سكرة الحب لهجة عراقية وتتوفر فصحى على منتدى روايتي قلوب احلام

الجزء 15

#سكرةالحب

كتابة رؤى صباح مهدي

الفصل ال15

باللهجة العراقية

دكيت الباب ودخلت وجانت مديرة مدرستنا هم مداومة ما اعرف شعجب. كعدت يمهم وظلت المديرة تحجي وياية وهي مو كلش يعني تعرفني كمدرسة بس تعرفني من جنة طلاب هي جانت مدرسة ووراهة صارت مديرة. وراهة اطلقت المفاجأة مالتها:

"اماني بنتي اكو شكوة عليج من طالبة.. هي وزوجها اشتكو عليج بالتربية و.."

قاطعت المديرة:

"ترة مبين هاي لعبة من ضرتي حتى تأذيني ميحتاج كل هاي الرسميات"

جاوبتني المديرة:

"اماني احنة هسة العين علينا وموضوع ضرب الطلاب وبالذات بهذا العمر مو بالهين ينتهي.. وانت وياها اعرف بينكم أمور شخصية بس هي اشتكت واكو شهود من الصف.. احنة حجينا ويه المشرف وحاولنا نغطي على الموضوع وكلنالة على المشاكل بيناتكم بس هو مصر نتخذ اجراء بحقج"

حسيت الدنيا كامت تموج من جوة رجلي.. دخت وخفت لا يطردوني.. اذا طردوني من المدرسة هاي هية مستحيل راح اكدر اعيل نفسي .

المديرة كملت وسط نظرات الذعر مالتي:

"احنة نعرف انت هسة بمرحلة صعبة .... أتصور الكل يعرف.. بس اماني هاي مدينة صغيرة والحجي بيها يطش وانت مرة مطلقة... بنتي.. حاولي تتصالحين وية اهلج باي ثمن كان احسن ما تزيد المشاكل. هاي نصيحة اعتبريها من صديقة لصديقة. وهالمرة احنة راح نرتبها بيناتنا بس المشكلة الجاية ما اعرف شلون ندبرها"

بعدين باوعت علية وكملت:

"اذا تبقين هنا يجوز مشاكل اكثر تصير"

رديت عليها :

"شكرا على النصيحة وعلى المساعدة"

عفتهم وطلعت واني خلص انتهيت وقرار بداخلي لازم انفذة ... اعوف كل شي وابدأ من جديد بس شلون. ردت احد يفكر وياية اناقشة بالقرار واشوف رايه. ماعندي غير امجد وهو من يوم اللي حجينا سوة بشقتي وهو يتفاداني وصار اكثر ورة ما مرته كالت على موضوع الحمل مالتها. مع هذا اني ماعندي احد غيرة اساله. دزيت رساله اله اريد منه نلتقي بشقتي كتله اريد اخذ رايه بموضوع مهم. وفعلا اجة مثل ما تواعدنا. ساعه جانت تقريبا بال7 المغربية. دك الباب واني فتحتها ومن شفته للحظة نسيت كل اللي اريد اكولة اله. ظليت اباوع علي بحسرة.. حسرتي على ضياعه من ايدي للمرة الثانية. سالني:

"ردتي راي بموضوع؟"

جاوبته :

"تفضل اكعد.."

تبسم وكعد على الكرسي بس حسيته ما مرتاح. كال:

"ان شاء الله خير"