الصخله شردت هالمكموعه خلتني اركض وراها مدري شتحس بروحه ليكول غزال يحضي الاغم اييه عزه بعينج شكد سريعه بطرك الحشيش وخبيزات يابسه وتركضين وانه ااجل تمن ولحم وتالي ينكطع نفسي والله لاشردتي الى اسويج هبيط واتعشى بيج وحدي تيله امشي لامج٠ كل هذا الحوار ويه الصخله
انه اسمي سويده هيج حضي عود امي خافت عليه من العين تعرفون ليش عمن انه بيضه ثلج وعيوني صفر ليمون وعندي رصعات ووجهي بدر اي لا ببالكم اني ابالغ وجدي هيج انه حلوه مثل مكلتلكم انه حلوه وامي خافت لايحسد وني اني عندي ثلث خوان واحد متزوج اسمه نعمان شويه سمين يشبه واحد اذكر جان يطلع بافتح ياسمسم مرته موتتني بس صدك انه ادكه من اعصب بس هيه حبابه تتحمل واخوي الثاني صلاح خاطب حضريه حلو طالع عليه
والصغير زيد يمه منه عمره ست سنين مدهرب كله لغاليغ مدبدب وكح الى فايدني بالتجسس امي وابويه بركة البيت اسمهم يتعاركون بلاكت غفل وتشوفهم يتبسبسون ويضحكون شياب هالوكت ماينعرفون
المهم احنه بالريف بيتنه طينه عدنه ٤دوانم وحلال ابوي مخلاني اكمل تعليمي شرطت عليه اخذ مكينه وكمت اخيط اشتريت بفلوسي تلفون ابو النت وكمت اطلع فصال واتعلم غير انه كمت ابدع هواي اجوني خطابه بس شنهي انه من جنت صغيره رحت ويه ابويه البغداد شنو كلهم لابسين براطير وغمصات يهبلن والريحه تفوح مو مثل اخوتي الصبح ويه الهوش وباليل ينام يم مرته حتى ايده مايغسله كلت ويه روحي الى الى اخذ حضري كبال مزرعتنه اكو بيت غديم من ايام الاقطاعيين متروك اهله سافرو للحضر اليوم وانه اركض وره الصخله وماشوف الى ناس داشه ناس طالعه ينضفون وخلون اثاث وسيارات بس بالتلفزيون اشوفه انه استحيت كومه زلم خطفت روحي ورديت هسه معلينه احجيلكم عن يومي من الفجر اصلي واعجن واكوم انضف تشك الشمس اخبز واروح الم البيض واملح الجبن اسوي ريوك مرت اخويه اسمه ياسه ماتكعد يربي لو ادك طبل عاد انه ماتعب حلكي اجفص ببطنه واهمش شعراته يله تكعد بس انقهر عليه لو تبقى هيج تصلع المهم اتريك واعوفهم اروح ارعى بالحلا ل وبين مايرعى الحلال احوش واكطف الزرع الم سله للاجل ارد ويه الصلا الكي امي طابخه بس شنهي طبخ مايتعب تكلي طماطه تسلك لوبيه يوميه شكل والماعجبه تروب خاثره وخبز الحمد لله على النعمه وره الغده اغسل واتعطر والبس هدوم حلوه واسير يم صويحباتي ادكلهن وشم بوجههن يشوفني مدكدكه ويردن مثلي الى شنو مايطلعن بحسني اي غير ارجع العصر اكعد اخيط واكوم وراها اسوي عشه وارجع افتح تلفوني هوه مابي رقم بس اخوي سوالي فيس وكلشي خله تبوب هذا مال فيديو تعلمت هوايه منه كله فصال وخياط وكل الناس حلوين هاي حياتي والروتين اليومي الي اسمعو قصتي
