حبيته شرقاوي

الجزء الخامس (6 حلقات)

(#حبيته_شرقاوي💛)
للكاتبة : 🌷ندى أحمد🌷
الحلقة [25]

ميسم : تمام به ! (وتشبح للكوفرات وتقلب فيهم )
فرج يشبحلها ويراقب فيها ،
مراد شبح لفرج : ترا شيشة المية طالع ريقي ناشف
ميسم : سامحنا !
مراد : ولا يهمك .. ( وهو لاهي في اللابتوب ) ترا اختي النقال !!
ميسم طلعت النقال من الشنطة !!
ميسم : تفضل ،
ركب مراد النقال بالوصلة للابتوب

ميسم بنظرة جديات : معليشي استاذ مراد نبي كل شي قدام عيني !!
(هالميسم بعينها ادير فيها هههه)
مراد اضايق : هذا سر مهنة يا ابلة ،
فرج شبح لميسم وشبح لمراد ،
ميسم : ماتخافش ماعنديش خلوق ليها الدوشة هاذي ،
مراد كيف بيفك النقال من الوصلة : اهو يا ابلة خوديه النقال وبري لاي محل تاني . لكن مش حيخدمك الخدمة لنخدمولك فيها ،
فرج خش في النص : تعدي تجيب قهوة مراد ؟ (وغمزله بمعنى هدي وما تتكنطاش )
ناض مراد من مكانه ، وطلع ،
فرج شبح لميسم : ماتخافيش في الحفظ والصون .. انا نتملك اموره الجهاز وماتخافيش
ميسم : قصدي اي وحدة ممكن تخاف على خصوصياتها مفروض ياخدها بروح رياضية
فرج : صح كلامك ، توه ندير كل شي قدامك ، بش تطمني !! (ولفت اللاب توب لميسم وقعد يدير في شغله بعد ربع ساعة فتح الجهاز ، )
فرج شاف الخلفية لقاها "صورة محمد " سارة دايرتها خلفية على ما تموت فيه
انخلع فرج وقعد يخمم ( هظا محمد !! زعما هذي البنية يكلم فيها ؟ يا خسارة !! )
فرج لميسم ومد الجهاز لميسم : اهو انفتح ، تفضلي (ومدلها الجهاز)
ميسم فرحت : باهي بارك الله فيك ، قداش حسابك ؟
فرج : ما ادوري شي خلاص ،
ميسم : لالا غر قول ، بالنسبة ليا كل واحد وياخد حقه ،
فرج : باهي تمام ،
ميسم : كم به ؟
فرج : عادي كيف ما يساعدك !!
ميسم فتحت الشنطة عدت 50 ومدتهمله ،
ميسم : شكرا (ومبتسمة)
فرج كل مايلقى روحه سارح فيها يفيق ويحول عيونه ،
فرج : العفو ،
طلعت ميسم ، وركبت السيارة ،
خش مراد بطاستين قهوة ووجهه مقلوب ، : شن كملتلها ؟
فرج : لا تمام الامور !!
مراد : تعرف كان نندري عليها بديرلي هكي ره من غاذي قلتلها لا ،
فرج : معليشي ما تعدلش تصير .. انت صحب محل بيجنك ناس اشكال الوان ضروري يكون عندك صبر وصدر واسع ، منك غادي الجهاز خلينا نشوفوله الاي سي .
مد مراد الجهاز لفرج ،
*عند ميسم وصلت قدام الحوش *
وهي راكبة من درج : ايوه نجوى افتحيلي اهو جيت ،
نجوى ناضت متفاجئة وقالقة : شن صاار فتحتيه .
ميسم : اي غر افتحي هيا ،
مشت نجوى فتحت الباب وخشت ميسم ،
وهما في الدار صكرت نجوى الباب وراها بالمفتاح ،
ميسم : هي تعالي يا حنا ،
وقعمزت هي ونجوى وقعدوا يفتشوا ،
نجوى : ريتيها الحقيرة ، دايرة الخلفية صورة محمد !!
ميسم : اي البهيمة ،
نجوى : غر افتحي الفيس ،
خشت ميسم على تطبيق الفيس !!
نجوى : اهواااا الايميل اللي هددتني بيه السخيفة .
ميسم : لحظة نخشوا الرسائل في رسالة واصلتها ،
نجوى : هاذم الكروتبعتهملها اللي طلبتهم ، ماقرتش الرسالة ،
ميسم : والله مانبعتهملها !! كيف تسمعي كلامها .
نجوى : اهو مش من نصيبها رجعولنا !
ميسم : خلي نديروا سكرين !!
نجوى : لا صوري بنقالك كيف الرسايل من نقالها مبعوتات ،
ميسم : اي صح ، ونفتحوا المتصفحات بالك ايميل تاني فاتحاته !!
وخشوا على المتصفحات لقوا ايميل سارة ،
ميسم : هذا ايميلها ضايفتة فيه العيلة وصحباتها ، (وفجأة لاحظت ميسم ايميل فيه صورة شاب ) لحظة نجوى هذاااا نفسه صحب المحل مراد ، صورته !!
نجوى انخلعت : كييييف نفسه اللي في المطعم عطاني الكرت !!! ؟؟
ميسم : تي ايييييه . لحظة نخشوا الصفحة الشخصية نتاكدوا من الصورة !!
نجوى : ايييييه والله هو ، زعما علاش قال كلميني ضروري ؟؟؟ ليه علاقة بسارة وبلي دايراته ؟
ميسم : غر خليني اسكتي توا ما توترينيش خليني نفتح الرسايل ونفهم !!
*وبدت تقرا و تقرا !!*
ميسم : شوفي شوفي هني باعتلها ايميل وباسوورد ،
*الدردشة*
مراد : سرو لشني قوليلي شن تبيه ؟
سارة : بنت بندير عليها فيلم !!
*
ميسم : ريتي الحقييييير هو وياها مساندها . . اكيدة الصور عنده !
نجوى خايفة وحاطة ايدها على راسها : حييي عليا يا غبارتي غبارة !!
ميسم : الغلط مني انا مافقتلهاش كيف تفوته عليا ونعطيها نقالي ،
نجوى : المهم توا نلقوا حل يا ميسم ضروري !!
ميسم : ياربي !! البنت قدرناخا لكن الذكر يبي ذكر يربيه !!
نجوى : حي عليا يا ميسم كان محمد يعرف بالجو هذا كله !!
ميسم : اسكتي اناي توا انا بنتصل بيه ... بعد مانكملوا .. شوفي فيه قروب هني !!
نجوى : مكتوب فاطمة و انسام و سارة !!
* خشت ميسم وتقرا*
فاطمة : والله حرام عليكم اللي اديروا فيه ، البنت ما دارتلكم شي تشوهولها في سمعتها ..
انسام : كملي سارة ما تعدليش عليها الخوافة هاذي .
سارة : احلى حاجة تعرفوا لم بعتله الصور سيك محمد خداها خبطة على راسه ليه استاكا ، ،
انسام : ههههه
فاطمة : باي انا نستأذن بنخش نرقد ، وراي محاضرات غدوة ،
******
نجوى : اهيااااا الدردشة ديريلها صورة بجهازك ، !! توا شوفي الايميل متع الولد افتحيه وصوري التهديد لبعتاته لمحمد !!
ميسم : هي !! (وخشت فتحاته وفتحت الرسايل ) تعرفي هي ذكية لين غبية مش ماسحة المسجات !!
نجوى : ما كانتش تتوقع ان نشكوا فيها !!
ميسم : اهوووا خلي نصوروا ، هذا ايميل محمد (وصورت الرسايل المبعوثة لمحمد )
ميسم : لازم نقول لمحمد ، ونوريله كل شي
نجوى : اسمعي فكيني والله لم نقعدوا ف الشكوك والمشاكل يا ميسم !! هو قايل يبيه هو النقال وهو يبي يتصرف تو شن بنقولوله ،
ميسم : انتي اسسسكتي . توا انا نكلمه !! خلي نتصل بيه !!
* محمد هو يسوق في الطريق جاي هو وصديقه *
الشاب لمحمد : وقفلي هني ننزل لحمام الجامع ،
محمد درس : تمام ، هو حتى انا تعبت من سواقة السيارة !!
نزل الشاب .
ورد محمد على تليفونه ،
محمد : ايوه ميسم شنو الجو ؟