ولأني امرأه

ج 17

ولاني امراة

ج 16

وجهت السلاح عليه

ورجعت وجهته عليه ..

جانت ايدي ترجف ..المسدس يتحرك ..
ويطك بمحبس ايدي الشذري ..

مسحت دموعي ..ورحت قربته منه ..

جان صوت نفسه عالي ..

كل الي ابالي ..
اما اقتله

اما اقتل نفسي ..

وينتهي كل الوجع ..دخلت بدوامه عجيبه وهي ؟ اكو بداخلي شخص ..يكولي اقتلي ..وناس تحجي ..بصوت عالي ..كمت اتلفت والسلاح بايدي وكانما هم يمي ..ام حيدر تكول حركت روحها
هنا ابويه ..يكول تعبت من مشاكلج ..
خالي ..امي ..الكل تحجي

وشخص صوته اعلى من الكل اقتلي اقتلي
اخلصي منة ومن جبروته ..
عوفي اقتلي نفسج ترتاحين ..

صحت كااافي ..ولزمت راسي ..
كااافي ..

ووجهت السلاح ..
ع راسي ..

شفت ..المسافه ..بيني وبينهم قليل ..
قلبي اذاني وانقبض ..
اذا اطلق شبل يفز ..من نومه ..
وبسرعه عجيبه ..
اتخيلت شبل يكوم .ويشوف الدم ..
ويصرخ ..

ثواني واني افتر داخل نفسي فرة سريعه
مابين بكاء ..والم ..واحيانا ابتسم ..
ادركت ان بيني وبين الجنون ..رمشة عين ..
اغمضت عيني لانهي وجعي ..
وممدت يدي .ع الزناد ..
لاطلق طلقه الرحمه ..

لكن ايدي متساعدني ترجف ..
رحت جهه شبل ..
نمت بصفه ..حضنته ..وبسته ..
همست باذنه سامحني يوم ..
كمت ..خليت قوطيخ الحليب وممه ..
يمه ..
تصرفاتي ادل ع الجنون ..

لزمت رجل شبل ..وبوستها ..
فهد بغير ..عالم ..
كمت ..ومسحت وجهي ..
وكفت يم فهد ..
كتله ليش ؟؟
ضيعتني ليش..
ورحت ..

ثبتت ايدي الاثنين وجتهه ع رقبتي وكعدت بالكاع .
حصرت نفسي مابين ..ميز التواليت ..
والطبله ..
رفعت راسي ..
الكلام بداخلي مبهم ..
اريد انطق الشهادة اغلط بيها
اكثر من مرة ..

بالمرة الثالثه ..
نطقت اشهد ان لا اله الا الله
واشهد ان محمد رسول ..

اقسم بالله ..هي ثواني تفصل عن ضغطه الزناد ..
شبل ..صررخ ..وكانما ..شي وجعه ..
ويبجييي امممممم اممممممم ..بمعناه ماما ..

ماعرف شلون شمرت السلاح وحضنت ابني ..

ماعوفك حبيبي ..ابد وامسح دموعه ..
اسم الرحمن ماما..
حبيبي اتحمل كل شي ..

اني ام ضعيفه وراح اقوى بيك ..
اوعدك ماعوفك ..
وراح اتحمل كل شي ..
اهانه ضرب ..
كل شي لاجلك ..

ماعوفك ابد ..يوم ..
خليته بحضني ..ورضعته ..جان خايف
كل شويه يغفى ويفز ..
يمكن ملك الموت جان موجود بغرفتي بليلتها
ويمكن شعر شبل بوجودة ..
لان ارواح الأطفال تكون ..طاهرة ..وشفافه ..