صباح الخير وشراكم سافا لاباس حمد لله( حبيت نبداها دخلة هندي) المهم انا ميار عندي 22 سنة نقرا فلافاك ارشيتاكتير، نسكن في قسنطينة مع ماما مونى و بابا مراد و خاوتي انيس كتر مني بعامين عالعام هامل يا يقرا يا مع صحابو يدور نتلقاه غير وقت الماكلة و الرقاد و تقدرو تقولو حنا الد الاعداء و خويا خلاف اسمو محمد سراج الدين (سراج باختصار) قل مني بربع سنين ، يعني لعام هادا يعڨب لباك نشاله ، وهو يعني قاري يدي 13\14 كي مايقراش،و اخيرا ختي الصغيرة اكرام عندها 14 سنة ، عايشة في عالم وحدها اسمو لقراية منحبش نقعد معاها بزاف باسك نغلط نكون حنقولها كولي نقولها كول تجبدلي قواعد اللغة العربية كاملة ، المهم انا في طولي عادية مش قصيرة بزاف و مش طويلة ، مام لاطاي ماني سمينة ماني ضعيفة عادية هكا لاطاي تاعي
شعري طويل لفخادي و كحل لاكولار تاعو عينيا ماغون(بني) خشمي صغير و فمي متوسط و عندي فوسات في خدي ليمين و خمرية مش بيضا و مش سمرا ، يعني باختصار فالزي عادية مش باشعة و مش ملكة جمال ، ونعطيكم معلومة كي نروح لبحر و نبرونزي و يحمارو خدودي و يتبوكلا شعري من الما تما نعود صح ملكة جمال
المهم نضت على صوت نبع الحنان طفي فلكليماتيزور (المكيف) وتحل فالتاقة ، نورمالمون هكا تفهمو بلي رانا فالصيف و فاكونس ماكنش قراية ، انيس راهو في تونس رحلة مع صحابو و سراج عقب لباك خلص و راح معاه و اكرام راهي بايتة في دار خالي مع بناتو اسمهم لينة و غفران قدها فالعمر و بابا يخدم ، نسيت مقتلكمش بابا موثقnotair يسما درك ماما مالقات حتى واحد يقضيلها غير انا ، نضت على سعدي على العشرة و انا لبارح ساهرة نكونيكتي صليت لفجر به رقدت و درك تنوض فيا على العشرة ، المهم ماما بعتتني نشريلها كرواسون ملكوشة ، طلقت شعري حبيبي وهو مبوكلي naturelement بصح يبان بلبابيليز تالمون معدول( حوحو يشكر روحو عمبالي عمبالي) المهم و لبست هكا و خرجت بعد ما طبقت درعين تع لاشوميز
، و انا نسيت مقتلكومش بلي كان واحد جارنا يسكن في فيلا قدام لكوشة اسمو زين الدين بقلاوة وش نقولكم الشعر لكحل لغاثي و لعينين لكوحل و السمورية و لي ابدو (ركزولي على ليزابدو) و يخدم في شركة تع ارشيتاكتير(archetecture) و متفاهمة معاه بلي كي نخلص قراية ندير كونكوغ معاه ولا نجحت فيه نخدم معاه عايشة مع ماماه امينة و باباه مهدي و عندو ختو صاحبتي مش لانتيم بصح صحابات اسمها انفال ، المهم خرجت من الدار وبقاو واحد الزوج يتبعو فيا واحد سمين و واحد ضعيف سمطتهم سمطتهم مبعد قلقوني ، حبست عالنية قدام دار زين و دورتليهم حتى يداو يهدرو
الضعيف: يا عمري تجي ولا ونجي ولا نقطع حوايجي
شفت معاه و حطيت يدي على ذقني ولاعبتها نخمم مبعد قتلو: خلي نجي انا خير
وقدمت و ضربتو في واحد لبلاصة مسكين طاح في الارض من الوجع شفت مع لوخر(السمين) حتى قالي
السمين: الزين مخطوب ولا يسنى فلمكتوب
و بدون مقدمات قدمت به نضربو هو غطى بيديه لبلاصة لي حاسبني حنضربهالو حتى تفاجأ بكوتبيي فكرشو و من هول الفاجعة سبني بوحد الكلمة و دار لصاحبو و مشى معاه انا رديتلو هاديك الكلمة بعشرة زيها و دورت به نكمل نمشي نلقى في زين الدين( نعيطلو انا زينو) قاعدة فوق الدروج تع الدخلة تع دارهم وفاسخ بالضحك انا فهمت بلي حضر اللقطة ملول وجهي حمار خضار صفار وخرجو فيه الوان الطيف كامل بصح لعبتي روحي نورمال و ضحكتلو و قتلو بكل انوثة
ميار: زينو صباح الخير من وكتاه ونتا هنا؟
زينوو هو يضحك: من تجي ولا نجي و نقطع حوايجي
حبيت انا نقلبها عليه و قتلو بحدة زعما: ونتا به تجي تحامي عليا قاعد تضحك
زينو: خفت ندخل ناكل طريحة انا تاني و نتي الله يبارك قدرتي عليهم وحدك معندك ماديري بيا انا
رديت عليه كلي جعفر مش ميار وقتلو: ايا روح برك دخصت و عدت تحكي معايا راح عليا الحال باي باي
وروحت خليتو حتى سمعت الضحكة تاعو دورت و قتلو : تضحك بيهم رايبين نشاله وروحت كملت للكوشة شريت الكرواصون ورجعت للدار ، دخلت عند ماما وقتلها
ميار: ماشي ولادك هاملين يفاكونصيو كل واحد في بلاصة وانا مطايشة وحدي فدار وزيد تنوضي تصلي الفجر وطفيلي لمودام و متخلينيش حتى نقول ليزامي تاعي باي و فوق هاد شي كل تنوضيني نقضيلك صباح ربي راني رايحة نرقد و متنوضينيش على وجه ربي
ماما مونى: ابقاي نتي شركي في فمك هكا حتى نعطيك كف نريبلك سنيك
رحت وبدون جدال دخلت لبيتي نلقى في انفال خت زينو تعيط ، ياخاه وش تحتاج هادي
رديت انا بكل انوثة وقلت: الو
رد عليا زينو: الو ميار يخي مش غالط
رديت انا كي لغول : هيه ميار غير الخير
زينو: اواه يضهرلي غالط انا كنت حنعيط لميار مش لجعفر و كوبا في وجهي
جيت نعاودلو خرجتلي هاديك لبهلولة" ان رصيدكم غير كافي لاجراء هذه المكالمة" سبيتها حتى كرهت وروحت فقلت التاقة وشعلت لكليماتيزور وطحت فوق لمخدة كاو ماني سامعة بحتى واحد
_____________________
هاد اول بارتي ليا واش رايكم فيه لبنات نشاله يكون عجبكم
