حياة السته مليون ((الواقع الليبي ))

البارت الثالث عشر

#حياة_السته_مليون
.
.
.
.
.

هبه : حي المطر قوت.. معتصم شكله اللي تقوله يصير.
معتصم : إيّااه؟ .. انا بنولي مليونير غدوا الصبح .
عماد 'ضحك' : لا هكا واجد .
معتصم : هي قالت اللي نقوله يصير.
هبه : حتى بالعقل متجيش هيا.
عماد : مش عارف شن بيوصلنا توا .
معتصم : غر أرجع بسرعة قبل ما تتسكر الطريق، تعرفه انت السريع تدفل عليه يغرق.
هبه 'ضحكت' : حلوة هاذي.
معتصم : هبه، عندك علم ان عندنا عرس في بنغازي.
هبه "بفرح" : الله؟
معتصم : واللهِ، مش شفتي عماد يوتي في حوايجه؟
هبه : اي صح، لكن لما سألته قالي مدخلكش بنمشي للمريخ.
عماد 'ضحك' : بالكلمة حافظه كلامي.
معتصم : بنمشوا غدوا لي بنغازي، تروحي توتي حوايجك ولا تكلمي وحدة من خواتك.
هبه : المشكلة معنديش رصيد .
معتصم 'إبتسم' : انا عندي تو نكلمهم.
هبه : به .. لكن معنديش حاجة للعرس "بحزن"
عماد : إشري.
هبه 'ضحكت بقهر' : من فلوس جدي إمالا .. من وين بنجيب الفلوس.
عماد : نشريلك أنا اللي تبيه.. نرفعك غدوا قبل ما نمشوا، تشوفي المحلات و تختاري.
هبه 'سكتت من الصدمة'
معتصم 'ضحك' : أنجلطت البنت.
هبه : بالحق تدوي عماد.
عماد : من أمتى نبصر معاك انا،
هبه : يـــاي، أحلا أخ في الدنيا.
معتصم : مصـــح وجهك، مبكري كنت أنا أحلى أخ في الدنيا  و توا عماد مشاء الله.
عماد 'ضحك' : مصالح يا حبيبي حتى بين الخوت.
هبه : لما نفرح نقول فيها بس را مش تصدقوا روحكم ... أزم أحلى أخ من الأخير.
معتصم 'شاف لـعماد' : شن رايك نحذفها من روشن السيارة.
عماد 'فتح الروشن اللي جنب هبه' : إحذفها هي.
معتصم 'ضحك و تلفت لهبه' : كان نحذفوك توا تموتي شهيدة.
هبه "بإستغراب" : علاش؟
معتصم : بتصب عليك مطر لين تغرقي.
عماد : علاش إطول في الخيط، تو نحذفوها في البحر لا حد يشوفنا ولا يسمع بينا.
هبه "بخوف" : نهار أسود و الله إديروها انتوا.
معتصم 'شافلها بكل جدّيه' : إمالا نبصروا؟
هبه 'تجمعت الدموع في عيونها' : معقولة هكي؟
معتصم : العفو خيرك تبكي؟
عماد 'ضحك' : شكلها متصليش و خايفة من عذاب القبر.
معتصم 'قعد يضحك' : زعما!؟
هبه : مصح وجهك نصلي أنا .
معتصم : صدقتك، نحلف عليك لا صليتي عشاء أمس لا صبح اليوم.
هبه : الحق   اي.
معتصم : امالا كيف اسمها تصلي؟
هبه : نصلي لكن مرة مرة.
عماد : تو نقول لأمي .
هبه : اللي يسمعك يقول ليل نهار تصلي، نحلف عليك ما تعرفش القبله وين.
عماد 'شاف لمعتصم' : خليها تسكت خير ما نحذفها في البحر رسمي.
معتصم 'فنص في هبه بمعنى أسكتي' : غر تعصبت منك بس فوتها... ولا هبه .
هبه : لا ندوي بالحق.
معتصم 'شافلها، فنص فيها و همس' : عندنا عرس يا هبه.
هبه : انبصر عليك عماد را مش تصدق.
عماد 'إبتسم ع الجنب' : : به كويـس .
معتصم : زعما أزم مشى للمصرف؟
عماد : مش عارف، اتصل بيه.
معتصم : هذا هو 'فتح تليفونه و إتصل بـ أزم شويه و رد عليه'
أزم : ايوا.
معتصم : ها شن جوك؟
ازم : باهي .. شن جو المحاضرات؟
معتصم : مـ مشيتش .
ازم : مش نضت و طلعت امبكري.
معتصم : صارتلي حاجة رجعت لاحوش، قولي انت في المصرف؟
أزم : شيء أكيد .
معتصم : من أمتا؟
أزم : وصّلت مهاب و اديب و شديت الطابور، حتى للخدمة مـ مشيتش.
معتصم : إياه، باهي كلمتني يا راجل كان هذا جيت وقفت فب الطابور و انت مشيت للخدمة.
أزم : نحسابك في المحاضرة يا راجل كان هذا كلمتك.
معتصم : مزالك هلبا؟
ازم : أي .. وين انت؟
معتصم : طالع انا و عماد و هبه.
أزم : خير شن في؟
معتصم : لا غر كنتا بنـغيروا جو، ع أساس  و توا مروحين.
أزم : اها به .. شني رسمي الدوة اللي سمعتها.
معتصم : ع العرس؟
أزم : اي .
معتصم : والله يا وخيي رسمي .
أزم : اها به، أمتى ماشيين انتوا؟
معتصم : غدوا .
أزم : مش حـ نمشي معاكم انا.
معتصم "بإستغراب" : علاش؟
أزم : تستغبى انت؟ .. منقدرش نمشي يا معتصم.
معتصم : تقدر يا راجل، خلاص أنسى و كمّل حياتك مافي شيء يستاهل.
أزم 'ضحك بإستهزاء' : مش بالسهولة هذه يا خوي .
معتصم 'تنهد' : براحتك.
أزم : هي سلام 'سكر'
معتصم 'سكر تليفونه و تنهد بحزن'
عماد : قالك مش حـ يمشي.
معتصم : اي، قاعد عايش على ذكراها زي الغبي.
عماد : مش غبي ... صعبه يا معتصم لما البنت اللي حبيتها و اللي إختارها قلبك تخونك بكل بساطة، مفيش حد يقدر يداوي جرح أزم .
معتصم : لا يقدر ينساها، اذا كان هيا باعت حبه بالرخيص و اهو توا بتتزوج  شن مزال يبي فيها .. الكل يقدر ينسى، اهو انت كمّلت حياتك بعد سهى  و نسيت الماضي كله.
عماد : كملت حياتي أي، لكن منسيتش الماضي ... انا مزال مش ناسيها و مزال متذكرها و نتعذب لما نشوفها مع غيري، انا على قد ما حاولت ننساها مقدرتش، درت كل شيء باش ننساها لكن مفيش فائدة، شربت، خذيت مخدرات و صاحبت هلبا بنات لكن سهى قاعدة هنا 'أشر علة قلبه' ... و أزم مش حـ ينسى نوال.
معتصم : صح انا مجربتش الحب، لكن متأكد انه بينسى   بس بطريقة وحدة .
عماد : اللي هيا؟
معتصم : يحب غيرها.. و حتى انت حب غيرها تو تنساها.
عماد 'ضحك' : بالحق؟! .. الكلام هوا قوله على علاقة شهور مش سنين .. الكلام هذا ميمشيش مع علاقات من سن المراهقة للشباب .
معتصم : تي بالله انتوا تكبروا في المواضيع و عاطينهم قدر كبير، هي خانتني انا ننساها و نمحيها من تفكيري، زي ما حبيت مرة نقدر نحب ألف مرة بدالها، من تكون هيا باش انا نتعذب على خاطرها.
عماد : تو نشوفوك لما تحب شن يصير فيك.
معتصم 'ضحك' : انا كــان حبيت، حـ نحب بنت وفيّه معندهاش في جو الخيانه بكل.
عماد : دور و عدّلهم .. كان لقيت وحده هكي نشريلك هاي لوكس زي ما تبي.
معتصم : خلاص تم.. من اليوم لما ندور .
هبه : مشاء الله على خوتي... تحت السواهي دواهي .
عماد 'ضحك' : هو انتي هنا.
هبه : لا لا غادي  يا متاع سهى.
عماد 'سكت و تذكر أيامه مع سهى و كيف كان يحبها و يموت فيها، سرح لـ بعيــد و مركزش في كلامهم ولا في الطريق، كل تركيزه كان في ماضيه'
معتصم 'شاف لهبه' : باهي لكن معاش تفكريه الزح مش ناقصنا.
هبه 'عيطت' : بنديروا حاادث.
معتصم 'شاف للطريق و بحركة سريعة منه  حرك الدومان و تفادوا السيارة اللي كانت حـ تضربهم' : عمـــاد .
عماد 'رمش بعيونه و شاف لمعتصم' : ها؟
معتصم : بالشوية ع البنزينه إرخي رجلك.
عماد 'شد الدومان و قعد يسوق بالشوية، لين و قف السيارة ع جنب و حط رأسه على الدومان'
هبه 'شافت لمعتصم بإستغراب'
معتصم 'كان يشوف لهبه بعدها شاف لعماد' : خيرك عماد؟
عماد "بصوت ضعيف" : شيء 'قام رأسه و فتح الدرج اللي بينه و بين معتصم، طلع حبّه و خذاها' .
معتصم 'حط يده على جبهته' : الززفت .. عماد شن إدير؟؟
عماد : شيء 'كيف حط يده على الدومان من جديد'
معتصم : لا لا لا .. انزل خليني انا نسوق خير ما ادير بينا حادث.
هبه 'قعدت مستغربه من كلام معتصم و نظرات عماد، مفهمتش منهم ولا حاجة'
عماد 'فتح الباب و نزل و كذلك معتصم، بدلوا الأماكن و قعد معتصم يسوق'
هبه : خيركم؟
معتصم : شيء شيء.
هبه : خيرك عماد؟
عماد 'تنهد، شافلها و عيونه ذبلانه'  : نحبهاا انا  خدت روحي هيا .. سلمتها قلبي و هي باعاته بأرخص ثمن .. 'قرن حواجبه بعصبية' .. الـ*** اللي خذاها لما نذبحه ولد الـ****.
معتصم 'لف رأس عماد للروشن' : اصحي يا هوو شن تقول؟؟
عماد 'قعد يحذف في كلام مش مفهوم و نصه سب'
معتصم 'قعد متوتر و على اعصابه من كلام عماد... في كل حرف يشوف لهبه و يضحكلها ضحكة صفراء'
هبه 'مصدومـة لأبعد حد من كلام عماد و من التغيير اللي صارله فجأة و مزال مش عارفه سببه'
عماد : تي ا 'قطع كلامه صوت تليفونه يرن.. قامه و رد' ..  ايــوا؟
: كيف حالك يا حبيبي؟
عماد : كويس .
: ان شاء الله صحصحت مش زي امس.
عماد : اها،  شن تبي؟
: عماد قولي خيرك متغير عليا هكي؟
عماد 'تأفف' ': اسمعي، فيش بينا نصيب را.
: شن قصدك!؟
عماد : قصدي واضح، امشي في حالك و انتي زي ذبان الصيف النم.
"ببكاء" : عماد انت شن تقول؟؟ متأكد من كلامك؟ معقولة هانت عليك عشرتنا و حبنا؟
عماد 'ضحك بإستهزاء' : متأكد مليون في الميه... عشرتنا؟؟ حبنا؟؟ 'قعد يضحك (ضحكته فيها شهقات ديما)' .. تي لا نحبك لا شيء، انتي مجرد تسلية و خلاص را.
: و الوعود اللي بيننا؟؟ مش وعدتتي انك تقعد معاي للموت و تتزوجني؟!
عماد 'قعد يضحك بشكل هستيري' : لا كلا جو انتي .. وعود شني بري انتحري.. اناا نتزوجك انتي؟؟  .. يا حلوة زي ما كلمتيني تكلمي غيري و زي ما بعتي صورك ليا تبعتيهم لغيري    قصدي بري انتحري اشرفلك را.
'قعدت تبكي بكل حرقة' : حسبي الله و نعم الوكيل فيك ... ربي ينتقم منك يا عماد في أغلا غالي عندك يــارب، ربي يحرق قلبك زي ما حرقت قلبي .
عماد : به آمين .. كملتي ولا مزال ؟
: تفوو يا حقير يا نذل، ربي ينتقم منك 'سكرت'
عماد 'ضحك' : سكرت في وجهي 'انفجر ضحك'
هبه 'رفعت حاجبها بصدمة' : قصدك انت هكي؟؟
عماد 'شد بطنه من الضحك' : مصدقه اني نحبها  وو عليا ووه.
معتصم : لا حول ولا قوة الا بالله.
عماد : نعليا  تدعي عليا من كل قلبها 'زاد ضحك' .. ربي ينتقم منك يا عماد .. مسكينه .
معتصم 'وجعاته البنت و وجعه حال عماد، تأفف و قعد يفكر في المستقبل و شن مخبيلهم و هل المستقبل ح يكون افضل من الحاضر ولا أسوء .. مشّى يده على شعره بتوتر و ركز في الطريق'
هبه : و اخيراً وصلنا للحي .. اول مرة نعرف ان منطقتنا بعيدة .
معتصم 'درس السيارة، هي انزلي هبه'
عماد : و انا؟؟
معتصم : خليك انت نبيك.
هبه 'شافتلهم و نزلت، طقت ع الباب ، فتحلها اديب و خشت'
معتصم 'شاف لعماد' : شن هذ اللي ادير فيه انت؟؟
عماد : شن  هوا؟
معتصم : موضوع البنت و الكلام اللي تحذف فيه قدام هبه و الحبّه اللي بلعتها شن هذا؟
عماد 'قعد يشوف لمعتصم' : شن الجديد؟
معتصم : باهي مفكرتش كان هبه تقول لأمي ع اللي صار؟
عماد 'ضحك' : و تقول شن بيصير يعني.
معتصم : تي خلاص يا را قداش بنتستر عليك و كل يوم طالع بكذبة جديدة باش حضرت جنابك متنفضحش قدام حد، حسّن من روحك خيرلك را.
عماد : وااكــــ .. 'طلع سلاحه و حطه على رأسه' نقتل روحي أنااا باش ترتاحوا مني!! .. خلاص انا نبي نموت  مليت منكم متخلوش الواحد في حاله، خلوني بروحي نسكر نصيع نخنب نقتل ندير كل شيء مخصكمش فيا خلــوني في حالي كرهتكم انا كرهـــتكم في كل دقيقة تفتحوا نفس الموضوع، ربك يهدي من يشاء  و انا مش مكتوبتلي الهداية خلاص خلووني.
معتصم : به به، نحي السلاح هي.
عماد 'شاف لمعتصم و ####'

__________________________________________________

#حنين_الشوق