سكرة الحب لهجة عراقية وتتوفر فصحى على منتدى روايتي قلوب احلام

الفصل 11 و12

راح انزل بقية الفصول كلها اليوم ...

صوتوا على القصة حبايب واكو بعد قصص على الصفحة شوفوها وصوتوا عليها 

#سكرةالحب

كتابة رؤى صباح مهدي

الفصل 11 و12

بالعامية العراقية

الصدمة ظاهرة تماما على وجهي وهو يباوع عليه واني باهتة بوجهه. دفعني وفات للغرفة فصحت بي:

"وين فايت؟ شنو نسيت احنة تطلكنة؟"

جاوبني وهو يدور بالغرفة ما اعرف على شنو:

"شعده هذا يمج؟ شيريد منج بهل الليل؟ وانت شلون تلتقين بي وحدج ..."

قاطعته واني دا اخمن احساسي بان احد يراقبني صحيح فاكيد هو حاط احد يراقبني ويرجعله تقرير كامل بكل تحركاتي:

"انت ميخصك"

كمل تفتيش بغرفتي وبعدين اندار علية وتقرب كلش مني وصرخ بوجهي:

"ابوية حطني مراقب عليج.. يعرف بيج كلش زين متكعدين راحة وراح تخزينا كدام الناس"

صرت أعصاب واني اسمعه ديحجي عليه بهل الطريقة هو شعلية بية شيريد مني ميخصة هذي كلها الكلمات جانت تدور براسي وزادت عصبيتي من شفته كعد على فراشي ويباوعلي عبالك اشتغل يمة. صرخت بي واني اشر على الباب:

"برررررة منا... ولتجي بعد لهنا وانسى انت تعرفني.. اني أصلا راح اتبرة من كل العائلة اعتبروني ماكو"

مثل ما هو طردني من بيت ابوية بليلة ظلمة اني طردته من غرفتي بس هو شخصيته هواي تغيرت عن قبل احسة صار اكثر شبه بابو بنظراته وتصرفاته وحبة للتملك وحبه للواكة من كل المحيطين بي. باوعلي واني اشتعل نار وكام من الفراش وصفكني براشدي فرني فر. صرخ بوجهي وهو يجر شعري :

"تتبرين من منو ولج.. اسمعي اذا ما حسنتي اسلوبج وتادبتي راح تندمين "

كمت ابجي.. ماكدرت اكتمها لان مو بس بالاهانة حسيت لا وحسيت بالضعف. ضعيفة كلش ووحيدة لدرجة لا اكدر ادافع عن نفسي ولا اكدر اطلع هذا الوحش من غرفتي حتى اخلص منه. هو بكل سهولة طردني من بيت ابوية بس اني ما دا اكدر اطلعه منا.. سمعني ابجي وكال:

"اماني.. المرة الجاية مراح اجي وحدي.. ومراح تنهانين بس بالغرفة هنا لا ... راح الكل يشوفج ويعرف شكد انت رخيصة"

اني رغم الدموع ما سكتت :

"انت الرخيص كدرتك على النسوان واني ما مسوية أي شي حتى أخاف منك ..."

مد ايده لرقبتي وحيل ضغط عليها.. حسيت روحي راح تطلع. متت النفس بعد ما اكدر اجره. قطعت الجملة اللي جنت احجيها وظليت مثل السمجة الي طلعت خارج المي أحاول الكة ذرة هوة حتى ما اموت. هو يباوع على وجهي ويتبسم مستمتع بالمنظر وخلص كلت هاي النهاية راح اموت.. بس هو من انفخ وجهي وصار لونه بنفسجي هدني.. وكعت على الكاع ضعيفة منهكة واخر كلمات سمعتها منة :