اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
رواية ( #حبيته_شرقاوي )
للكاتبة : 🌷 ندى أحمد 🌷
الحلقة الاولى [1]
*في طرابلس*
السيارة مدرسة في الجنان والكنشيلو مفتوح على وسعه ،
"نجوى " تسلم على امها "ريمة"
نجوى : تمشوا وتجوا بالسلامة ،
ريمة : سلمها بنتي ، ديري بالك على خوتك ما نوصيكش ،
نجوى : كوني هانية
ريمة : وبش ترفعي ملفاتهم للمدرسة تسجليهم ، كلمته خوك نزار ، مروح بعد غدوة من العمل ، بيقعد معاك وبش بيرفعك على خاطر التسجيل ،
نجوى : تمام يما ما تاكليش هم ،
جمال يعيط : تييي هيااا وقت راه على موعد الرحلة ،
ريمة : هيا هي ،
مشت نجوى تجري لجهة باب السواق ،
نجوى : بابا !! كيف تركب السيارة ما تسلمش على بنتك الوحيدة ؟
ضحك جمال محرج من بنته : والله امك دهبتلي شيرتي (ونزل من السيارة وتغمر بنته)
نجوى : ربي يرجعكم بالسلامة ،
جمال : راي امك ..والله ما نبي نمشي ره ،
نجوى : معليشي ، لازم ادير دورا على عيادتها ، حتى هو رزق ومتعوب عليه ،
ركبت ريمة وجمال راجلها لسيارة ،
ونجوى في ايدها مالقي ميا ،
طلعوا بالسيارة ،
ونجوى قجت وراهم مالقي الميا ،
وسكرت كنشيلو الجنان ، وركبت مع الدرجات ، حست بهزة في جيب التوتة ، (نقالها)
(ميسم تتصل ....)
ردت نجوى وهي راكبة مع الدرجات : ايوا ميسوووم ،
ميسم : وينك من امبكري نتصل بيك ؟ ،
نجوى خشت وصكرت وراها باب الحوش : والله كنت لاهية سقدت بوي وامي ماشيين لتونس ،
ميسم : لا باس عليهم علاش مشوا ؟
نجوى : امي بتشوف عيادتها غاذي شن صاير فيها وفيه حاجات بتمها ،
ميسم : اها نحسابها معاينة ولا هكي ،
نجوى خاشة للمطبخ : لالا ، ( وتحرك كيس الشاهي في المق)
ميسم : وتوا من قاعد معاك في الحوش ؟
نجوى : بروحي انا وخوتي التوأم ،
ميسم : ما بعدك كيف متحملة غمان الحوش ؟
نجوى : الله غالب هاذي مسؤوليتي الحوش يا حنا ، راس بنت والكيد كله عليا ،
ميسم : ربي يعاونك ، ونزار كيف حاله ؟
نجوى طالعة بالمق وقعمزت رجل على رجل قدام التلفزيون لابسة شبشب فرو متناسق مع التوتة الوردية
وتشرب
نجوى : بعد غدوة مروح من الصحراء ، حسيتك تقصقصي عليه هلبا ههههه
ميسم : لالا سؤال عادي بس ،
نجوى : ايييييي صحح تحسابيني ما نعرفكش ، عشرة عمر ره اللي بيخطر عليك يخطر عليا قبل ،
ميسم : هههههه باردة ، اسمعي
نجوى : نعم !
ميسم : عرس خالتي رندة بعد اسبوعين جايات ، وقالتلي بنعزم نجوى وضروووري تحضر ،
نجوى : والله ان شاء الله نقدر ، المشكلة خوتي لمن بنخليهم ،
ميسم : تي خليهم عند حناك ، وتعالي ،
نجوى : ان شاء الله توا لين تحدر من ترهونة ماهي عند عمتي يلقطوا في الليم ليه ليه ،
ميسم : اششششيه يا كبدي على الليم ، جيبيلي منه
نجوى : ان شاء الله
ميسم :رااااهو اتجي ، مش ما تجيش ! نبوا نهيجوا ،
نجوى : هههه به تم ، اصلا صايرلي الكبت في الحوش كان نلقى نهيج في عرس نفش الطاقة السلبية ههههه
ميسم : هههههه ايواااه
•••••••••••••••••••••••••••••••••••••••••••••
أنت تقرأ
حبيته شرقاوي
Romansa( رواية ليبية رووومانسية) "علاقة حب بين فتاة غرباوية من مدينة #طرابلس و شاب شرقاوي من مدينة #بنغازي" هذه القصة تحكي عن اختلاف الافكار و اختلاف المناطق والعقليات، تلك الاختلافات تتخلل هذه العلاقة فتخترقها لتتسبب في جروح و ألام حين تُغرز خناجرها في...
