كانت تشطح حتى حست بيد جبدتها ، دارت تلقاه جواد خو سيلينا(شفيتو عليه؟؟) ، بعدت يديه عليها بالخف وقاتلو
ميار: جواد؟؟! وش اك دير بعد عليا
تبسم وحكملها خدودها يلعب بيهم وقالها
جواد:يا عمري على حبيبتي كي تقلق
زادت بهدت يديه عليها بالقوة وقاتلو
ميار: جواد نتا هبلت كفاه تلوح في يدك ليا ، لاكان معمبالكش اني مزوجة و لكان نسيت انا نفكرك
ضحك باستهزاء و دار بيدو اشر لزينو لي راه يشطح ويضحك فرحان
جواد: ايه هاهوك راجلك لهيك يشطح ، الضحكة ضرصة العقل تبان ، ليوم يزوج بختو ماهوش سامع بيك ونتي قاتلة روحك على جالو
سكتت ميار مالقات ماتقول ، كلشي يقول فيه صحيح ، حتى كمل هو
جواد: ميار ياك تعرفيني نحبك قبل ما يحبك هو، حتى انا خطبتك قبلو هو بصح نتي خترتيه هو قلتيلي انا بوبنات ، و زوجتيه و خليتيه ، وهاني علاجالك ، رحت للخارج طورت خدمتي كتر ،بعدت على البناويت و انا نخمم فيك غير نتي ، وانا كل ليلة نتخيل فيك بين يديه هو و فوق سريرو هو ، ميار بليز حسي بيا و اعطيني فرصة بليز
شافت معاه و مشاعر بزاف في داخلها ، انكسار حب تأنيب ضمير شوك كلش مخلط في بعضاه ، مهدرت حتى كلمة بعدها و رجعت طول لبلاصتها وين كانت قاعدة ، حتى بدات الموسيقى الرومنسية وراحو لي كوبل يشطحو مع بعضاهم ولعروسة ولعريس فالنص ، جا جواد به يشطح معاها حكمت في يدو، وهو دور يد على خصرها و لخرا حطها على كتفها العريان ، وهي دورت بيديها في زوج على رقبتو وراحت تشطح ريحتو قتلتها من كل لجوايه ،ريحة فخمة و ثقيلة ، عكس لقديمة لي شمتها قبل عامين نهار شطحت معاه كانت ريحة خفيفة بين كل مدة واخرى تتبدل ، يديه كانو في بلاصة وحدة ،ماشي كيما هاديك لمرة كل مايلقى فرصة يولي يهبط في يديه باه يتوشيها ، حست صح بلي جواد لي راه قدامها ، لي عينيه العسلي راهم ديغاكتومون يشوفو مع عينيها ، تبدل و ولا راجل صح واعي وعمبالو وش قاعد يدير .
خلصت لغناية وهز زينو سيلينا بين يديه لي كانت الفرحة قاتلتها و الدنيا مايش سايعتها من الفرحة كون لقات طير اي طارت ، شوي و عيطلها انيس باه تهبط ، راحت معاه ، ونسيت مقلتلكمش بلي هو يسكن وحدو ،بصح سراج وريهام ام يسكنو معاهم في دار باباها ، المهم لبست العباية لي جات بيها و هبطتلو راحت عند باباها ، دخلت لقات يماها لمتلها حوايجها كامل في كابة ، ميار ماكانت فاهمة والو ، لقات امها قاعدة فوق سريرها ،قعدت حداها وقاتلها
ميار: ماما واش راه صاري علاه راكي لامتلي قشي
مونى: ابنتي نتي لي قررتي تواجهيه ، معناها مالازمش تخليه يربح ، غدوا الصباح روحي لدار عجوزتك اني هدرت معاها قبيل وقاتلي بلي اكي مازالتي مرتو معناها دارو محلولة ليك في كل وقت ، هو راح فوياج دو نوص سمانة ، والسمانة الجاية يجي ، لازمك تتعايشي معاه و مع مرتو، و تكوني مرا وتقدري ترديه ليك
معرفتش كفاه حتى نضت نبكي و ماما حضنتني و ولات تمسحلي على ظهري وتقرالي فالقرآن حتى رقدت ، نضت الصباح عينيا حومر ومنفوخين ، وجهي صفر وضعفت ڨراااف ، اااا مستحيل ، امبوسيبل ، امبوموحال نروح لدار عجوزتي هكا ، قلت لماما نخلي للسمانة الجاية باه نروح مقبلتش بصح بسيف به اقنعتها بشرط اني نروح قبل ما يجي زينو
رحت لبيتي ، وبسم الله بديت ، كليت باطة كاملة تع هاداك المسمن الامريكي على امل انو نزيد شوي فهاد السمانة و طبعا هاد الشي مستحيل😂😂
درت لي ماسك لوجهي و لشعري لي فزد بهاديك السبغة الوردي لي درتها ، ولي جبتها طوال هادوك الخمس ايام نخدم به نحيها، وبسيف به تنحات و رجعلي لون شعري الاسود العادي الطبيعيولي دارتلي في جالتو ماما القرصة ، المهم درت épilation (ازالة الشعر) ، عدت نشعل شعيل ، مع جسمي بيض عدت شمعة ، لقطت حواجبي عدلت لافوغم تعهم ،شربت دي فيتامين ، خرجت شريت قش جديد ، عدت بكلي جديدة ، وجا اليوم الموعود لي نروح لدار عجوزتي لي راه حدانا بعد اذا مازلتو تشفاو ، ورا الزواج انا وزينو بقينا عايشين معاها وهاي هي درك ولات سبابنا ، المهم ،رحت فتحتلي الباب ، سلمنا على بعضانا ببرود، رحت لبيتي انا وزينو ، فرزت قشي لبست بيجامتي ، مبعد هبطت عندها للكوزينة عاونتها ، و عداو اليومين وحنا مانحتكوش ببعضانا خلااص ، نحكي غير مع عمي المهدي اب زينو غير هو لي حنين معايا و يعاملني كي بنتو ،المهم جا اليوم الموعود لي يجي فيه زينو و مرتو ، سجيت روحي و لبستلو هكا👇
درت مكياج سامبل ،وطلقت شعري القصير لي كل ماكان يطوال نقصو ، وقعدت فوق السرير نسناه
سمعتو دخل وسلم على يماه و سمعت صوت هاديك العقربة تحكي و تتمقعر اععع ، حتى سمعت زينو يقول انا طالع نفرزلك قشك ونجي وات ذاااا فااااك ، يفرزلها قشها !!! شا راه صاري و مفهمتش كفاه حتى يماه قاتلو ايه براحتك ، بديت نسمع فصوت خطواتو يقرب و انا قاعدة فوق السرير نسنا فيه حتى دخل و مع شافني بعد ، عقد حواجبو وحمار وجهو مالقلقة وناض يعيط
زينو: وشراكي ديري هنا نتي
ميار: راني في دار راجلي je pense
زينو: مانيش راجلك سمعتي
ميار: نن راك راجلي بسيف عليك
غمض عينيه بغش وقالي
زينو: بصح انا ماحابكش تكوني مرتي ، مالا رح نطلقك انتي طالق ، طالق ،طال
و قبل مايكمل المرة الثالثة حطيت يدي على فمو خاطر كون يطلقني بالثلاث ، منقدرش نرجعلو حتى نزوج مرة اخرى براجل اخر بصح للاسف هو نحالي يدي ، وضغط على يديا للزوج بين يديه وقالي
زينو: نتي طالق ،طالق ، طالق ، ودرك طلقتك بالثلاث ومابقيتيش على ذمتي قودي من داري و منسحقش نشوف وجهك قدامي ولا في داري خلاص فهمتي !
مالقيت منقول ، حسيت روحي مكسورة وذليلة ،حسيت حاجة تحطمت لداخل في قلبي، حاجة توجع بزاف ، لميت حوايجي ، وانا نحاول قدر الامكان منبكيش ، بصح مقدرتش ، راهو غدرني وخانني ، حوايج بزاااف حسيتهم و الكلمة الوحيدة لي تعبر عليهم انو كسرني و خلاني نخلف وعدي لبابا كي قتلو واحد ما حيكسرني ، خرجت من البيت ولقيت عجوزتي السابقة ، و سيلينا يصنتو من الباب و يضحكو عليا، رحت ديغيكسيون دارنا و انا دموعي ويدان لي نعدي عليه يحير فيا
****************************************************************
stooop
هادا البارت تع اليوم
وش رايكم في
زينو
جواد
طلاقها
صو لاكان حابين تسبو زينو لكم الحق وكامل الحق وانا نعاونكم
نشكركم بزااااف على الدعم تعكم للبارتي لي فات متوقعتش هاد الدعم لكبير صو mrc bzzz
love u all💘💖
