سكرة الحب لهجة عراقية وتتوفر فصحى على منتدى روايتي قلوب احلام

فصل 13

#سكرةالحب

كتابة رؤى صباح مهدي

الفصل 13

بالعامية العراقية

صينية الاكل جانت مغرية واني جنت جوعانة ورغم افكاري اللي رادودتني انو ممكن تكون خالتلي سم بالاكل لو شي مثلا يسوي اسهال ما كدرت اقاوم الريحة. مبينة جمان طبخها طيب من الريحة مالته. كملت المواعين وتمنيت لو اكل بعد. هلكد جنت جوعانة. بعدين غسلتها وبحجة ارجعها كلت بلكت اشوف امجد لو يكلي دخلي للبيت واسولف ويا. بس من رحت دكيت بابهم محد فتح الباب. كلت اكيد طالعين بس معقولة ما سمعتهم من طلعوا . تمددت على الفراش مالتي العب بالتليفون وبالي يم الباب. وفعلا ورة كم ساعه سمعت صوتها .. جمان دتحجي ويا ماميزت الكلام بس النبرة جانت حادة وهو صوته هادئ كلش. رحت على كيفي اباوع من العين السحرية وماشفت هلكد لان طبوا للبيت بسرعه. مارحت وديت المواعين لان خفت لا يفتهمون دا اراقبهم وباتن المواعين يمي.

بالمدرسة ظلت المضايقات من سوزان خانم. نظرات وبسبسات والطالبات الداير مدايرها مسويات عصابة.. النوب المدرسين والمدرسات ما اعرف شبيهم وياية. لسانهم ثقيل كلش ويتحاشوني واذا اسال سؤال كلمة او كلمتين ويعوفوني. بالدرس سوزان جانت تتعمد تثير غضبي. تسوي اصوات بحلكها لو تبسبس وية البنية الوراها او الكدامها لو باظافيرها تحك الخشب... متت بالكوة حافظت على اعصابي واني بودي اروح الطمها على وجهها.. اخر شي طلعت علج وظلت تعلج بي بنص الدرس. لهنا وكافي.. صحت بيها:

"سوزان؟ هذا شنو بحلكج؟"

باوعتلي بس ماجاوبت ظلت تعلج بي بلا اهتمام. تقربت عليها وكتلها:

"طلعي من حلكج ميصير بالدرس تعلجين"

جاوبتني بصلافه:

"وانت هم طلعي من حلكج ست اماني"

وظلت تباوع على صديقاتها وتتمضحك وتغمز الهن. اني بالبداية ما افتهمت مقصدها. بس من شفتها تغمز للبنات وتتمضحك شبت النار بية.. لزمتها من شعرها وصرخت بيها:

"تربية سكط.. كومي وياية للمديرة "

اني ما متعلمة اعاقب بايدي ابد ما مسويتها واي شي راسا اروح للمديرة وهي تتخذ الاجراء اللازم. المشكلة المديرة من يوم الاندماج وهي مريضة. يوم مداومة و10 ماكو وبمكانها مدير مدرسة الولد. يعني اذا اروح هسة اوديها واشتكي عليها يمه شراح اكلة كالت بلة؟ هي أصلا ما نطتني مجال اسوي أي شي.. جرت ايدها من ايدي وكلنا نعرف شكد هي قوية .. صاحت بوجهي كدام الكل:

"اني ميشرفني ابقى بصف وحدة مثلج. وراح تشوفين منو اللي راح يشتكي.. اخلاقنا من وراج تدمرت"

شالت جنطتها وغراضها وجان تطلع واني صافنة على وقاحتها وبكاحتها. صحت وراها بس ما التفتت حتى. رحت دا اشوفها وين دتروح شفتها دتتجه على إدارة المدير. قلبي كام يدك شراح تكول للمدير. ماردت بقية الطلاب يشوفون اضطرابي وخوفي فظليت بمكاني وحاولت ابين طبيعية ورجعت ادرس . طبعا هي بعد مارجعت للصف واني من دك الجرس ظليت الوب اريد افتهم شكالت للمدير وشكذبت علي. ظليت انتظرة يصيح الي يحجي وياية بس ماكو.