#رواية...انا هي جميع نساؤك..

مستقبل منارس ونذرها 💔

هلاوو بنات قلبي

بما ان ماكوو بارت

حبيت اغششكم شوويه...

عن مستقبل منارس ونذرها....

اتبعوني...مشهد👇👇👇👇👇👇

......................

شلت طفلتي ولبست حجابي وعباتي وطلعت

روحي هايمه وصار اسبوع عيني ما شافت النوم

والدموع تنزل بغزاره...

انه خسرت نذري لا مااصدك وروح غرومه ابوسن الرجلين بس يرجع الي....

احسن روحي معطوبه والالم ياكل بصدري

بعده عني سرطان ينهش بعضمي

باوعت لبنتي وطفلي الثاني الي ما ولدته اني لا ربيته

بس اعز من روحي

حضنت البنيه بستها بخدها

مرة عمي صاحت عليه كالت...وين منارس

باوعت عليها باسئ وروح ذايبه همست بنحيب ...رايحه ابوسن الرجلين بس يرجع نذري

هي حطت ايدها علئ راسها وبجت

شفت جاسم واكف بالباب

باوع عليه كال...هااا منارس وين رايحه خوويه

جريت حسره كطعت انياط كلبي جاوبته...خويه بعد اختك وديني البيت وثاب

هو عقد حواجبه كال...خلي يولي هل عار لا ترحيله هل نكس ومنذر يرجع وعيونه تشوف

بلعت حسرتي وجاوبته...خوويه النار تاكل بكلبي عبن هذا ابو وليداتي احبببنه

واحسنه بخطر خوويه انت ما تعرف الصار جمره تاكل

هزيت راسي ممصدكه الصار مستحيل مستحييل

هيج المنذر يضيع هييج يلتفون عليه

كال...خوويه طبي جوه احنه نحلها

توسلته ببكاء...فدوه اروحلك بعد اخيتك خليني اروحن

هو خطيه فتح باب السياره وركبت بسرعه ساق البيت وثاب

واخذت الطريق كله ابجي واطفالي تبجي وياي...

همست...وين اهل العگل ركابة الخييل

وينك يصلف من بعدك ضعنه ولزمتنه الغمان...

انت الوحيد التكدر تسحل هل عار من عكاله...

وصلنه للبيت

نزلت من السياره باوعت علئ جاسم كتله...خوويه جاسم ضل هنا انه هسه اجي...

هو اصر يدخل وياي بس انه ما رضيت  وخليت ودكيت الباب وحدي...

فتحتلي الباب مرة وثاب

لابسه ثوب اسود ومنگبه ...

بلعت ريكي كلتلها ...الشيخ موجود

كالت بتجبر...فووتي

دخلت شفتهن كلهن لابسات اسوود يخوفن

من شافني هجمن عليه بذاك الغلط والمسبه

اجه فاروق وكف بجبروت كلهن...اششش التفك حلكها اشك حلكها

باوع عليه كال فوتي الشيخ بديوانه

رجفن رجليه وحضنت طفلتي ولزمت الثاني

دخلت برعب شفته كاعد بااريحيه

والدله والفنجان كدامه ولحيته عاليه وسبحته يفر بيها

من شافني رفع راسه وركز بنظره عليه

مسحت دمعتي كتله بتوسل...ابوسن ايدك ترئ انه مالي ذن ليش تاخذون رجلي مني

هو رفع حاجبه وضحك بااستهزاء...اممم وشتردين

جاوبته بحزن....نذري

هو ضل يمسح علئ لحيته وانظاره تخترقني بفساد كال...اقري عليه الفاتحه

صرخت بجزع...ياله يووومك قبل يووومه والله والله اهجم العراق عليكم والله انتقم منكم

نذري يرجع يعني يرجع...

هو ضحك بخبث...اوووف لبوووه فدووه الحلكج

جريت نفس وابجي حييل بس دموعي ما اثرت لا بفاروق ولا بوثاب....

رجع كال...دموعج غاليه منورتي ميخالف التردينه يجرالج حتئ تعرفين معزتج عندي

فرحت ضحكت بفرح ممصدكه يعني راح يرجع نذري

جاوبته...ابوسن ايدك اصيرن خدامه فدوه اروحلك والله المنذر موش حاقد حتئ هو ما يدري بالسالفه هو موش حاقد...

هز راسه باسئ وكمل...اي بس عندي شرط واحد لا غير

صفنت عليه وعقدت حواجبي سالته..شنهي الشرط

ابتسم بخبث وكال...تطلكين قبل كلشي وتنطينه جهاله اعقد عليج واتزوجج وبعدها المنذر بأمان....

وغير هل كلام اعتبري المنذر بعداد الاموات والله واني وثاب مستحيل اتراجع واتنازل عن كلامي

الي احجي يتنفذ بالحرف الواحد ولا تخليني اهجمكم هحم

جانت كلماتها سهام تخترق صمامات كلبي والحيره زادت عندي الف...

يا اما اموت يا اما امووت وماكو حل وسط

ونلف حبل مشنقه علئ نحري وذبحني وثاب....

.............

اعتذر منكم بنات بس قسما بذات لله وكل قسم غريب قسم بي خالد

البارحه موبايلي وكف من وحده

وديته اليوم العصر للمصلح وشتغل عنده

كاتبه بس الف كلمه متفيييد

هذا مشهد من الرواية ان شاء الله تحتارون اكثر بي

وبعدها مغامرات منارس مستمره...

كونوا انتم كونوا بخير....احبكم 💔

نور سمو العراق