نبراس
*اكلج سناء انتي شلون اجيتي لهنا ومنو جابج وليش؟؟؟؟؟
سناء:اه اه اه اه شسولفلج خيه
اني يتيمه أم وأبو من الزغر بولادتي ربيت بحظن مرة الخال
والخال اذا هذا الحايط حجه هو حجه
رجل دجاجه مايحل
شبعتني ضيم زغيره واشتغل شغل كبار ودك وصياح ورزايل
وكوه خلتني ادرس وبس رسبت بسادس ابتدائي بطلتني
عمري ١٣ سنة وزوجتني لواحد من غير قريه
رادت بس تبعدني
متعرف الولد ولا عائلته
عرفتهم عن طريق الدلاله التجيبلها حاجات
المريه تشوف تعامل مرة خالي وياي وكسرت خاطرها
كلتلها اعرفلي وليد يريدله بنيه خليني ازوجها الج وخلصي منها
عاد هاي ماصدكت
اني مواليد ٧٣ وهو طلع مواليد ٥٥
اكبر مني ب١٤ سنه
بس اني كيفت ردت اخلص من مرة خالي السعلوة
والله وصارت القسمه يدادا
والولد خوش ولد وجبير ويفتهم ومثقف وواعي وحطني بعيونه
هو عايش وي ابو واخوته ٣ من ابو ومرة ابوو امه ميته وعنده من امه اخيات ٢ مزوجات بالبصره
خيه مرة ابو خوش مره الله يرحمها ماطولت وياي سنتين وماتت
وأبو واحد ادبسز وانسان مريض نفسي
بقيت ٤ سنوات الا حبلت وجبت ولد صار ابني عمره
٩اشهر واجاني زوجي مستشهد جايته جيله بالغلط اثناء التدريب هو يدرب بالجيش
هنا بدت،معاناتي كام يتحارش بيه عمي ابو رجلي وليله من الليالي طب لغرفتي وراد يسوي شي عفت ابني نايم وشردت للجوارين عاد حجيت للناس عنه
صبح الحقير ماخذ ابني وشارد بقيت الطم وادور ماكو مخليتلهم كرايب عمام ماكو
شهرين واجتني ناس كالوو اطلعي البيت هذا انباع هو وغراضه
يمه وين اروح ومنو الباعكم محد يكلي واخذو البيت لان شفت مكاتبه عدهم
عاد اني هنا مارجعت لخالي المن ارجع لضيم مرته
قررت اروح لبغداد
اشكي همي الحكومه بلكت الله ينصفوني
والحمد الله محد نصفني
وتعرفت على مره جانت مسجونه وطلعت هستوها وتلاكينه اني وياها
سولفتلها وضحكت كالت ميسولج شي والله لتعبين روحج
تعاي وياي لبيتي اجيت وياها لبيتها لهاي المنطقه يدادا
لكيتهم عشيره غجر معروفين عدنا كيوليه
همه عدهم هالشي فن مو شي عيب ولا حرام عدهم جاي يمارسون احد الفنون هذا معتقدهم وعشاير دادا كبااار همه وأبا عن جد هذا شغلهم
بقيت عدها لحد ماشافني صدام المرحوم وكلها اريدها وي البنات تركص وتدخل للكعدات متبقه هييج
صدك بديت اطب وياهن بس ها الله شاهد محد طخ ثوبي ماخليتهم وحافظت وحافظت على نفسي بس جنت مجبوره اركص حتى اعيش واكل واشرب
وره كم سنة اجه صلاح شاب زغيرون وحليوو ماتن علي البنات ونادر وزلمه معدل مينغلب
المرحوم يحبه بشكل ويحترمه وحسبه ايده اليمنه
صلاح حيل وفه وي المرحوم وكم مره بمره يغتالون المرحوم وتوكع بصلاح لان جان يذب روحه كبل صدام
