صدمة وراء صدمة 💔

البارت العاشر

خش الاب للجنان لقى أحمد مقعمز وساكت وعيونه ذابلات ووجه شاحب
الاب : أحمد ولدي
أحمد مشى له يجري وحضنه : بوي قولي كذب انت جيت ومعاك امي صح وينهاا في السيارة ولا خشت جواا قول يا بوي وين هم يكذبوا صح
الاب مسح ع راسه : يا وليدي ربي يصبرنا اي أمك جت معاي بس جت في كفن( يبكي) جت في كفن وتوا داخل عشان شوي أخرى ندفنوهاا
أحمد قعد يعيط : لاااا لااا لا لااا يا بوي ما تكذبش عليااا كيفهممم لا يا بوي
الاب : قضاء ربي يا وليدي
قعمز ع الارض ويبكي : انا مش ح نصدقكم لين نشوفهاا
الاب : توا تشوفهاا
الشباب جابوا الكفن للمربوعة عشان تشوفهاا حتى منى بيش تفيق من الصدمة يلي هي فيهاا
خشت منى للمربوعة وماسكتهاا حنهاا
الاب بعبرة : منى بنتي تعالي
منى شافته وبعدين شافت الكفن وساكته
خش محمد وعمر جايبين معاهم أحمد
أحمد شاف للكفن ومشى يجري فتحه وخلاص انصدم لما شاف امه وجههاا ابييض قعد يبكي ويبوس فيهاا : أمي ليييش لييش يا أمي ليش استسلمتي للمرض يا أمي ليش رحتي وسيبتيناا لييييششش لييييشش كسرتيلي ظهري يا أمي
مسكه محمد وحضنه وقعد يهدي فيه
اما الجدة شافت بنتهاا وطلعت معش قدرت تتحمل
عمر مسك ايد منى : هي تعالي
منى صبت جنب الكفن وشافت امهاا طاحت ع الارض لمست وجهها وبيدهااا ترعش لقاته مصقع معش تحملت قعدت ترعش مع بعضهااا وأغمى عليهاا
الاب مسكهاا ويبخط ع وجهها ويرعش : منى بنيتي نوضي
عمر : هاتهاا يا عمي تو ندخلهاا داخل ونحاولوا نوعوهااا
عمر قامهاا في حضنه وكلم منار فضت الطريق خش بيهاا لغرفة جدهاا
عمر : جيبي ميه يا منار
ملاك : شن صار
عمر يشمم لمنى في العطر : لما شافت امهاا ما تحملتش اغمى عليهاا
جت منار وجابت ميه وقعد يبخ ع منى ليين ناضت
منى شافت لي عمر وتذكرت شكل امها بدت تعيط وتبكي حضنهاا عمر وقعدت تبكي وتخبط فيه وتعيط بأعلى صوتهاا
بعد مرور مدة قصيرة
هدت شوي لكن مازالت تبكي
طلع عمر براا عشان الدفن
محمد : شن صار في منى
عمر : ناضت وقعدت تعيط وهدت شوي
محمد تنهد
عمر : وين أحمد
محمد : أحمد عيط لييين تعب وهدى شوي
__________
1:00ص
ناس رقدت الجدة رقدت من التعب وحزنهاا ع بنتهاا وأحمد من لما شاف امه عيط للييين أهل نرقد ناض في العشبة وتوا رقم أخرى ما يلبس يشوف حد ولا يتكلم مع حد اما محمد يلي ما غفت عينه بككل يجي للسرير يضعف ويقعد يبكي لأن ما يقدرش يبكي قدام أخته وخوه وبوه بيش ما يزيد عليهم اما الاب من الهم والتفكير في مستقبل والده ما غفت عينه
منى ...منى يلي بكت وعيط وقريب انهبلت بكككت لييين راااح صوتهاا رقدت ع المغرب في دار جدهاا من كثر ما بكت
ناضت في الليل بتشرب ميه ولعت ضي وشربت ميه وطلعت وقابلها عمر خاش من عند باب المطبخ
عمر : منى ؟
منى : اي
كانت عيونها ذابلات من البكاء وجهها اصفر وشاحب
عمر : كويسة توا
منى تنهد وبعيون دامعات : شن تشوف في حالي بالله عليكك
عمر مسكهاا من ايدها وطلعها معاه للجنان
عمر : احكي فضفضي ابكي معاي
منى معش قدرت تتحمل وانهارت بالبكاء : رااحت يا عمر رااحت ماما راحت وسيبتني ليش تمشي وتسيب فيا انا محتاجتها واااجد
عمر حضنها ومسح ع شعرها : الله يرحمها ربي يصبرك والله خالتي حنان كانت غالية علينا كلنا بس الله غالب هذي سنه الحياة وكلنا ليها ادعيلها هي محتاجة منا الدعاء بس توا لازم تصبري مستحيل البكاء يردها لنا صح تصيرلك غصة في قلبك بس الله غالب لازم ندعولها صلي واقري قرآن واصبري
منى تشهق : ح حاضر حندعيلها بس مش قادرة نوقف بكاء
عمر : لازم تصبري وقولي الحمدلله ع كل حال هذا قدر من ربي
منى : الحمدلله
سكتوا فترة وهي في حضنه ومقعمزين شافلها لقاها راقدة رفعها لدار جده وطلع
____________
ثاني يوم 9:30ص
ملاك : يا مناار
منار : ها
ملاك : عصا ع ظهرك
منار : شن تبي يارا
ملاك : منى مازالت ما ناضت ..؟
منار : لا خشيت عليها من بدري لقيتها راقدة قلت خليها راقدة تعبت من البكاء
ملاك : ربي يصبرها
___________
احمد ناض قعمز ع سرير وقعد يفكر في أمه وكيف كان يبصر عليها
طقطق الباب
احمد : خش
محمد : صباح الخير
احمد : صباح النور
محمد : شن جوك اليوم
احمد تنهد : الحمدلله
محمد : الحمدلله ع كل حال ربي يعطينا الصبر يا خوي صح واعرة بس لا اعتراض على حكم الله
احمد : ونعم بالله
محمد : ولازم تصبر روحك اختك محتاجتنا اكثر من اي وقت اخرى ولازم نكونوا قدامها متحملين عشان تصبر حتى هي ولازم نكونوا سند لها صبي سلم وخيي صلي وادعيلها مش ح ينفع شي الا الدعاء
احمد : باه بنخش ندوش
محمد : خوذ راحتك وبعدها نمشوا نطمنوا ع منى
احمد : باه
___________
طلعوا محمد واحمد وخشوا لجنان عيت جدهم
محمد : يا ملاك
ملاك : نعم
محمد : وين منى
ملاك : في دار جدي راقدة
محمد : باهي فضي الطريق بنخشولها
ملاك : تمام
خش احمد ومحمد ع منى لقوها راقدة محمد قعمز جنبها ع السرير واحمد قعمز ع الجانب الاخر من السرير وحط يده ع شعرها
منى حست بحركة ناضت
محمد : صباح الخير
منى : صباح النور
احمد : شن جوك اليوم
منى تنهدت : كويسة
احمد : هي سلم خيتي شدي حيلك صح فراقها واعر وعارفك قديش متعلقة بأمي لكن هذي سنه الحياة
محمد : ايوه خليك قوية وقولي الحمدلله وردي منى يلي نعرفوها من قبل
منى : الحمدلله
محمد : حضنها سلم خيتي أصبري هذا فدر من الله ولازم نرضوا بيه
منى دموعها نزلوا : ونعم بالله
حضنهم احمد ومنى قعدت تبكي وهم يصبروا فيها
محمد : هي صبي دوشي وصلي وادعي واقري قرآن بيش ربي يصبرك وكوني قويه
احمد : ايوه ادعيلها بالرحمة
منى : الله يرحمها
محمد : هي بنطلعوا نحن توا ومش نتصل بيهم يقولولي ما كلت شي باهيي...؟
منى : به
طلع محمد واحمد ومنى قعدت تفكر شوي وبعدين مشت دوشت وتوضت وصلت وقعدت تدعي ان ربي يصبرها
______________
بعد مرور شهر
منى بدت تتعود على فراق امها وهدت شوي وقاعدة عند حنها
احمد رضى بالقدر وقاعد يصبر في روحه ويحاول انه ما يضعفش
محمد عايش ومش عايش يفكر في خوته وباته يلي متدمر
الاب قاعد يصبر في روحه ويكون قوي عشان يعوض عياله ولو شوي ع الحنان يلي فقدوه
عمر حس بشي يجذب فيه لي منى
منى : يا منار يا باااردة
منار : هاا عصاا
منى : توا انتِ من جدكك تكلمي فيه
منار : عااادي
منى : باهي يا حمارة أستاذ كريم هذا السنه الجاية كيف بتحطي عينك في عينه وانتم تكلموا...؟
منار : عادي تحسابيني كيفك..؟
جت منى بتتكلم وتخش عليهم خالتها فاطمة
فاطمة : منى نبيك في موضوع
منى : شنو
فاطمة :
......

يتبع

للكاتبة : Shødy SMF