#حياة_السته_مليون
#حنين_الشوق
.
.
.
.
: عماد قاعد؟
مهاب "بإستغراب" : من انت؟
: أنا علي صاحبه، وينه هو قاعد؟
مهاب : لا مش قاعد والله.
: تليفونه معاه؟
مهاب 'رفع حاجبه' : شن تبي خونا.
: يا ودي نبي عمدة ضروري.
مهاب : مش عارف انت و حضك، كان رد عليك معناها معاه و كان ماردّش معناها مش معاه .. اها شوفتها كيف ساهلة.
: برا اقلب وجهك خير ما نطربقلك رقبتك، فاضي حتى انا نهدرز مع ****.
مهاب 'ضحك' : لا توا تأكدت انك صاحبه.
: به؟
مهاب : زي ما قتلك مبكري.
: ياعن *** و *** 'ركب سيارته و مشى'
مهاب 'ضحك و رجع للصالة'
الأم : مني؟
مهاب : واحد يبي عماد.
الأم : اها.
مهاب : العلوم البشرية زعما شن صار فيه؟
الأم : شني؟
مهاب : أديب قصدي.
الأم 'شافت للساعة' : تو شوية و يجي.
مهاب : شن الغذاء؟
الأم : مبكبكة.
مهاب : هكا هو، اصلا رأس مالنا نص بالتن فطور و كاشيكين مبكبكة غذاء و العشاء كاشيك مبكبكة قاعد من الغذاء اللي هو متاع اديب.
الأم : تحشم على وجهك، بعدين امتى صار الكلام هذا! تي انت تقعمز تكمل القصعة كلها و العشاء يا خبزة و دحي يا تن.
مهاب : تو يوم يصير الكلام هذا نسجلّك بث مباشر.
الأم : تو نشوفوا.
مهاب 'فتح النت و قعمز يلعب في بوبجي'
الأم 'شافتله بربع عين و مشت للمطبخ' : حي مهاب مفيش فلفل أحمر.
مهاب : و المطلوب؟
الأم : برا للدكان.
مهاب : نكمل الشوط هذا قبل.
الأم : شوط شني يا نهار احرف الغذاء ع النار.
مهاب : بوشنكي يا امي، دق متين توا.
الأم : نوض خير ما نسكر النت توا.
مهاب : زمري.
الأم "بعصبية" : شن هيا؟
مهاب 'طفى تليفونه و وقف قدام امه' : وين الفلوس.
الأم : في 5 ع الطاولة خوذها.
مهاب : به 'خذى الفلوس و مشى للدكان' ... السلام عليكم.
صاحب المحل : و عليكم السلام.
مهاب 'خش خذى فلفل و رجع للكاصّه' : هاك خونا.
صاحب المحل 'خذى الفلوس من مهاب' : قاعد هارب خوك؟
مهاب 'كان يشوف للتلفزيون و لما سمعه شافله بعصبية' : نعم؟
صاحب المحل : خوك عماد قاعد هارب من الردع؟ قالوا قاتل ولد عيله متسميه.
مهاب "بعصبية" : شن دخلك بيه انت، ألهى في روحك و انت ديما حاشي رأسك بين الناس أحرف من السحلية، ما ناقص غير انت تدوي على خوي 'لف بيطلع من المحل'
صاحب المحل : خوذ الباقي.
مهاب : خليهم عندك مش لازميني 'طلع و ملامح الغضب مسيطرة على وجهه، رجع للحوش و عطى لأمه الفلفل و رجع لمكانه و للبوبجي'... يا رقم 3 تعالى معانا الزون يصغر هيا.... حي في صوت حركة برا .. اهو بنطلع نشوف شن فـ 'قطع كلامه نغمة تليفونه، سكر الخط بعصبية و رجع يلعب، ما فاتتش دقيقة و اتصل مرة ثانية، و هذه المرة رد وهو في داخله يسب و يلعن'
: ها موها.
👑حنين_الشوق👑
مهاب : خير امك علاش متصل.
: تي غر خيرك وسع بالك.
مهاب : علاش متصل بسرعة ال** مش فاضيلك.
: تي بنقولك في سؤال ما عرفتش حله.
مهاب : سؤال شني بسرعة؟
: السؤال متاع الدرس الخامس في الأحياء.
مهاب : منعرفاش هي تشاو.
: تي الامتحان غدوا يا ودي و السؤال هذا مهم قالت.
مهاب : يا عن شكلك و شكل اللي يعرفك و عنبوك و بو القرايا 'سكر الخط و زادت عصبيته لما لقى روحه ميت، حذف التليفون و خش للدار، قربع الباب بقوة و قعمز يقرا'
الأم : حيجي يوم و يطيح الباب على إيدك عارفه انا.
___________________________________________________
أنت تقرأ
حياة السته مليون ((الواقع الليبي ))
General Fictionرواية من كتابتي 'حنين الشوق' تحكي عن الواقع الليبي من جميع الواجهات ... قصص الحب، الدمار، الوجع، الخطف و كل ما يتعلق بحياة الليبين في السنوات الأخيرة❤ 2#- طرابلس #2 - Libyan 4#- ليبيه 5#- ليبين #حنين_الشوق ممنوع النشر بدون إذني✋
