قلوب تائهة

الحكاية الخامسة ج١

اصعب انواع الخيانة لمن تجيك من اقرب الناس الك وتظل مهموم وتعبان وشايف الغدر كدامك ولاتكدر تبعدة حكايتي حكاية غريبة ومتعبة واتمنى رب العالمين ميشوفها لااحد ..
اسمي مريم عمري ١٩سنة حاليا أبوية حارس مدرسة وامي تشتغل طبخ العالم ومرات يوصوها تلف كبة بورك تحضر اكل عزايم حالتنا مثل ماواضح فقيرة وكوة مدبرين العيشة لهذا أبوية بس وحدتنا تصير ١٤ ويجي نصيب ينطيها عمود يخلص ويأمن علينا احنا اربع بنات وولدين اخواتي الكبار الاثنين متزوجات من هن صغار وعدهم اطفال مو سعيدات بحياتهم بس هذا الموجود اكيد مرح ياخذون احسن من شخص أبوية وحدة متزوجة عامل والثانية سائق شاحنة ..وكل وحدهة عدهة ٣اطفال وبعدين جوي اخواني وبعدين احنا الصغار جنت بالمدرسة بالضبط صف ثالث متوسط أبوية يشتغل بالاعدادية مال ولد بصفنا لهذا مرات من اشوفة اسلم علي اواخذ منة مصروف اشتري من المحل القريب منا ..

وبيوم وإني واگفة ويا أبوية ودينطيني فلوس اجة واحد من المدرسين ديصيح ع أبوية ..

حجي ابراهيم..حجي ابراهيم..

ابراهيم: يلة روحي مريم ..وگلي لاامج أتأخر عالغدا عندي شغل بالمدرسة..

مريم: حاضر يابة ..

وهو ديسمع صياح استاذ نبيل ..

وگف بوجهي وسكت..وتلعثم بالحجي..
حجي ابراهيم ..وينك يمعود ..تعال ..

ابراهيم : يلة روووحي مريم ..

حاضر ..رايحة ...

نبيل: حجي ابراهيم معرفتك عوينجي وتتحارش بنات الثانوية يمنا ..منو هاي چنت تحجي وياها..

ابراهيم: هاي بنتي ..استاذ انطيها مصرف عمود تشتري ..

نبيل : اهاااا..ديلة لعد فوت يلة لم هاي الكتب بالمخزن ..وخلينا نقفل بأجر اجيب طالبين يرتبوهة ..
طب ابراهيم وظلت عيني على هاي البنية الحلوة معقولة هاي بنته الله يحفظها ...

مريم : حسيت بنظرات استاذ نبيل تاكلني ..اول مرة احس بالاحراج من وكفتي ويا أبوية صح هو ع كد حالة وديحاول يسوي اليكدر عليه ..بس حاسة بالنقص الكل يعيرني بنت الحارس ..بنت الحارس..
تعبت والله ..بس هاي قسمتي..
وإني راجعة للبيت استلمني اخوية علاء رزالة شون تاخرت وملابسة حجاب مثل مگلي وامي هم رزلتني كالت بأجر متداومين اذا مو ع راسج المشمر..

بچيت واستحيفت حيل احب شعري وأحس الكل يباوع علية لان شعري اسود طويل وسرح ووجهي طولاني وضعيف وخشمي هم ناعم عيوني كبار وسود هسة من البس حجاب رح اصير مثل الدولمة المگمطة ..

ثاني يوم شمرتة شمر عراسي وطلعت الكذلة عمود يبين حلو ..

كالمعتاد كملت دوامي ورحت لاابوية ملگيتة بالباب ..شفت المدرسة فرغت ..
فتت جوا ادور علي لان مرات يظل ينظف جوا ..فتت لگيتة يعزل بالمخزن ومحتاس ياعيني..