مثل كل يوم ارعى بالحلال وردت شردت الصخله دشت بحديقة البيت الغديم عاينت ماكو احد والبوب مقفله عاينت من الشباج بعدهم مخالين بردات اي مسوي مال اجانب تماثيل ومزهريات وكلوبات وفراش يهبل جنه من جنت صغيره اندل مجان ادش منه للبيت جنهم مايندلو يطلع كبل للسرداب دشيت على كيفي جنهم ما يندلو بعده على حطته ادش من جوه الدرج الوراني واطلع من يم المغسله بالممر بس جنهم مشافو المهم دشيت يمه من الريحه ذكرتني باهل بغداد وصلت للمطبخ كالبي كلاب كله جديد كاونترات مرمر ومواعين الى شنو كله كزيز مو مثل مواعينه الفافون اضرب بيه زيد تطبع براسه والكي بابتين وحده بيه حفره وخالين بيه كلاص مي وحنفيه المي ثلج مو مثل الحب مالتنه كله بك غركان اييه انه حسبالي باب غرفه وافتحه شني مثل ماكال ربنه بكتابه غطوفها دانيه كلشي الدجاج مشوي والفواكه كله حتى جبنهم بكلاصات والعصاير والببسي اي الله جابك يالببسي اشوفه بس بالتلفون مره جابو اهل خطيبة اخويه حصلت نص غوطيه واجر الدجاجه والببسي واجعد كبال الثلاجه ودك اكل هيه لو طيبه واني محسيت بروحي الى خلصته لو صغيره وخلصت بساع شربت غوطيتين وبقت وحده اخذته بالطريج اتونس بيه كمت غسلت الماعون واخذت العضام للجلب ورجعت لاحد يشوفني رديت كالو تعالي تغدي ماردت شبعانه
ام نعمان سالكه لوبيه وطماطه وين اللوبيه والدجاج بس والله حلو شعجب عدلو البيت وعافو اي حقهم اذا احنه بالمنكطعه حتى خط عبريه ماكو شيسوون هنا
٠
٠
تكلبت بالفراش مجاني نوم كلت اكوم اخيط كملت بالي كله يم البيت العتيك ياعتيك صار جنه بس اني ركضت وره كرشي لا يغمه غير تتفرجين على كل البيت اي باجر اروح طلعت يم صويحباتي واني راجعه شافني خضر الاغم ابن المختار هوه صح لابس برطرون بلاكت المعزه المصخم طالع جنه ديج مهلوس وروح جدي النوب ينعسلي
عينه صخام بويهه يصير مدري شنو فد شي طافر من السره
خضر هله بكيمر ولايتنه لج حني مو ليلي مانامه
سويده من جيفتك مخلص بطالة الزيت على راسك اتهده بالرحمان وتنضم هسه تنطمر بلا كعده انشالله
خضر وداعت ابوي احبج يبعد طوايفي
سويده بعدك البين انشالله كلي ماسامع بشي اسمه كرامه عزه ولو مين تجيبه من الصخول العرجه مالتكم
خضر شويه احترمي ولج احبنج
سويده حبتك حيه وعكربه سميه ونحله طنانيه وخر منا مجاز مني الى هفيته بحجاره وكربه ولحكته بالجريده الاغبر انهزم رديت معصبه تلكتني ياسه حسبالي تتلكاني بشربة مي النوب كالتلي شكو وراج مهدوده بالسلف والكراب علي اشو دتعاي واملخ راسه وادكه
نعمان شبيج تخبلتي شكو لاعاد نعمان مارفع عيني بعينه هذا العزيز كتله اسمع واحكم ويه الصلا اخبز والم البيض واحلب واحضر الريوك وانضف واطلع ارعى وارد اخيط وارد اسوي عشا وانام وهالساعه امر لصويحباتي اتكلي مهدوده بالسلف وجابته بكفخه لو تلزم لسانه اني مادكه
نعمان يكتم ضحكته اسمعي ياسه لاتجيبين طاريه بعد اعتبريه تزوجت
سويده يباب السمه كونج مفتوحه وسمعتي اي يياسه اعتبريني متزوجه ومعليج مني وهي بوسه مني لاتخليني اكفشج بعد عفتهم وطبيت الغرفتي
ثاني يوم رحت للرعي