا ضوجك كعدني ولو اني نعسانه لان البارحه مانايمه بس يستاهل كروري
عادل : ما اكعدج عود الصبح من اروح للدوام لاتقصرين وياه اريدج تدرين بالج عليه
وسيله : تدلل خويه
**********
مرت الاشهر وكرار بحضن العم عادل وكل يوم يتعلق بي اكثر من الي قبله وبدت سوالفه الحلوه وحركاته واول مانطق كلمه بابا وكانت لعادل الي طار من الفرح ويشوف ابنه يكبر ومتعلق بي وينادي بابا
من يدخل عادل للبيت كبل على كرار يحضنه ويبوسه المحبه الي انزرعت بكلب عادل لهذا الطفل اكثر من محبه امه وابوه
ام عادل : يمه عدولي فيصل يريدك تروح عليه مرته عدهه ولاده
عادل : والجهال منو يمهم ؟
ام عادل : جايه اختهه بالبيت
عادل : صبولي غده علما العب ويه ابني وراها اروح
******
في المستشفى
عادل : ها خويه اشو واكف هنا منو يمهه ؟
فيصل : جيرانه ام ماجد وياها
+++++
ام ماجد : مبروك ابو عباس جالك ولد وام عباس ودوهه للردهه ساعه ويطلعوهه
عادل : مبروك على ماجاك يتربى بعزل
شراح تسمي ؟
فيصل : محمد اسمه بركه بالبيت
عادل : صلوات على محمد وال محمد
خويه فيصل بعد اخذ احتياطاتك كافي بعد جهال صح هما نعمه من رب العالمين وكل طفل يجي رزقه وياه بس اول ربي ذولي وبعدين عود خلفوا
فيصل : هي غير المرأة تعرف بهالامور اشو هي جنها متونسه على هالوظعيه
هو اني المشلوع كلبي بس جيب جيب فلوس ودي مستشفى وزور طبيب وهي ماعليها غير تحبل وتجيب
عادل : خويه هذه سنه الحياه انت بس دير بالك ع صحتك
*********
عادل : وسيله ليش نيمتي كروري
وسيله : اووو شكد بجى يدور عليك كلسع يروح لغرفتك ويكول بابا ومن يدور بفراشك يبجي يباوع عالباب ويبجي
عادل : حبيبي راح اكعده
وسيله : عوفه نايم يم زهراء
عادل : اني متأكد مينام الا على ايدي
مو كتلج فاتح عيونه
كرار : فتح عيونه وحضن عادل
عادل : فرحت الدنيا بعينه اخذه لحظنه ونيمه على ايده
******
عادل هو الاب والام لكرار بنفس الوقت محنته وحبه لكرار عوضت حنان الام وعطفها
وبالنسبه لعادل عوضه حرمانه من الاطفال
انعام وفيصل انشغلوا باطفالهم الثلاثه وبمرور الوقت تعودوا على فراك كرار مشاغل الحياة والظروف الماديه الصعبه الي يعيشها الموظف العراقي في ظل الحصار الاقتصادي وقله الرواتب جعلت الموظف في عوز مالي
اصعب شي بالحياة لما تكون موظف وخريج ومتكدر تسد احتياجات بيتك واولادك الي تتمنى تلبسهم احسن ملابس وافضل اكل ...
لكن هكذا هي ظروف العراق والمواطن العراقي
******
عادل : وسيله هاي كيكه عيد ميلاد كروري الثاني
اليوم عمره حايكمل سنتين عزمت بيت فيصل عالعشا يجون يتونسون ويانا سويلهم عشا
وسيله : مو انت تعرف انعام من تشوفك مهتم بكرار ومدلله وتشوف ملابسه والعابه تضوج وتشعر بالغيره لان ولدهه الباقين وظعهم مختلف حسره عليهم لعبه ام الربع
عادل : كرار ابني ولازم اهتم بي لان اني المسؤل عنه وتعهدت بهذا الشي واني الله مفضل علي وين اودي راتبي غير اسعدكم وادلله ...لعد المن اجمع الفلوس خلي حبيبي يتدلل وخليهم يشوفو عندي مدلل
******
بالعيد ميلاد كرار ملابسه مختلفه والعابه والهدايا الي مشتريهه اله عمه عادل زرعت الغيره بكلب انعام لان تشوف ولدهه محرومين من هالدلال وحتى لو كان كرار ابنها
انعام : تعال حبيبي كرار بحضني اني ماما
كرار يبجي ويصرخ ميقبل الا يروح لحضن ابوه عادل الي رباه وتعود عليه
انعام : فيصل ميصير هيج احنا لازم نخلي كرار يجي يبات يمنا بعدين ميعرفنا هذا ابنا ولازم يعرف احنا اهله
فيصل : هو دقيقتين مجاي يقبل تحملي انوب يبات يمنا
اني ابوه من اريد ابوسه يبجي ويركض على عادل
انعام : لا فيصل احنا ما تفقنا هيج كوله لاخوك يجيبا يبات عدنا ليله ويتعود علينا
فيصل : هسه حنيتي وتردي اشو ذيج الايام من اكولج نجيبه دكولين خلي مرتاح هناك وين تجيبه على عمري
انعام : هسه عوف هالحجي روح احجي ويه اخوك
******
فيصل : عادل باجر اريد كرار يبات عدنا يلعب ويه اخوته ويتعود علينا اشوفه مستغرب من عدنا خلي يجي يلعب ويه الجهال
عادل : انقهر بس ميكدر يرفض طلب اخوه هم ابنهم
فكر بنفسه اشلون حايكضي الليل وكرار بعيد عنه
صار خويه باجر اجيبه يبات عدكم
اليوم الثاني الساعه ١١ونص
الباب تك تك تك
فيصل : منو ؟
عادل : اني
فيصل : هلا هلا بيك خوي ....
هلا بكرار يابعد روحي تعال بابا خلي اشيلك
كرار : لا لا بابا ظل يبجي وحضن عادل ويصيح بابا
عادل : تعال بابا العب ويه الجهال
انعام : تعال ماما خلي احضنك اريد اشمك
كرار : وا ه واه بجي وصريخ وياشر ع عادل
عادل : تعال باباتي العب ويه الجهال
نزل كرار يلعب ويه اخوته وعينه على عادل لا يعوفه
عادل : ها فيصل اريد اروح وراي دوام ما اكدر اتأخر
فيصل : بابا كرار ابقى يمنا تنام ويه الجهال
كرار : بابا بابا وحضن عادل
بعد ما طلعوا
انعام : شفت فيصل هاي النتيجه ابني ما يريدني ومايقبل احضنه وابوسه ويكول لعادل بابا مجلب بي عبالك احنا غربى مو جنه كاعد بطني تسع اشهر
فيصل : هسه شتردين منه خلي مرتاح ومدلل اشو مرتب ونظيف وصحته زينه
انعام : هذا ابني حملته بطني تسع اشهر وهاي تاليتهه
فيصل : صبري فتره وهم نجيبه يمنا لان هو يحب اخوته ويلعب وياهم ويتونس من يجي يمهم
*******
فيصل : خويه عادل هسه كرار كبر وجاي يفتهم عمره صار سنتين ونص اريدك تجيبه يمنا يبات ليله واريده يتعود على اخوته وتصير بينهم محنه
عادل : صعب عليه يفارك كرار لكن ميكدر يرفض طلب اخوه لان مهما كان ابنهم رد عليه بحزن
صار خويه يوم الجمعه اجيبه يمكم الصبح
يوم الجمعه الساعه ١١صباحا
انعام : فيصل روح شوف منو بالباب صوت كرار وعادل
فيصل : يا هلا يا هلا تفضل خويه
حبيبي كروري وين هالغيبه تعال بابا
انعام : يمه وليدي تعال خلي اشيلك يابعد امك
كرار يصرخ وياشر على عادل بابا بابا
فيصل : عوفي انعام جاي تخنكي نزلي يلعب ويه الجهال
عادل : مقهور وعيونه مدمعه خلي يمكم وهذه اغراضة اني رايح ....دنك باس كرار وطلع
كرار يركض عالباب ويصرخ بابا بابا
الطفل ما تحمل ابوه يعوفه وبقى يبجي
انعام : تعال اكل عساك ما اكلت اشبينا احنا مانعجب شتبجي على عمك ولك حملتك تسع اشهر بطني وطلوكه وهاي تاليتهه عادل يصيح بابا
الساعه ٤ ونص عصرا
فيصل : رايح اجيب صمون تردين شي بعد ؟
انعام : جيبلنا جبن وياك
******
فيصل طلع من البيت وصل براس الفرع
ها خوي عادل شعندك كاعد هنا ؟ تدخن جكاير من شوكت انت هنا ؟
عادل : عيونه مغوركه وحزين ها فيصل اني هنا كاعد ماكدرت اروح قلقت عليه
فيصل : يعني انت هنا من تركت كرار عدنا ؟ كاعد تدخن وحزين من ساعه ١١ لحد الان انت صدك تحجي
انعل ابو كرار لا ابو
كوم خويه كوم اخذه تعال وياي للبيت
عادل : دخلت للبيت لكيت كرار مفرفح ويباوعلي يشيكيلي من البجي
حضنته وغسلت وجهه تعال ابني تعال
انعام : خبصنا من البجي روح لاهلك روح
*********
كرار عمره ثلاث سنوات
فيصل : ها بويه كروري شوكت تجي عدنا ؟
عادل : خويه عندي سفره معايشه مده اسبوع بالبصره اذا تريد تاخذ كرار يمك تخلي يلتهي ويه اخوته
فيصل : ياريت احنا نتمنى بس اخاف يفكدك ويبجي
عادل : راح اشتريله حلويات واجيب العابه يمكم وبايسكله خلي يلعب ويه الجهال يلتهي ولو فراكه صعب علي بس مجبور هذا واجب وما اكدر اعتذر عنه
بس ما اوصيك فيصل كرار تخلي بعيونك ترى اني ما اخلي
يضوج لو يبجي كلما يضوج اخذه اطلعه يتونس ونرجع
*******
سافر عادل وكلبه وتفكيره مع كرار بس مجبر يروح ويعوفه يم اهله
بس كرار يبجي ويصيح بابا بابا ويروح عالباب ويأشر
انعام : فيصل سكته ترى صوته زرف اذني
فيصل : تعال بابا خلي اخذه نتمشى بره
انعام : روح ونسه روح ماعدنا شغل وعمل غير نونس كروري مو ذولي ولدك كاعدين وساكتين
******
كرار : صحيح كنت طفل بس اتذكر كل تفاصيل الي عشتها لحظه بلحظه واكو تفاصيل سمعتها من ابوي عادل وعمتي وسيله وجدي وعمتي زهراء وابوي فيصل
الاسبوع الي بقيت بي بيت اهلي كظيته بجي كلما اتذكره ابجي بس اخوتي احبهم واحب العب وياهم
بس امي من تصرفاتي كرهتني ونتزعت من كلبها كل امومه ومحبه الي
بنفس الوقت اني ماكنت اعرف ان امي انعام وابوي فيصل كل الي اعرفه عادل هو امي وابوي
بابا عادل هو الدنيا الحلوه ..هو السعاده هو الضحكه
بعد ما كمل اسبوع بالبصره اجه لبيت ابوي فيصل كبل من الواجب
عادل : السلام عليكم
فيصل الحمد لله ع سلامتك
عادل : وينه وليدي وين كروري
تعال حبيب بابا تعال يا بعد كلبي مشتاقلك تعال لحضن ابوك
كرار : بابا بابا حضنت عمي وجلبت برقبته ما عفته اخاف اعوفه ويروح بقيت مجلب بايده واخوتي يردون يلعبون وياي لكن بابا عادل هو الامان الي كنت اشعر بي وياه
رجعت لبيت جدي ونمت ذيج الليله بحضن بابا عادل
*********
كرار : مرت الايام وعمري صار خمس سنوات واني  عند بيت جدي ويه بابا عادل
انعام حبلت وجابت ولد
جدي سايق قطار نروح نوصله للمحطه ونصعد وياه وبابا عادل شايلني ومن يمشي القطار ننزل نتدحرج ونضحك
كانت هذه لعبتي المسليه اشوفها مغامره مثل اي مغامره كارتونيه ومن نوكع بالارض يبوسني وينفض ملابسي ويشتريلي حب ابيض احبه هواي نتمشى ونكرز الحب واحنا بقمه السعاده
من احزن يحزن وياي ولما افرح ابتسامته تملي وجهه
عادل : فيصل راح اسجل كرار بالمدرسه الي يمنا واني اودي وارجعه
كرار : بابا شسوي بالمدرسه ؟
عادل : تدرس وتلعب وترسم
كرار : صدك اكدر ارسم مثل ما ارسم بالبيت ؟
عادل ليش لا ارسم
*****
كرار : بابا سجلني بالمدرسه ويوصلني بايده ومرات ياخذني وياه للدوام لان ضابط باحد الدوائر التابعه للجيش
عادل : راويني اليوم شدرست ؟
كرار : شوف رسمي بابا
عادل : الله هذا بستان وزرع وخضار حلو رسمك بابا مو مال طفل بصف اول انت موهوب
كرار : احب البستان والزرع وديني للحديقة خلي نشوف حديقة الحيوانات بالزوراء
عادل : امشي نروح يدلل كروري كم كرار عدنا
كرار : بابا صعدني بالملاعيب
عادل : امشي اصعدك
كرار : من صعدت بالالعاب حسيت بدوخه وجهي صار اصفر ورجعت الاكل (تقيأت )
عادل : اشبيك وليدي كرار خلي اخذك للطبيب
كرار : اخذني للطبيب عندي التهاب لوزتين وصخونه وكتبلي علاج وابر وبابا من ابجي من الم الابره يبجي وياي
تغيبت عن الدوام يومين لكن بعدني مالي خلك بس لازم اداوم
اخذني بابا للمدرسه وانطاني ورقه
عادل : بابا انطي هذه الورقه للمدير
كرار : شنو بيها ؟
عادل : انت معليك
كرار : انطيت الورقه للمدير واخذني من ايدي وطلع وياي لكيت بابا كاعد بالسياره ينتظرني
عمي كانت رتبته عاليه والكل تهابه وتحترمه ويسمونه الطيب
طلع وياي المدير وصعدت بالسياره وبوست بابا وسلم عالمدير وشكره
******
سنه ٢٠٠٣
وسيله : الو عادل امي تخربطت
عادل : اخذناها للمستشفى لكن مالحكنا عليها توفت الوالده وعافتنا لوحدنا
ابوي دخل الحزن لقلبه
الكل مشغول بالفاتحه
كرار : البيت هوسه واني اعرف بيبيتي ماتت بس ما استوعب شنو الموت التهيت العب ويه اخوتي وجنت اعرف بيبيتي بعد ماترجع للبيت
بابا عادل خفارات وانذارات جياته للبيت قليله لان البلد متهدد بحرب واحتلال وهو كعسكري لازم يلزم واجبات
بقيت عيني عالباب انتظر بابا عادل شوكت يجي وياخذني مثل ذيج الايام ويلعبني
حتى جدو وعماتي حزنوا ع وفاة بيبيتي ومحد اله خلكي
انتظروني بالبارت القادم خلي نشوف الى اين ياكرار تسوقك الاقدار
*****بقلمي فردوس عبد اللطيف******