سكرة الحب لهجة عراقية وتتوفر فصحى على منتدى روايتي قلوب احلام

الفصل الخامس

#سكرةالحب

كتابة رؤى صباح مهدي

الفصل الخامس

بالعامية العراقية

يوم الاثنين جنت حايرة.. يجي لو لا؟ صار احسن لو لا؟ اكيد الدلال اللي عايش بي وحب زوجته سوو زين بس هم يجوز ميريد يعوف البيت من كد الدلال اللي عايش بي. ما اعرف ليش تذكرت من جنة سوة اني ويا طيور الحب وجان يطلب مني اروح للسطح حتى نتحاجة ومن ارفض يغريني بهدية اذا قبلت ينطيها الي .. عادة تكون وردة من حديقة بيتهم وريحتها تخبل ويدري بية اموت على الورد فبسهولة يكدر يغريني بيها واني مثل أي بنية بعمر المراهقة اذا حصلت وردة سواء الها قمة معنوية او لا فجنت اخلي الوردة بين طيات كتاب حتى تنحفظ وتظل للابد تذكار حبنا اللي هسة ضاع. هسة اني أتمنى لو اكدر احط هدية حتى نتشاوف ونسولف ونعوض السنوات اللي فاتت.

وقبل الدرس الأول طب للإدارة وجان بكامل اناقته ومزين وحاط العطر اللي دائما يحط منه. سلم على الكل واني من ضمن اللي سلم عليهم. من وصل يمي جانت ضحكته باهتة كأنه يتمنى لو يعبرني وميسلم عليه. اني جبرته يوكف بنظراتي اللي تعلقت بي وقلت اله:

"ان شاء الله هسة صرت احسن؟"

جاوبني وهو يباوع لي بعيد متجاهل نظراتي المتعلقة بي:

"الحمد لله "

بدوا الأساتذة يروحون على حصصهم ولثواني بقينا اني ويا بس, فتجرأت واني بغمرة الاشتياق وكتله على السريع قبل لا اشرد:

"امجد.. اشتاقيتلك هواي"

وعفته وركض على الدرس مالتي وهو ظل باهت من جرأتي. قلبي جان يدك سريع هم من كد الشوق وهم من كد الخوف. ورة الصف جنت واكفة يم مجموعه من الطالبات عدهن اسأله دا اجاوبهم وسمعت صوته يستأذن مني :

"ست اماني ممكن لحظة؟"

وكف قلبي وحسيت العرك كام ينكط من كصتي ورجلي صارت خيوط.. بيني وبين نفسي شطحت بالاحلام وكلت اكيد هسة راح يعترفلي بشوقه وحبه الي ويكلي راح يعوف مرته ويرجعلي ..

هو جان واكف ديحاول يستجمع شجاعته حتى يكدر يكول الكلمات اللي جاي حتى يقولها. بابتسامه اشتياق صرفت الطالبات ورحت ركض وقفت كدامه وهو بعيونه الذابلة وحواجبة المعقوفه جان رأسا يسألني :

"ليش رجعتي؟"

صوته ونبرته العصبية صابتني بالصدمة. ظليت فاتحة حلكي وصافنة علي وهو يباوع علي بعصبية جاوبته باصرار واني أتمنى تكون هاي اللحظة حاسمة بتغيير حياتي:

"ابوية توفى ورجعت.. انت ليش رجعت مو جنت مسافر؟"

سد عيونه وجاوبني بنفس العصبية وهوا حار منه حرك وجهي:

"لان ابوج مات"

وعافني بلا أي تفسيرات إضافية للكلام اللي قاله.