🌸 تمرد وكبرياء 🌸
يوصل ادهم النادي وينزل هو واروي وتستأذن منه اروي وتروح عند صحابها ويروح ادهم يقعد في الكافيتريا
سچي: ما لسه بدري يا هانم
اروي: سوري ياقلبي علي التأخير بس حصلت معانا مشكله واحنا جايين في الطريق
أيه: حصل ايه
اروي: وتحكيلهم اللي حصل
ريتاچ: ههههههههه يعني علمت علي اخوكي
اروي: بيني وبينك شكلها كده دا طول الطريق مش طايق نفسه
سچي: بجد انا نفسي اشوف اخوكي اللي اسمه ادهم دا
اروي: بلاش ياحبيبتي
ريتاچ: سچي فاضل نص ساعه وتبدأ المباراة بتاعتك
سچي: طيب اقوم انا بقي علشان الحق اجهز
أيه: اوعي تكسفينا
سچي: عيب عليكي وتروح سچي الاوضه المخصصه لتجهيزها
ريتاچ: صح اللي انا سمعته دا سچي ضربة اخوكي ياسين انهارده في الجامعه
أيه: يانهار اسود بجد
اروي: اسكتي دا خد بوكس في وشه انما ايه
ريتاچ: هههههههههه يخربيتك يا سچي
اروي: طيب يلا بينا علشان نلحق مكان
البنات: يلا بينا
ـــــــــــــــــــــــــــــــــــــــــــــــــــــــــــــــــــــــــــــــــــــ
عند اسيا واقفه جنب العربيه مستنيه كريم وبعد شويه يوصل كريم
اسيا بعصبيه: تصدق انك واحد بارد
كريم: ايه يابنتي فيه ايه
اسيا: انا مش قولت بسرعه اتأخرت ليه
كريم: يابنتي هو انا راكب طياره وبعدين مالها عربيتك
اسيا: معرفش كنت سايقه وعطلت مره واحده
كريم: طيب تعالي اوصلك الاول وبعدين اتصل بحد يصلحها ويجيبها علي الڤيلا وتركب اسيا مع كريم ويوصلها الڤيلا
كريم: انا رايح احضر المباراة بتاعت سچي ماتيجي معايا
اسيا: لا مش فاضيه عندي شغل
كريم: براحتك يا اسيا بس سچي هتزعل منك
اسيا: قولتلك يا كريم عندي شغل
كريم: طيب انا ماشي ويمشي كريم وتطلع اسيا علي اوضتها وتفتكر اللي حصل وتتعصب وتنزل تقعد مع والدتها
الام: مالك يا اسيا
اسيا: ولا حاجه اومال بابا فين
الام: راح المديرية بيقول فيه اجتماع مهم
اسيا: ازاي وانا معرفش
الام: والله يابنتي ماعرف
اسيا: طيب انا هروح الاجتماع دا وتفتكر اسيا ان عربيتها عطلانه وتقعد بخنقه وتتنهد
الام: فيه ايه
اسيا: عربيتي عطلت علي الطريق وانا جايه
الام: عربيه سچي موجوده
اسيا: اومال سچي راحت النادي ازاي
الام: صحابها عدوا عليها وراحت معاهم
اسيا: طيب انا ماشيه وتروح اسيا تركب عربيه سچي وتمشي وبعد وقت توصل المديرية وتدخل اوضه الاجتماعات
اسيا: ممكن اعرف ازاي فيه اجتماع وانا معرفش
والدها: اسيا ايه اللي جابك دلوقتي
اسيا: مش مهم ايه اللي جابني يا سياده اللواء ممكن بقي اعرف ازاي فيه اجتماع وازاي محدش يقولي
اللواء: علشان الاجتماع ميخصكيش في حاجه انتي مهمتك خلصت ودلوقتي اللي هيستلم المهمه دي حد تاني
اسيا: ودا مين بقي ان شاء الله
اللواء: ملكيش دعوه يا اسيا واتفضلي علي مكتبك
اسيا بغضب: طيب يا سياده اللواء وتمشي اسيا علي مكتبها
ـــــــــــــــــــــــــــــــــــــــــــــــــــــــــــــــــــــــــــــــــــــ
في النادي يوصل كريم وينزل من عربيته ويدخل النادي وهو داخل يخبط في بنت
البنت: اااه مش تحاسب
كريم: انا اسف والله مخدتش بالي
البنت: حصل خير عن اذنك
كريم: ويسرح في عنيها اتفضلي ويتابعها بعنيه لحد ماتمشي ويمشي هو كمان يروح مكان المباراة وبعد شويه تبدأ سچي والبنت اللي بتنافسها يلعبوا وبعد وقت تخلص المباراة وتنتهي بفوز سچي ويهيصوا صحابها وتقوم سچي وتروح عند البنت التانيه وتساعدها تقوم ويسلموا علي بعض وتاخد سچي الكأس وتجري علي كريم وتحضنه
كريم: براڤو عليكي ياقلبي كنتي هايله
سچي: طالعه ليك ياكبير
كريم: طيب يلا روحي غيري هدومك علشان نروح
سچي: فين اسيا
كريم: عندها شغل ياحبيبتي
سچي بزعل: عندها شغل ولا مش عايزه تيجي
كريم: معلش ياقلبي انتي عارفه اسيا
سچي: طيب هروح اغير هدومي وهاجي وتروح سچي تغير هدومها ويروحوا معاها البنات
اروي: مبروك ياقلبي
سچي: الله يبارك فيكي ياحب
ريتاچ: بس ايه القوه دي يخربيتك
سچي: الله يخربيتك دا بدل ماتقوليلي مبروك
أيه: هههههههه بس كنتي هايله والله مبروك ياقلبي
سچي: الله يبارك فيكي
اروي: طيب يابنات انا همشي انا علشان ابيه ادهم مستنيني في الكافيتريا
سچي: ماشي ياقلبي
أيه: وانا كمان همشي يلا يا ريتاچ علشان اوصلك
ريتاچ: طيب يلا نتقابل بكره في الجامعه
ويمشوا البنات وتروح اروي عند ادهم وتروح سچي لكريم وتركب معاه وتمشي
ـــــــــــــــــــــــــــــــــــــــــــــــــــــــــــــــــــــــــــــــــــــ
ڤيلا سليم عمران
الجد: يعني ايه الصفقه اتلغت
سالم: ادهم من فتره شاكك في عمرو انه بيعمل صفقات وهميه بمبالغ كبيره واتأكد انهارده لما شاف ملفات تانيه في مكتبه وحد من الشركه عندي بعتها وفيها شرط جزائي 5 مليون جنيه وكمان عمرو اتوتر اول ما شاف الملفات مع ادهم
سليم: يابني مانا قولتلك بلاش عاصم وابنه وانت صممت علي الشراكه معاه
سالم: اللي حصل بقي يا بابا
اروي: جدووو
الجد: تعالي ياحبيبة جدو كنتي فين
اروي: كنت بحضر مباراة صاحبتي
الجد: طيب اومال مين وصلك
اروي: ابيه ادهم
سالم: اومال ياسين فين
اروي: معرفش احنا اتخانقنا وابيه ادهم وصلني النادي واستناني وجابني
الجد: متخانقه انتي وياسين ليه
اروي: ياجدو هو اللي اتخانق معايا علشان قولت عايزه عربيه
سالم: وليه يابنتي مش هو بيوصلك
اروي: يا بابا انا مش عايزه ياسين يجيلي الجامعه تاني
ويجي ادهم: اروي الموضوع انتهي خلاص اتفضلي اطلعي علي اوضتك وانا بعد كده اللي هوصلك
اروي: حاضر يا ابيه عن اذنكم
سالم: مالك يا ادهم
ادهم ابدا ولا حاجه عن اذنكم ويطلع ادهم اوضة ياسين ويلاقيه قاعد علي اللاب وبيتكلم ڤيديو مع بنت
ادهم بغضب: ياسييين
ياسين: يتخض ويقفل اللاب ا.اادهم خير فيه حاجه
ادهم: ويضربه بالقلم علي وشه اوعي تكون فاكر اني مش عارف تصرفاتك الزباله دي بس كنت بقول بكره يعقل انما شكلك كده مش هتتعدل
ياسين بتوتر: ا.ادهم انا انا كنت بس
ادهم: مش عايز اسمع حاجه انا شوفت كل حاجه ومن بكره تنزل الشركه وايااك يا ياسين تتأخر عن ميعادك صدقني هنسي انك اخويا ويسيبه ويمشي
ياسين: يووووه ماشي يا أروي حسابك معايا ويروح ياسين علي اوضه اروي وهو متعصب
اروي بخضه: ايه دا ياسين انت ازاي تدخل الاوضه كده
تالين: ياسين مالك فيه ايه
ياسين بغضب: ارتاحتي كده لما اشتكيتي لادهم
اروي: انت مش ملاحظ ان انت اللي غلطان لا وكمان داخل اوضتي بهجميه وبتزعقلي
تالين: حصل ايه يا جماعه مالكم
اروي: الاستاذ جالي الجامعه علشان يوصلني معاه وضايق صاحبتي بس هي ياحرام علمت عليه لا وكمان زعلان علشان قولت لابيه ادهم مش عايزه ياسين يجيلي الجامعه تاني
تالين: بكسره قلب بتحاول تداريها انت غلطان يا ياسين شكلها ايه اختك قدام صحابها وانت بتعمل كده
ياسين بجمود: وانتي مالك انتي اصلا اعمل ايه ومعملش ايه
تالين بدموع: انا اسفه عن اذنكم
اروي بغضب: انت ايه يأخي الجبروت اللي فيك دا ذنبها ايه تالين علشان تكلمها كده
ياسين: يبصلها بعصبيه ويمشي وتروح أروي غرفه تالين وتدخل
اروي: تالين حبيبتي حقك عليا متزعليش
تالين: تجري عليها وتترمي في حضنها ليه دايما بيعاملني كده نفسي يحس بيا نفسي يعرف بحبه قد ايه
اروي: والله ياحبيبتي بكره يحس ويجري وراكي كمان
تالين: شكلها مش هتحصل يا اروي وشكلي مكتوبلي العذاب في حبه وهيبقي دايما حب من طرف واحد
اروي: لا ياقلبي متقوليش كده
تالين: خلاص سيبك مني واحكيلي علي مباراة صاحبتك كانت عامله ازاي
اروي: طيب وكمان هعرفك عليها قريب
ـــــــــــــــــــــــــــــــــــــــــــــــــــــــــــــــــــــــــــــــــــــ
في مكان تاني يبدو عليه مثل الصحراء
شخص1: عايزك تخلص عليه بس مش عايز دم عايزها حادثه عاديه علشان محدش يشك في حاجه
شخص2: امرك يا باشا هيحصل ومن غير دم
شخص1: عارف لو حصل منك اي غلطه هتدفع عمرك تمنها
شخص2: متقلقش يا باشا وقريب اوي هتسمع خبر حلو
شخص1: بضحكه شر عارف لو حصل هتاخد المبلغ اللي انت عايزه يلا امشي ووريني شطارتك وبعد مايمشي يضحك الشخص الاول ضحكه شر خليني اشوف بقي انا ولا انت يا ادهم عمران هتدفع التمن غالي وهكسر ضهرك وخلينا نشوف هتعمل ايه
ــــــــــــــــــــــــــــــــــــــــــــــــــــــــــــــــــــــــــــــــــــ
بقلمي: دنيا إمام
توقعاتكم ياحلوين
مين الشخص المجهول؟؟
وياتري هينتقم من ادهم ازاي؟
ويا تري مين الضحيه اللي بيتكلم عنها؟ ؟
