#حطام _من_الماضي
البارت السادس
للكاتبة : زهراء الشويلي
<<الحياة تمضي ..والدروس كثيرة >>
<<والجاهل من لا يتعلم من أخطائه >>
* من البارت السابق *
بقيت واكف وصافن بوجهة
ماعرفت شنو أجاوبة
كتلة " ريم حملتني أمانة وهل أمانة تحتاجلهة واحد يصونهة ، بس هذا الواحد مو اني لأن أمانتك الأولى ماصنتهة .
بقة ساكت كتلة " اتفضل عمي .
ماقبل يدخل وكعد بالكراج
دخلت ركض فتحت باب الغرفة
لكيت لارة حاطة كرسي وصاعدة
عليه جاي تدور بالكنتور
بس شافتني من دخلتي هاي
كمزت و وكعت
اني ضحكت نسيتهة خوافة
ألتفتت وكالت " اني تاليتي أموت
من وراك .
اي بعد ناقصني ماتت الأولى
ونوب الثانية
تقربت منهة ردت أكومهة وسألتهة
" تأذيتي .
حجت بزعل " لا .
عفتهة واخذت حمودي وطلعت
أول ماشافاه أبو ريم حضنة وبجة
ثواني وطلعت لارة تركض
جنت واكف بينهة وبين عمي
شافت ادي فارغة وجهة گلب ألوان
" شهاب وين وديت الولد .
كتلهة " يم جدة . و وخرت شوية
هيَ شافت عمي ورجعت ختلت ورة الباب .
صحت عليهة " تعالي أطلعي ، مو غريب هذا عمي أبو ريم .
عدلت حجابهة وطلعت مدنكة
" شلونك عمو .
رفع راسة عمي باوعلهة ، جاوبهة وزعلة كلش واضح من صوتة " هلا بوية .
لارة رجعت دخلت جوة
وعمي حاجاني شفت نبرة عتب بصوتة
" مالكيت غير وحدة اصغر منك ، جان اخذتلك وحدة بكد عمرك .
جاوبتة بدون تردد " صح الأعمار بيد الله ، بس ردتهة لأبني مو ألي .
عفت حمودي بيد عمي ودخلت
شفت لارة تمشي وتعرج
رجعت سألتهة " تأذيج . ( وأشرت على رجلهة )
هزت راسهة يعني لا
كلت إلهة " عمي كاعد بالكراج وحمودي يمه ، كل شوية واطلعي شوفي خاف محتاج شي ، وحمودي عوفيه عندة منا لحد مايرجعة الج .
جاوبتني بكل هدوء " ماشي ، أنت
راح تتأخر .
واني امشي جاوبتهة " لا كم ساعة وارجع .
