حياة السته مليون ((الواقع الليبي ))

البارت العاشر

#حياة_الستة_مليون
.
.
.
.
.
.

معتصم : نبيك تراقب زكريا .
علي : من زكريا؟
معتصم : الربع.
علي : علاش؟
معتصم : راقبه و اسكت و الفلوس تو توصلك.
علي : به تمام.
معتصم : اي حركة يديرها تقولهالي، اي حرف يقولة نبيه يوصلني منك.
علي : تم يا برو، كل يوم تو نجي نقولك كل شيء.
معتصم : به.
علي : باهي الفلوس ؟
معتصم : مش توا، كل ما تقولي حاجة مهمة نعطيك.
علي : به 'مشى'
معتصم : مهبول بالفلوس.
مهاب : نبي نرقد انا.
معتصم : انا بنمشي ندوّش و نرقد.
إسلام : حتى انا، هي سلام.
معتصم : سلام 'مشوا للحوش'
مهاب : دار الغوله.
معتصم : شكله حتى شمعه مفيش.
أزم : لا مفيش .
مهاب : بسم الله الرحمن الرحيم، من وين طلعت؟
ازم : واقف اهنى انا.
معتصم 'خلاهم يهدرزوا و مشى للدار، طلع حوايجه (دبشّه) و دخل للحمام ++أكرمكم الله++ '
مهاب : واااك، ضغط الحوش شن هذا؟
أديب : اي نو هلبا.
أزم : يما وين المراوح؟
الأم : كيف بنجيبهم انا؟
أزم : حتى الشحن مفيش.
هبه : معتصم وين؟
: واااك .. شن هذا؟
مهاب : خيره هذا؟
معتصم 'فتح الباب' : امتى هربت الميا اللطف.
ازم 'ضحك' : كله من وجهك هذا.
معتصم "بعصبية" : و النبي أسكت، شن العيشة هذه.
الأم : الله غالب.
معتصم 'قعمز جنبهم' : لا ضي ولا ميا شن مزال بالله.
ازم : رحمة الله.
معتصم : لا هوا قريب يقولولكم نقصوا من النفس شويا الأكسجين ناقص.
مهاب : نوو يا ناس نوو.
معتصم "بعصبية" : تي باهي سكر فمك، شن بنديرولك يعني؟
الأم : بالشوية على خوك.
معتصم : و النبي فكيني منه ترا، مدلعتيه هلبا. 'فتح تليفونه'
مهاب : ديرلي نقطة إتصال.
معتصم : باش تكمل النت كله .
مهاب : لا لا.
معتصم : ريح روحك منيش فاتحلك.
أزم : قالوا غدوا بيجيبوا سيوله للمصرف.
معتصم : من قال؟
أزم : اتصل بيا صاحبي.
معتصم : كم بيجيبوا به؟
أزم : 500 ولا 300.
معتصم : 300؟؟ .. شن بيسدوا هاذوا.
اديب : يسدوا خيرك؟
معتصم : خيرك انت وين عايش ؟ .. الأسعار والعه فيهم النار.
ازم : خير من بلاش.
معتصم : الله غالب على اللي عنده هلبا صغار.
الام : اي و الله.
'قعدوا ساكتين فترة'
الأم : ازم امتى بنفرح بيك؟
معتصم 'تأفف' : ايح عاد احنا.
ازم 'ضحك' : قصدك مش فرحانه بيا انتي؟!
الأم : امتى بتتزوج و نتهنى عليك.
أزم : و النبي يا امي سكري الموضوع.
الأم : كل ما نكلمك تقوليلي سكري الموضوع.
أزم : يما انا مش قادر نصرف على روحي، تبيني نجيب شخص ثاني نصرف عليه؟.. تي حياتي مش منظمة بكل علاش تبيني نجيب بنت حلال و نظلمها .
الأم : علاش بتظلمها؟
أزم : مش حنقدر نصرف عليها، مش حتعيش زي الناس.. و البنات توا يبوا حوش بروحهم و سيارة و طلبات خيالية، انا وين بـنسكنها ؟؟
الأم : علاش العفو ؟؟ .. انت غير قول باهي و كل شيء يجي.
أزم : مش باهي، تي من هيا اللي بترضى بيا ترا.
الأم : 100 وحدة.
أزم 'ضحك بإستهزاء' : و النبي ضاع شبابي و انا مصدق الكلمة هذه، و في اللنهاية عرفت ان مفيش ولا ربع وحدة تتمنى واحد حياته مبهذلة زيني، اصلاً اللي زينا حرام يتزوجوا ولا يحبوا 'وقف و مشى للدار'
هبه : علاش نوضتي عليه المواجع يما.
الأم : معتصم نوض شوف خوك.
أديب : اكيدة مضايق.
الأم : معتصم نكلم فيك... معتصم!
مهاب 'ضرب معتصم على ظهره بخفه' : يا هوو.
معتصم 'نحى السماعة من وذنه' : اهاا؟
الأم : نوض شوف خوك.
معتصم : من خوي؟
الأم : ازم.
معتصم : و النبي خلوه في حاله، الراجل يبي يقعد بروحه يندب على اياماته انا شن دخلي فيه.
الأم : خوك العفو، كيف شن دخلك بيه؟
معتصم : تي و 'قطع كلامه صوت تليفونه يرن.. شاف للتليفون بإستغراب و رد'
هبه : خاطري في ميلكا.
معتصم : الو؟ .. الحمدلله، مني ؟ .. اها كيف حالك ؟ .. اي قاعدة، به 'مد التليفون لي أمه' .. خالتي نعيمه.
الأم 'خدت التليفون' : السلام عليكم.
هبه 'شافت لمعتصم' : خالتي؟
معتصم : اي.
هبه : ترا إدوي شرقاوي❤
معتصم : كم مرة بنقول منعرفش م ن ع ر ف ش .
هبه : مبردك.
مهاب : كسااد.
اديب : برا ارقد عندك مدرسة.
مهاب : انا سوا رقدت توا ولا الساعة 3 بـ إنوض بحرق الأعصاب افهموها.
اديب : و خيرك متأكد.
مهاب : لان نعرف روحي.
اديب: به نوض اقرى.
مهاب : وااك، نقول كساد يقولولي نوض اقرى  شن الناس هذه.
معتصم : نوض جيب الكارته خلي نلعبوا شكبّه.
مهاب : به 'ناض جاب الكارته و قعمز'
معتصم 'قعمز قدام مهاب' : مشكي .
مهاب : شنو؟
معتصم : مشكيها شن شنو؟
مهاب : منفهمش فيك، منعرفش نلعبها را.
معتصم : ايح عاد، يا غييتك يا عماد و خلاص.
مهاب : علمني... شن معناها مشكي؟
معتصم : معناها مشكي .. تي كيف بنشرحها تو .'خذى منه الكارته و قعد يخلط فيها' ... هكي .
مهاب : اها به، كان قلت لخبطها ولا شخبطها خير.
معتصم : به به غر فكني من فلسفتك .
مهاب : به، اشرحلي كيف نلعبها.
معتصم : انا يكون عندي 3 اوراق كارته و انت 3 ، و 4 على الأرض ... تشوف أوراقك شن فيهم  و كان لقيت حاجة على الأرض كولها.
مهاب 'قعد يشوفله بإستغراب'
معتصم : ايح عاد، مثلا أنا عندي المجيرة  و في ورقة 5 و ورقة 3 على الأرض، نشد المجيرة و نقيم الورقتين  بعدين نحطهم بحداي.
مهاب : شن هيا المجيرة؟
معتصم 'تأفف' : المرأة  و تعادل 8 .
مهاب : به .
معتصم : و في الحيّة .. اللي هي 7 ديناري .
مهاب : شن هوا الديناري؟
معتصم 'حذف على مهاب الكارته' : نوض اقلب وجهك معاش نبي نلعب.
مهاب 'ضحك' : باهي مانعرف شيء كيف بنلعب.
معتصم : مش لازم تلعب برا  شد بوبجي و وكر المافيا .
مهاب 'قام الكارته و مشى رقد في الدار'
هبه : شكله زعل.
معتصم : يزعل ولا ينحرق مدخليش فيه.
أديب : بنمشي نرقد، عندي امتحان و محاضرة غدوا ولازم إنوض بكري.'مشى للدار'
معتصم ' اول ما سمع كلمة محاضرة تذكر ميار و ان لازم يوصلها للجامعة، فكر انه يتصل بيها لكن تردد.. شاف لأمه اللي تهدرز مع خالته و الضحكة مش مفارقتها  محبش يقطع حديثهم، خلاها تكمل هدرزتها مع أختها و مشى للدار'
أديب : شن جابك؟
معتصم : نبي نرقد عندي محاضرة غدوا.
أديب : بالحق؟
معتصم : لا بجديات.
أديب : به كويس.
معتصم : اي ' قعد متكّي في فراشه و مش خاطره يرقد،  مـر شوية وقت وهوا على هالحال، مرة يشوف لأزم و مرة يشوف لأديب بعدين يبتسم، حس بأن علاقته بخوته الثلاثه مش قوية  زي علاقته بعماد، قرر انه يحسن علاقته بيهم ... تنهد و شاف لمهاب، خوه الصغير اللي ديما معصبه بدلعه الزايد مع إنه 18 سنه بس مزال في نظره خوه الصغير الدلوع، مع إن خبثه مش خبث صغار ☺ ... حس بإن النوم حالف عليه، وقف و طلع للصالة  ضغط على مفتاح الكهرباء لكن مصار شيء، لحظتها ايقن ان الضي مزال هارب، الحوش مظلم هلبا و هآدئ، دور على تليفونه و كل مرة رجله تضرب حاجة و يعثر، قعد يمس في الصالون و الطاولة لين لقاه، حاول يفتحه لكن مباش، ضحك لما عرف ان امه كملت الشحن بالهدرزة مع خالته .. وقف بعد ما عثر في الطاولة و قعد يمشي بالشوية لين وصل لباب الحوش، فتحه وطلع ...
الشارع أسود مفيش إلا ضي القمر اللي كان ضاوي و كامل في هذه الليله .. قعد يتمشى و يشوف للمنازل واحد مظلم و ثاني فيه شمعه، و الهدوء في كل مكان  قعد يفكر كم الساعة لكن معرفش كيف يتأكد، شاف مجموعة شباب واقفين قدام سيارة جارهم و بعد تركيز كبير عرف إنهم خنابين، ضحك بإستهزاء' : أكيد عاد هذا وقتكم انتوا، الناس راقدة و الضي هارب 'كان بيمشيلهم لكن صوت الراجل وقفه'
: ارجع لحوشكم خير يا ولدي.
معتصم 'تلفت' : لكن هاذوا بيخنبوا.
: في يدهم سلاح ممكن يضروك.
معتصم : لكن.
: الولد اللي عنده سلاح يكون ولد خو صاحب السيارة، اطلع من الموضوع خيرلك.
معتصم : بيخنتب سيارة عمه؟؟
: اي، الفلوس غراته.
معتصم : لا حول الله معقولة هكي .
: ربي يهديهم و خلاص، برا ارقد يا ولدي شن مسهرك لتوا؟
معتصم : مني يقدر يرقد في هالضغط.
: خوذ مروحة .
معتصم : المشكلة ظلام مفيش كيف نشوف باش نطلعها.
: استناني شويا و نجيك ،
معتصم : تمام.
'مشى الراجل لحوشه شويه و جى لمعتصم، مدله مروحه و شمعه' : خوذ، خاي الشمعه تنور طريقك.
معتصم 'إبتسم' :  شكراً .
: ولو انت زي ولدي.
معتصم : هي بالسلامة .
: رد بالك على روحك .
معتصم : إن شاء الله 'رجع للحوش و هو مبتسم، الراجل كانت فيه طيبة لا توصف، طريقة كلامة تخليك تحس بالسعادة تلقائياً ... فتح الباب و حط الشمعة فوق الطاولة في الصالة، خذى المروحة و قعد يمروح على روحه لين رقد'

___________________________________________________

في الصبح ...

'ناض أزم يصلي الفجر، استغرب لما شاف الشمعة و لقى معتصم راقد و جنبه مروحة، توضى و صلي و قعمز يقرى في قرآن لين ناض أديب'
أديب : صباح الخير.
أزم 'سكر المصحف' : صدق الله العظيم، صباح النور، و النبي نوّض مهاب .
اديب : به، حتى معتصم قال بيمشي لمحاضرته اليوم.
ازم : باهي نوضه حتى هو .
اديب : باهي ' نوض معتصم بعدين مشى ينوض في مهاب'
أزم : من وين جت الشمعه؟
معتصم : مش لازم تعرف... جى الضي؟
ازم : لا مزال.
معتصم : واك 'ناض غسل وجهه، صلى و غير حوايجه'
أزم : تصلي و بتمشي للجامعة .. شن صاير؟
معتصم : كان صلينا وه  و كان مصليناش وه  شن ندير؟؟
أزم : ربي يزيدك من الهدى ان شاء الله.
معتصم : ان شاء الله .. ما تبي شيء ؟ انا ماشي.
أزم : لا سلامتك، نوصل مهاب و أديب و بنمشي نقدم طلب تعيين.
معتصم : حصّلت مكان تخدم فيه؟
أزم : اي، شفت إعلان في شركة امتاع بناء و بنمشي نقدم اوراقي.
معتصم : به موفّق.. سلام 'طلع و ركب في السيارة، فتح تليفونه و إتصل بـ ميار' : صباح الخير .
:#####

~~~~~~~~••~~~~~~~••~~~~~~~••~~~~~~••~~~~~~••~~~

تفاعلوا و أدعموني 💔:'( 

و تابعوني 😋😻

#حنين_الشوق