🖤كَئِيبَتُه🖤

💫البارت2💫

🖤البارت2🖤
واقف فمقدمة اليخت..يديه مجموعين عند صدرو وعقلو مسافر لبعيد..رغم البرد القارس ورغم انه لابس غا شورط الا انه محاسش نهائيا..حس بالتخرشيش موراه.. بلا ميدور دار اشارة بيدو بمعنى من بعد..هي مشافتهاش او ادعات انها مشافتهاش..قربات عندو ..جات تحط يدها على كتفكو وهو يلويهالها بلا ميلتفت عندها..حسات بعضامها طرطقو..بقات تتغوت وتبكي وهو ولا من مجيب..جرها شوية ودفعها من اليخت..بقا تيشوف فيها وهي تتغوت وتتحاول تعوم باليد لخرى لكن مقدراتش..ترخات وغرقات لقاع البحر..دخل بحالو لداخل..تخشا ففراشو ونعس تم تم
📿الساعة الخامسة صباحا📿
لابس سورفيت فالكحل.. من بعد ما برمج اليخت يتاجه لليابسة..بقا تيجري فالغابة شي جوج سوايع..دار بعض التمارين لي كتحافظ على لياقتو البدنية العالية..طولة ملفتة..جسم ضخم ورياضي بكل ما للكلمة من معنى..كلشي مخدوم من لعنق حتى للرجلين..هدشي طبعا تيرجع للرياضة لي هي شيء اساسي عندو..ركب فبوgاتي كحلة كانت مصطاسيونا فواحد القنت وكسيرا طالق العجاج موراه..وصل لواحد الميني الفيلا متكونة من طابق واحد..مخدومة بخشب الزان الروماني والزجاج المضاد للرصاص داير بيها تيبين كلشي لي كاين لداخل..موجودة فوسط الطبيعة والنباتات والخضورة معمرة الدنيا..وكاين فالجنب واحد البركة مائية صغيورة مبعترين عليها بعض الازهار..هدا هو المكان المفضل ديالو..بعيدا عن ضوضاء المدينة وصداع الاسلحة والمتفجرات..استحم بالزربة ولبس حوايجو لي عبارة عن تريكو دالصوف فالبيج مع سروال عريض فالاخضر غامق وجكيطة طويلة مخلطة بالكحل والازرق وغالب عليها الخضر مع بروطكال دالجلد كحل..ستيلو فشكل ونادرا فين تيلبس الرسمي ولا الكلاس..
ركب فاللوطو وكسيرا حتا تطبعو الروايض فالارض..خرج من المنطقة الغابوية لي مسجلة فسميتو وبدا تيدخل لقلب كازان...العاصمة التالثة لروسيا وثامن اكبر مدينة من حيت المساحة..وصل للمنظمة ديالو..البلاصة لي مجموعين فيها افضل السفاحين..الهاكرز والعباقرة..تما فين تيتاخدو قرارات تتعلق بمصير العالم كامل..كل واحد خدام ودايها فشغلو..حواسيب واجهزة الكترونية فكل بلاصة ..المكان طاغي عليه الهدوء والصمت لي تكسر بمجرد ما دخل هو..من بعد ما دخل فواحد النفق حط يدو على واحد الحجرة تحركات من بلاصتها وبانت واحد اللوحة رقمية بالرموز..كتب الكود و تحل الباب الالكتروني لي كان عبارة عن حيط مهدم وراشي..خطوات تقيلة ومتوازنة علنات على قدومو..الكل وقف احتراما وخوفا من الرئيس..ماشي اي رئيس..طبيعة العمل ديالو مختلفة كليا على الاشخاص لاخرين..جا يدخل للمصعد وهو يتلقالو زاك..اختصار دزكرياء..لايقل وسامة عنه..طويل وجسمو رياضي بامتياز..ملامحو أجنبية رغم انه عربي الاصل..عنيه فالاخضر غامق واسعين وشعرو زعر مايل للقهوي مع لحية خفيفة مزينة ذقنو الحاد ملامحو الطفولية والبريئة مكتعكسش نهائيا الداخل ديالو..اكيد مغايكونش الصديق المقرب ديال رئيس المافيا شخص حنون وعطوف..بالإضافة إلى أنه اليد اليمنى ديالو مستحيل تكون فيه ولو شوية من الصفات لي ضاهرة عليه...
زاك:(ضربو لكتفو)واشا الصاحيب توحشتاك شحال هدي ما شفناك
روميرو شاف فيه ببرود ومرضش عليه
زاك:هه وا ماتقلقش راه نضربك ومنخلي لي يضربك
بلا مبالاة دخل للمصعد ووطا على الزر دالطابق الاخير
روميرو:راك تقلب عليا وقيلة
زاك:(غمزو)ياكما تلفت الزيين
روميرو:(ببرود)غدي نمرمقك نتلفك دبصح
زاك:(خنزر فيه)حرربش
شاف فيه بنصف ابتسامة زعما منيتك
زاك:(دافع الجبهة)جررب وتشوف
بقا روميرو تيقربلو بششوية بشوية.. يالله وصلّو وهو الباب يتحل وخرج زاك تيجري وهو من موراه تيتمشى بشوية عليه
روميرو:واه واه اجيتلي
زاك:(دافع كبيير)ضحك معا راسك ضحك راه غمبغيتش نمرمدك هنايا نشفي فيك الغادي والبادي
دخلو للمكتب لي شاد الطابق كلو وفيه سرجم ديال الزاج شاد حيط كامل وتيطل على جبال الاورال لي البعض منهم كساهم التلج وزين قممهم المدببة..عامر بالخزناات.. صناديق وقطع أثرية باهضة التمن مجموعة فواحد القنت..ولوحات قيمة مبعترين فالحيوط لي مصبوغين بالكحل والرمادي..gلسو تما شي نص ساعة..زاك من بعدما قتلو الملل جمع راسو ومشا يقضي شغالو..بينما روميرو تحنا على البيسي تيقاد فشي دواسا وتيراقب الاوضاع..والمبادلات والصفقات واش هما هدوك..من بعد ما راجع كلشي بالتفصيل والتدقيق جمع الوقفة وهبط لتحت..خرج من المنضمة ..ركب فلوطوتو وتلاتة دلي ميرسيديس بانز تابعينه كل وحدة فيها ربعة دلي كارد..طالقين العواصف موراهم..بحال شي موكب ملكي..تاحد ميقد يتكلم او يوقف روميرو لي تيتعتبر من اشهر رؤساء المافيا فالعالم كامل..تشهر فالجرائد والمجلات والسوشل ميديا بسبب وسامتو الطاغية وشخصيتو الغامضة واعمالو الابليسية..ولو ان الكل عارف النوع ديال العمل ديالو الا انهم مقدرو يشدو عليه ولو دليل صغيور..حتى من مخالفة السير هيا القليلة ممسجلاش فملفو..وصلو لواحد المنطقة مهجورة..نزل روميرو هو الاول وتبعوه لي gارد هازين pkc(رشاشات)مستفين موراه كانو تقريبا طناش لواحد..تقدم بخطى ثابتة..صدرو العريض مدفوع القدام وشوفاتو حاديين..تمعن بتركيز فوجه الراجل لي واقف مقابل معاه..لي بمجرد ما شاف فيه رجليه فشلو عليه وحدر راسو دغيا
الرجل:سسيدي..ههادي هي الشححنة لي طلبتيي
روميرو عطا الاشارة لواحد الكارد..فهمو ومشا حايد عليها الغطا..هز شوية من المخدرات بصباعو..ملس فيها وشمها..هز راسو بالايجاب ورجع اللور
روميرو:(مفيكسي عنيه فالشاحنة لي فيها المخدرات)امم الزويون(ابتاسم بحنية وشاف فيه)شوف فيا مالك خايف راني متنعضش
الرجل:(ابتاسم بتوتر وعلا عينو فيه ولكن دغيا هبطهم)هه ش..شكون لي م..ميخافش من..منك اس..سيدي
روميرو:(جبدو من حنكو وضحك حتى بانولو غمازاتو وهضر بصوت طفولي)ويتك ويتك شحال ضريف اممم ولكن دبا خاصنا ندويو فالمعقول ياك(فلمح البصر بدل نبرة صوتو وقلب عنيه لواحد التخنزيرة شيطانية وحجبانو تعقدو 11  زيرلو على فكو حتى كان غيقسمولو وهدر وهو مركز فالشاحنة)اشنو كاين فداك الكاميو امم
الرجل:(حل عنيه على وسعهم وهضر وشنايفو خارجين على شكل بوسة)غ..غا المخدرات اس..سيدي ك..كاين تمما الكوكايين ل..لي ط..طلبتي
روميرو:(زاد خنزر)متاكد
الرجل:(جاوبو بالزربة)اه اه متاكد
روميرو:امم زعما مكاينش تما شي رجال(وبقا تيضربلو بشوية فحنكو)
الرجل:(وجهو صفار وبقا يتفتف)اا للا والله مماني جاييب معاييا حتا واحدد تنقسسملييك مراني نكدب اسسيدي
روميرو:(قرصو من خدو بابتسامة مخيفة)يالكديدييب
بمجرد ما نهى كلامو خرجو شي خمسين واحد من الشاحنة هازين مسدسات من نوع كلاشينكوف مصوبينهم فاتجاهو..ابتاسم بسخرية
روميرو:هدشي لي قديتو عليه؟
الرجل:(بعد عليه وجبد سلاحو تيترعد ولكن تيحاول يقوي راسو )سسمحلي بززاف اسيدي انا اصلا (جاتو البكية) انا غا عبد مامور..اهئ اهئ سمحلي بزاف حيت تجرات ومدييت سلاحي علييك ولكن انا مضطر تنقسمليك..اهئ بنتي عندهها عششر سنيين وفيها التوحد..خ..خطفها هي وم..ماماها و..و اهئ غتاصبهوم gاللي غيقتلهوم اهئ سمحلي بززاف (صوب الفردي لراس روميرو)سسمحلي
غمض عنيه وضغط على الزناد لكن قبل ماتخرج الرصاصة سبقاتها وحدة جاتلو فقلبو نيشان..طاح فالارض ميت فالبلاصة ودمعة حارة نازلة من عينو..سرعان ما ناضت اشتباكات وطلقات نارية بين الرجال ولي gارد..روميرو بعدما جاتو الرصاصة فمرفقو الايمن..حط يدو عليها وزير مزيان باش ميفقدش الدم..جبد فردي صغير من جيب السروال ولي بانلو من قريب ولا بعيد يتيري فيه..جوج دقائق وgاع دوك الرجال طاحو فالارض..اكيد هو كان ضارب الحساب لهدشي..عارف ان هداك مغيخليهش فخاطرو..ديما مصدعو وكل مرة مسيفطلو واحد فشكل..وهو بدون كلل او ملل تيمشي عندهم لعلى وعسى يتشجع ويواجهو..مزال معارف هويتو ولكن قريب غيعرف...ركب فاللوطو وكسيرا..وصل للفيلا ديالو..زوينة وراقية وواسعة..متيبغيش يبالغ ويبين الثراء ديالو على والو..هو اش بغا لشي قصر ايلا كان غيستخدم فيه غا طابق واحد..بطبيعتو عملي ومتيهتمش اطلاقا للمضاهر رغم انه من اغنى اغنياء العالم..طلع للطابق التاني ودخل للحمام ..خدا دوش خفيف وتسرح على الناموسية غي بفوطة كحلة ملوية على خصرو..قطرات من الماء تيهبطو مع صدرو غا تيوصلو للفوطة ويختافاو..وشعرو الكتيف المبلل تيطيحلو على عويناتو المشفرين وكل مرة يردو اللور..جبد واحد العلبة كبييرة تاع الادوات الطبية..حايد الرصاصة بملقط وبلا بنج حيت مكانتش غارقة جاتو فالطرف ديال اللحم..خيط الجرح وعقمو ولوا عليه فاصمة بخفة رغم انه تيخدم بليسرية..مشا للدريسنغ لبس بوكسور وتوني وقبية كوحل..مع تقيشرات قصار..تكا فالناموسية حاط البيسي على فخادو تيخدم فيه..سمع الدقان فالباب وعطا الادن بالدخول..دخلات واحد الخدامة زويونة ملامحها ناعمين عويناتها زورق وشعرها زعر قصير رطب طالقاتو على راحتو لابسة قميجة انيقة فالبيض وسروال صفر ومزينة وجهها بابتسامة خفيفة..جارة فيديها طاولة صغيورة محطوط فيها العشا لي كان عبارة عن اكل صحي راقي..حطات الطبلة حداه حنات راسها ودارت تتزرب فالمشية..بقا ساهي تيشوف فيها حتى خرجات..سالا عشاه ودخل للدوش غسل سنانو وشلل فمو..لبس بانطوفتو الرجالية وهبط للتحت فالدروج لي مصنوعين من خشب الاوكا لي تيتعتابر من اجود وامتن واجمل انواع الخشب وكدلك اغلاها تمنا..وصل للطابق الارضي وخرج للجردة لي شادة جزء من واحد الغابة..دار القب على راسو..خشا يديه فالجيب دالقبية وبقا تيتمشا بشووية وراسو فالارض..بانتلو واحد المشيشة كيووت بيضة تتمشا معاه وتابعاه..ابتاسم وهزها معنقها فصدرو تيمسحلها على راسها ويفكر..يفكر فحياتو ..حياتو لي خاوية وفاارغة..رغم انه حقق اشياء كانت  مستحيلة..ورغم انه وصل لمناصب تحد ميحلم بيها..ورغم أن العالم كامل بين أيديه وبكلمة منو يقدر ينهيه..الا أن هاد الشي مماتر عليه ولو بشوية..داير بحال شي ورقة بيضاء..متيحس بحتا حاجة..لا حزن لا غضب لا فرح..خالي من اي مشاعر..هدشي بان فطفولتو..مكانش تيضحك بحال الاطفال لخرين فاش تيتهرو..ومكانش كيخاف من الضلام والاشباح وقصص الرعب لي كانت تتعاودهوملو جداتو..ومكانش تيتعصب فاش شي واحد تيشفرلو شي حاجة او يدفعو..توضح هدشي خصوصا فاش وصل لمرحلة المراهقة..حتا بنت مقدرات تدخل لقلبو او على الاقل تعجبو او حتى يفكر فيها..لدرجة انه كان تيضن بلي هو متلي وتيميل للدكور..طلع شخص جامد..بارد..حتى حاجة متتاتر عليه..الشفقة والرحمة كلمات متيعرفش المعنى ديالهم..وهدشي زاد ترسخ فيه بسبب طبيعة عائلتو والمحيط لي كبر فيه..مكانتش عندو ام لي تحن عليه وتعطف عليه وتوريه حوايج بساط لي اي واحد خاص يتعلمهم..ولا اب لي يوقف معاه ويدافع عليه ويهتم بيه..حل عنيه على جدو وجداتو..لي دوزو عليه اقسى انواع العداب..ضربوه..حرقوه ..هرسوه..بيتوه فالزنقة..وهدشي كلو وهو مزال ماكمل حتا سن السابعة..خرج يبيع كلينيكس والكارو رغم ان جدو كان اغنى واحد فقارة اروبا وساكنين فافخم قصر فالعالم..معطف عليه او حن فيه حتاشي واحد فحياتو كاملة..عدى حارس المزرعة الكبيرة لي كانت متواجدة بجانب القصر..فقاش ما تيتلاقاه تيجبد شي سقاطة يعطيهالو..يعاودلو حكايات ويمسحلو على شعرو..يشريلو الكسوة بخلصتو المتواضعة ويعطيه الجزء الأكبر من ماكلتو..كان تيعاملو بحال ولدو واكتر..شهور وهو تيعتاني بيه لكن بمجرد ما شافتهوم الجدة مشات تجري وصلاتها لراجلها..لي متردد ولو للحضة انه يقتلو قدامو..تيرا فيه برصاصة وحدة جاتلو وسط عنيه..قدام الطفل البريء لي عمرو فقط سبع سنوات..قطرات ديال الدم ترشو على وجهو الملائكي..مسحهوم بكف يدو وبقا تيشوف بجمود فجبهة الحارس.. متحركات فيه حتا شعرة..حول نضرو لجدو لي خنزر فيه ودار..تمشا حتا هو بجمود حتا وصل للدار الخشبية ديال كلب الحراسة ولي ولات هي دارو..على الاقل كتحميه شوية من الشتا حسن من والو..تحنا هز كارطابو وبقا تيتمشا بشوية بخطواتو الصغار للروض..او نقولو الجحيم..تما حكايات اخرى من التعديب طبعا بتوصية من الجد المحترم..زيد عليها تلاتة كيلومتر ديال الطريق لي كل نهار خصو يضربها باش يوصل لتما..كان تيصحابلو كلشي عايش بحالو.. ولكن لا..هو معاشش طفولتو نهائيا بحال الاطفال لخرين..ابتاسم بفراغ وهو تيتذكر لهدشي..معرفش واش خاصو يبكي ولا يضحك..فكر مع راسو ولقا بلي هدشي محزن نوعا ما..جمع حواجبو وعبس ببراءة وهو تيحاول يبين بلي راه حزنان ولكن مقدرش..غلباتو الضحكة..ضحكة مخبية ورائها واحد الكم من الألم لا يمكن يحتمل..لا يممكن..حول لعينو لديك المشيشة لي فيدو وبقا شحال تيشوف فيها وهي تتمخشش فيه ودور فعويناتها الزورق..شدها من عنقها وبقا مزييير عليها حتا خرجو عنيها وتفصل جسمها على راسها من حر الشدة..خسر سيفتو مين الدم ديالها سالو على يديه ورماها بقرف تينش بيديه باش يتحايدلو الدم ..رجع بحالو للدار..طلع لبيتو فالمصعد حيت كان مسخسخ..غسل يدو بالصابون والمعقم وخرج من الدوش..تلاح على سريرو خشا راسو تحت الوسادة ونعس على كرشو ناشر يديه ورجليه