احب اعرف شنو رايكم بالقصة حبايب وانتظروني بقصة جديدة وحقيقية من الرسائل وهسة لتنسون تصوتون على الفصل وشكرا الكم من كل قلبي.
#سكرةالحب
كتابة رؤى صباح مهدي
الفصل 17
باللهجة العراقية
يوم الثاني علساس اطلع بس وين اروح. اني ودا احضر نفسي للطلعه كتلها لامي:
"اني راح ارجع لشقتي وانتي ولبنى اذا تريدون تعالوا كعدوا يمي"
باوعت امي على لبنى وسكتت.. سالتها:
"شنو؟ راح تبقين يم عمتي ساكنة؟ ترة هي جانت تعرف باللي راح يصير مستحيل ضامين عليها وهي أصلا ما مكعدتج يمها الا حتى تراقبج وتشوفج شتسوين"
امي جاوبتني:
"على كيفج اماني بعدج ما تحسنت حالتج راح تبدين المشاكل مرة ثانية.. "
خنزرت على امي لان حسيت وية كل اللي سوو بية ماعدها أي تعاطف وياية ودتحملني اني المسئولية. لا اراديا رفعت صوتي بسبب احساسي بالخذلان منها:
"اني ؟؟؟؟ اسوي مشاكل؟؟؟ انت صدك تحجين ؟ ورة كل اللي سوو بية"
امي جاوبت:
"اماني هسة خوش وقت تتصالحين بي وية عمج وتتشفين شرهم. صدكيني راح ترتاحين من تتصالحين وياهم. واعتذري لعمج وتنازلي عن القضية وخل يطلع مجيد ورجعيله وخل الحياة تمشي"
اني عقلي وكف عن التفكير... جنت ابجي هيج بلا أي احتمال بعد. عاتبت امي:
"ارجع للإنسان اللي فضحني؟ انت صدك تحجين ورة ما ضربني وهاني كدام الناس؟ تردين ارجع حتى اصير المكفخة مالته لا وبعد اطلعه من السجن واعيش ويا مرة ثانية"
لبنى حاولت تلطف الموقف فكالت:
"اماني احنة بس خايفين عليج.. عمي ديهدد اذا ما تنازلتي راح يأذيج"
صيحت على لبنى:
"وامجد ومرته ؟ موهم مشتكين لو كدرته بس عليه؟"
جاوبت امي :
"راح يحلوها .. جمان راح تأخذ فلوس وهي متفقة وية رجلها يفصلون بمبلغ وكلشي يخلص"
رفعت حاجبي مختنكة ورديت:
"اهااااااااااااااا... يعني امجد وجمان يفصلون بس اني اتنازل وانذل.. انت صدك عائلة مكفخة ومابيكم خير... يعني اعوف حقي ليشششششششششششششش؟ ضربني وهاني وكسر عظامي وشوه وجهي.. باعي على وجهي زين... كله ازرك وخشمي مكسور وسنين من سنوني ماكو .. باعيلة يمة... شوفي شعري المهلوس والفراغات اللي بي.. باعي ايدي.. وبعد تطلع الإصابات بالايام الجاية.. "
سكتت حتى اجر نفس وكملت:
"ما اتنازل .. وصلولة هذا الحجي... واني راجعه للشقة ارتب اموري واسافر لغير مكان تريدون تجون وياية اهلا وسهلا متريدون بكيفكم.. اني بعد ما اكدر اتحمل أي شي... ما اكدر "
أنت تقرأ
سكرة الحب لهجة عراقية وتتوفر فصحى على منتدى روايتي قلوب احلام
ChickLitاماني تحاول الرجوع الى حبيبها السابق لتنصدم بانه مرتبط. وتحاول ان تسرقه من زوجته
