حبيته شرقاوي

الجزء السابع و الأخير ( 6 حلقات)

( #حبيته_شرقاوي💛)
للكاتبة 🌷ندى أحمد 🌷
الحلقة [37]
ريماس : ارقدي ارقدي يا عمتي لهيد المزين بروحه ساد ،
عمتها : هههه تصبحي على خير !!
ريماس : وانت من اهل الخير ( وتلفتت الجهة التانية وتغطت)
عمتها سكتت سكتت وتكلمت : ريماس !!
ريماس : نعم !!
عمتها : بنتك شنو صاير فيها زعما ؟
ريماس : خليتها عند حماتي !!
عمتها : وتسكتلها ؟
ريماس : شكلك مش خاطم عليك النوم بكل ،
عمتها : باهي اهو رقدت ، ههه
*
-تاني يوم الصبح-
مي :فطرتي ؟
نجوى تسكر في الساكو الصغير متعها : اي ثمرات وحليب ،
مي : مفروض تفطري باهي ..
نجوى : والله نيتي مسكرة ، من بيرفعنا توا ؟
مي : امي !!
طلعت نجوى ، ومي شادة بنتها حطتها في حجر حناها زهرة !!
مي : خليها عندك اميمة ، لين تجي ماما !!
زهرة : لاش ماشية ، اقعدي شدي بنتك ،
مي : ماهي نجوى مافيش من يمشي معاها !!
هند نطت : هيا مي قاعدة تهدرزي ؟
مي : اهو جاية !!
هند : خيرك يام ع شن تكلمي فيها !
زهرة : قلتلها شدي بنتك اقعدي ،
هند : خلي تمشي تساير نجوى ، تو انا نشدها السمحة هاذي ( وباستها ع خدها)
والبنية تنقنق رافعة ايديها تبي تطلع معاهم
هند طلعت تجري : مش معطلين نحطهم ونجي !!

*
*في بنغازي *
نجاة : نوضوا يا بنات ، ميسم نوضي افطري !!
ميسم : باهي يما خليني شوية بس ( وغمت راسها بالشرشاف)
نجاة شبحت للمكيف : حيي نهاركم حرش قوي يركبكم البرد في عظامكم يا منجوهة انتي وياها !! ( وخدت الريموت سكراته) اهو صكرته بكل ، نوضيييي انتي وياااها !! (طلعت نجاة ينادوا عليها من المطبخ)
بنت عمة محمد ناضت قعمزت مخلوعة !!
شبحت فيها ميسم من تحت : ماتعدليش عليها كملي نومك ،
بنت عمه : سهر البارح ماشبعتش في النوم ،
ميسم : حتى ني زيك ماهو الفجر رقدت !!
البنت : انا لين ضوت الدنيا !
*في طرابلس*
نجوى ومي في الطريق !!
نجوى طول الطريق تبكي تتفكر في نزار وفي نفسها *( مخلي مكانك يا وخيي ، ايامك جنة الله يرحمك ويوسع عليك ،)وقعدت كامدتها ومنغصة في القلب ، هي من النوع اللي تكمد داخلها وصعب تعبر بالكلام ،
درست هند قدام الغذائية !!
مي : والله ماوقتك يا دراه انت ( وتشبح لنقال في ايدها يرن)
نجوى تلفتتلها : خيرك ؟
مي : طليقي يبي يشوف بنته ،
نجوى : اااه اليوم خميس حقا ،
مي : يمشي يروح ، يجي الاسبوع الجاي يشوفها مش فاضيتله !!
نجوى : ردي عليه قوليله انا عندي مناسبة توا !!
مي : مش رادة تو يكبرها ، (وطيحت بتارية نقالها داراته خارج التغطية)
ركبت هند ومدتلهم الكيسة ، وولعت وطلعت !!
هند : تو بنحطكم ونمشي نجيب الفيلو ،
نجوى : ان شاء الله به !!