سكرة الحب لهجة عراقية وتتوفر فصحى على منتدى روايتي قلوب احلام

الفصل الثامن

تصويت من فضلكم 

#سكرةالحب

كتابة رؤى صباح مهدي

الفصل الثامن

بالعامية العراقية

بنص الطريق يلة وعيت على نفسي.. شلون ركبت ويا؟ اني من البداية ردت اعوفه وزواجة راح ينطيني حجة علي.. يطلقني ونخلص. بديت استرد نفسي شوية شوية ورة الصدمة اللي بعدني مو كلش مصدقتها. وصلنا للبيت نزلت ركض وفت على البيت ودخل هو وراية ووضعه عادي جدا. مامهتم ابد كانما ماكو أي شي. سألته واني عصبية:

"صدك تزوجت علية؟"

جاوبني وهو يتبسم:

"بعدني"

خنزرت علي واني اشوفة يتلاعب بمشاعري وسألته:

"بعدك؟؟ شنو يعني بعدك؟"

رد وهو يتشفى بية:

"عقدت"

وهو شنو الفرق بين العقد والزواج يعني مثلا؟ سألته:

"منو؟؟ اكيد وحدة من اللمة الحلوة اللي امك لامتها"

راحت الابتسامة من سمعني اجيب سيرة امه وكال وهو يكز على اسنانه:

"تعرفيها كلش زين.. وهي تعرفج اكثر.. "

وباستهزاء كمل:

"وهواي تمدح بيج بالذات كدام ابوية"

عضيت على شفايفي وحزرت الاسم ... مبينة متحتاج ذكاء.. كلت اسمها واني أتذكر كل مواقفها وياي:

"سوزان مو؟ "

وبصوت ناصي كملت:

"اكيد "

هز راسه وهو يفتح باب الثلاجة ويطلع مي يشرب منها.. ورة ما كمل شرب مي قال:

"هذا راح يظل بيتج.. وهي بيتها غير مكان. واماني بلا مشاكل "

سديت عيوني وحلكي.. ماكلت ولا كلمة كمل حتى يجبرني احجي:

"يعني هذا الزواج ماراح ياثر على علاقتنا لان هي أساس من البداية ابرد من الثلج"

وغمزلي وهو يستهزء بية.. كلت بصوت واثق:

"اريد اطلق. خلص انت خطبت روح عيش حياتك مثل ما تريدها وان شاء الله تلكة السعادة وياها.. واني هم خليني اشوف حياتي ...."

قاطعني بلؤم:

"طلاك شنو بعد؟ لا اماني لا.. ما اعوفج لازم تدفعين ثمن هواي شغلات قبلها"

انرعبت من لهجته الجافة .. كررت:

"ثمن ايش اللي ادفعه؟ مجيد خلينا ننفصل بهدوء لان اني ما أعيش وية ضرة"

بينت علي العصبية وصاح:

"انت هواي حجيتي وهواي سويتي.. تصرفاتج اماني مال وحدة دايرة على حل شعرها مالها صداد ولا رداد ويحتاج ايد قوية تلزمج حتى يخف تهورج لخاطر متجيبين النة حجاية كدام الناس"